ᐃᓗᓕᖏᓐᓂᒃ ᓇᓗᓇᐃᖅᓯᔾᔪᑦ: ᑖᓐᓇ ᑎᑎᕋᖅᓯᒪᔪᖅ ᐃᓗᓕᖃᖅᐳᖅ ᓇᐃᑦᑐᒥᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓂᒃ. ᐃᑲᔪᖅᑕᐅᓂᖅ ᐊᑐᐃᓐᓇᐅᔪᖅ ᐃᑲᕐᕋᓄᑦ 24-ᓄᑦ ᑭᓇᑐᐃᓐᓇᖅ ᐊᑦᑐᖅᑕᐅᓯᒪᔪᖅ ᐊᑐᖅᓯᒪᔭᖏᓐᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ ᑕᐃᒃᑯᓄᖓᓗ ᐊᒃᑐᖅᑕᐅᑐᐃᓐᓇᕆᐊᖃᖅᑐᓄᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓄᑦ. ᑲᓇᑕᒥ ᐊᒃᓱᕈᕐᓇᖅᑐᒃᑰᖅᑐᓄᑦ ᐅᖄᓚᕕᒃ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ 1-866-925-4419. ᐊᓂᒍᐃᓯᒪᔪᑦ ᐃᓚᖏᓪᓗ ᖃᐅᔨᒋᐊᕈᓐᓇᕆᕗᑦ ᖃᓄᐃᖁᔨᙱᓐᓂᕐᒧᑦ ᐃᑲᔪᖅᑕᐅᔪᒪᓂᕐᒧᑦ ᐊᑭᖃᙱᑦᑐᒧᑦ ᐅᕗᖓ 1-855-242-3310.

ᑖᒃᑯᓄᖓ ᒪᕐᕉᖕᓄᑦ−ᑐᕌᖓᔪᓄᑦ ᑕᐃᔭᐅᔪᒧᑦ ᐃᓄᐃᑦ ᓴᓇᐅᒐᓕᕆᓂᕐᒧᑦ ᐅᖃᓕᒫᒐᖓᓐᓂ ᐅᖃᐅᓯᖃᓚᐅᖅᐳᑦ ᐱᖓᓱᓂᒃ ᓴᖅᑭᑉᐸᓪᓕᐊᔪᓂᒃ ᐃᓄᐃᑦ ᑲᑭᓂᕐᒧᑦ ᐊᒻᒪ ᐃᓕᖅᑯᓯᓕᕆᓂᕐᒧᑦ ᑭᒡᒐᖅᑐᐃᔨᓂᒃ: ᐋᑕᓐ ᑰᕆ, ᒪᓚᐃᔭ ᐃᓅᔭᖅ ᒪᓘᓂ ᐊᒻᒪ ᐊᒡᓴᓕᖏᐊᖅ (ᔫ ᐅᓱᑲᓐᓄᐊᖅ). ᑕᕝᕙᓂ ᐊᐱᖅᓱᖅᑕᐅᑎᓪᓗᒋᑦ ᐅᖃᓕᒫᒐᓕᐅᖅᑎᒃᑯᑦ ᐋᖅᑭᒃᓱᐃᔨᖓᑦ ᓇᐸᑦᓯ ᕘᓪᔪ, ᓇᖕᒥᓂᖅ ᑲᑭᓂᓕᕆᓪᓗᑎᒃ ᐱᓕᕆᖃᑦᑕᕐᓂᖏᑦ, ᖃᐅᔨᖃᑦᑕᖅᓯᒪᔭᖏᑦ ᐆᒻᒪᖅᑎᑦᑎᒃᑲᓐᓂᖅᖢᑎᒃ ᓄᓇᒥᖕᓂ ᐊᒻᒪ ᖃᓄᖅ ᐃᓄᐃᑦ ᖃᐅᔨᒪᔭᑐᖃᖏᑦ ᐊᓯᐅᔨᔭᐅᕙᓪᓕᐊᖕᒪᖔᑕ.

ᐃᓄᐃᑦᓴᓇᐅᒐᖏᓐᓂᒃᐅᖃᓕᒫᒐᖅ: ᖃᓄᕐᓕ ᐱᔪᒪᓂᖃᓕᓚᐅᖅᐱᑦ ᑲᑭᓂᕐᓂᒃ ᑐᓐᓂᕐᓂᓪᓗ?

ᒪᓚᐃᔭ ᐃᓅᔭᖅ ᒪᓘᓂ: ᐅᖃᕈᓐᓇᖏᑦᑐᖓ ᑲᑭᓃᑦ ᐊᒻᒪᓗ ᑐᓐᓃᑦ ᐱᕈᖅᓴᖅᑎᓪᓗᖓ ᐅᖃᐅᓯᐅᕙᓚᐅᕐᒪᖔᑕ, ᑭᓯᐊᓂ ᖃᐅᔨᒪᓚᐅᖅᑐᖓ ᑕᒫᓃᓐᓂᖏᓐᓂᒃ. ᑎᑎᖅᑐᒐᕐᓂᒃ ᐊᒻᒪ ᓴᓇᙳᐊᒐᕐᓂᒃ ᐱᑕᖃᖅᐳᒍᑦ ᐊᖓᔪᖅᑳᒃᑯᑎᓐᓂ ᑮᓇᒃᑯᑦ ᑲᑭᓂᓕᖕᓂᒃ ᑭᓯᐊᓂ ᐊᕐᕌᒍᐃᑦ ᖁᓖᑦ ᓈᓕᖅᑐᑦ ᑕᑯᕙᓪᓕᐊᓕᓚᐅᖅᑕᒃᑲ ᐃᓄᖕᓄᑦ ᐊᑐᖅᑕᐅᓕᖅᑎᓪᓗᒋᑦ. ᑕᑯᕙᓚᐅᖅᑕᒃᑲ ᓴᓇᐅᒐᕐᓂ, ᓲᕐᓗ ᐊᔾᔨᙳᐊᓂ, ᓴᓇᙳᐊᒐᐃᑦ ᐊᒻᒪ ᑎᑎᖅᑐᒐᐃᑦ. 

ᐊᐃᑕᓐ ᑰᕆ: ᐅᕙᓐᓄᑦ, ᐅᔾᔨᕈᓱᖕᓂᖅ ᑲᑭᓂᕐᓂᒃ ᑐᓐᓂᕐᓂᓪᓗ ᐱᒋᐊᖅᓵᓕᓚᐅᖅᑐᑦ. ᐃᓄᐃᓐᓇᖅᑐᑦ ᐃᓕᓐᓂᐊᖅᑎᑕᐅᕙᓚᐅᕋᑦᑕ ᐊᐱᕆᓪᓗᑎᒃ ᑎᑎᕋᐅᔭᖁᔨᓪᓗᑎᒃ ᐊᔾᔨᒌᙱᑦᑐᓂᒃ ᑲᑭᓂᕐᓂᒃ. ᑲᑭᓂᖅᑖᐅᓚᐅᖅᑎᓪᓗᖓ ᖃᐅᔨᓚᐅᖅᑐᖓ ᐃᒃᐱᖕᓂᐊᓂᒃᑯᑦ ᐊᓯᔾᔨᖅᑐᒥᒃ ᐃᓗᐃᑦᑑᓂᖅᓴᐅᖅᑰᔨᓪᓗᖓ ᖃᐅᔨᒪᓚᐅᖅᑐᖓᓗ ᑕᒪᓐᓇ ᑲᔪᓯᑎᑦᑐᒪᓪᓗᒍ. 

ᐊᒃᓴᓕᖏᐊᖅ (ᔫ ᐅᓱᑲᓐᓄᐊᖅ): ᑐᓴᕈᒪᐃᓐᓇᓲᖑᔪᖓ ᑲᑭᓂᕐᓂᒃ, ᑲᑭᓃᑦ ᐊᑐᖅᑕᐅᓯᒪᓂᖏᓐᓂᒃ ᐊᒻᒪ ᓴᓇᔭᐅᕙᒃᓯᒪᓂᖏᓐᓂᒡᓗ.

ᐱᕈᖅᐸᓪᓕᐊᓪᓗᖓ, ᑲᑭᓂᓕᐅᕐᓂᕐᒧᑦ ᐊᑐᕋᓲᑎᑦ ᐱᑕᖃᓚᐅᖅᑐᑦ; ᑭᓯᐊᓂᓕ, ᐃᓱᒪᒋᔭᐅᓪᓗᐊᑕᓚᐅᖅᑐᖅ ᑕᒪᓐᓇ ᐊᑐᖅᑕᐅᕙᒍᓐᓃᕐᓂᖓᓂᒃ ᐊᒻᒪᓗ ᑕᐃᒪᐃᒃᑲᓐᓂᔾᔮᙱᓕᕐᓂᖓᓂᒃ, ᑕᒪᓐᓇ ᖁᕕᐊᓇᙱᑦᑐᒐᓗᐊᖅ ᐱᕈᑉᐸᓪᓕᐊᓗᓂ ᐅᒃᐱᕆᔭᕆᐊᒃᓴᖓ. ᐃᒃᐱᖕᓂᐊᔪᓐᓃᕐᓂᖅ ᓇᖕᒥᓂᖅ ᐃᓕᖅᑯᓯᕆᔭᒥᒃ ᐋᓪᓚᐅᕗᖅ.

ᐊᕐᓇᕈᓗᙳᐊᖅ ᑕᐃᔭᐅᓯᒪᙱᑦᑐᖅ (ᓈᓗᖏᐊᑉ ᑐᓐᓂᖏᑦ) (c. 1923) ᕿᕐᓂᖅᑐᒧᑦ ᑎᑎᕋᐅᔭᖅᓯᒪᔪᑦ ᐊᓕᓚᔪᒃᑯᑦᐊᔾᔨᙳᐊᖅ ᑲᓇᑕᒥ ᑕᑯᔭᒐᖃᕐᕕᒃ ᑎᐊᓐᒫᒃᒥᑦ 

ᐃᓄᐃᑦ ᓴᓇᐅᒐᖏᓐᓂᒃ ᐅᖃᓕᒫᒐᖅ: ᐃᓱᒪᒋᔭᖃᖅᐱᑦ ᑭᓱᓄᑦ ᐊᓯᐅᔨᔾᔪᑕᐅᓚᐅᕐᒪᖔᑕ ᖃᐅᔨᒪᓂᕐᒥᒃ ᑲᑭᓃᑦ ᐊᒻᒪ ᑐᓃᑦ ᒥᒃᓵᓄᑦ?

ᒪᓚᐃᔭ: ᐅᖃᕋᔭᖅᑐᖓ ᐅᖃᐅᓯᖅᐳᑦ ᐊᓯᐅᔨᔭᐅᓂᖓ ᐊᒃᑐᐃᓂᖃᓪᓚᕆᖕᒪᑦ ᐃᓕᖅᑯᓯᑦᑎᓐᓄᑦ ᓲᖃᐃᒻᒪ ᐅᓂᒃᑳᖅᑐᐊᑦ ᖃᐅᔨᒪᙱᓕᕋᑦᑎᒍᑦ. ᖃᐅᔨᒪᙱᓇᑦᑕ ᖃᓄᖅ ᐊᐱᖅᓱᕆᐊᒃᓴᖅ. ᐊᖏᔪᒻᒪᕆᒻᒥᒃ ᐅᖃᐅᓯᕐᒧᑦ ᐊᕝᕕᐊᕈᑎᑕᖃᕐᒪᑦ ᓲᕐᓗ ᐃᓅᖃᑎᓐᓂ ᐋᓪᓚᐅᓕᖅᖢᖓ.

ᐊᐃᑕᓐ: ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐅᖃᐅᔾᔭᐅᕙᒃᖢᑎᒃ ᐃᓕᖅᑯᓯᖏᑦ ᐱᐅᙱᑦᑑᓂᖏᓐᓂᒃ ᐃᓗᐊᖅᓴᑦᑎᐊᙱᓐᓂᖅᓴᐅᖕᒪᑕ ᐅᖃᐅᓯᖃᕆᐊᒃᓴᖅ ᑲᑭᓂᕐᓂᒃ ᑐᓐᓂᕐᓂᒡᓗ ᑕᐃᒪᐃᑦᑐᒃᑰᖅᓯᒪᙱᑦᑐᓂᒃ. ᐃᓚᖃᖅᑐᑎᒍᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂᒃ, ᓱᓕ ᐃᒃᐱᒍᓱᒃᑐᒍᑦ ᐊᒃᓱᕈᕐᓇᕐᓂᒃᑰᕐᓂᕆᓚᐅᖅᑕᖏᓐᓂᒃ.

ᐊᒃᓴᓕᖏᐊᖅ: ᐃᒃᐱᖕᓇᑦᑎᐊᖅᑐᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᑲᑉᐱᐊᓱᒃᑐᑦ ᐅᖃᐅᓯᖃᕆᐊᒃᓴᖅ. ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᒥᒃ ᐃᓚᖃᖅᖢᖓ, ᐊᐱᖅᓱᕈᓐᓇᙱᑦᑐᖓ ᖃᓄᐃᑕᐅᕙᓚᐅᕐᒪᖔᑕ ᑕᒪᓐᓇᓗ ᐊᒃᓱᕈᕐᓇᐅᑕᐅᔪᖅ ᐲᕆᐊᒃᓴᖓ ᓇᓗᓇᖅᑐᐊᓘᓪᓗᓂ.

ᐊᐃᑕᓐ: ᑲᑭᓂᖃᕐᓂᖅ ᓄᖅᑲᖅᑎᑕᐅᓚᐅᖅᓯᒪᔫᒐᓗᐊᖅ− ᐅᖃᐅᓯᐅᑐᐃᓐᓇᓚᐅᙱᑦᑐᖅ− ᓄᖅᑲᖅᑎᑕᐅᒻᒪᕆᒋᐊᓚᐅᖅᑐᖅ. ᐅᖃᖅᐸᓚᐅᖅᑐᑦ, "ᓄᖅᑲᙱᒃᑯᕕᑦ ᐃᑯᒫᓗᓕᐊᓛᖅᑐᑎᑦ, ᐅᕝᕙᓘᓐᓃᑦ ᐱᑦᑎᐊᖅᑕᐅᔪᓐᓃᕈᑎᒋᓗᒋᑦ." ᑕᐃᒪᐃᒻᒪᑦ ᑕᒪᓐᓇ ᓴᒃᑯᐃᔾᔪᑕᐅᓯᒪᕗᖅ ᐊᒥᓱᓄᑦ ᐃᓄᓐᓄᑦ. ᑕᒪᐃᓐᓄᑦ ᐊᒃᓱᕈᕐᓇᖅᑐᒃᑰᕈᑕᐅᓯᒪᔪᖅ ᐊᑐᖅᑕᕗᑦ ᑲᔪᓯᑎᑦᑎᔪᓐᓇᕈᑎᒋᙱᑕᕗᑦ ᓯᕗᓂᒃᓴᑦᑎᓐᓄᑦ ᑭᖑᓂᑦᑎᓐᓂᙶᖅᑐᓂᒃ. ᖃᓄᖅ ᑕᒪᒃᑯᐊ ᐅᖃᐅᓯᕆᖃᑦᑕᖅᐱᑎᒍ? ᖃᓄᖅ ᐋᓐᓂᐊᕈᑕᐅᓂᐊᖅᐸ ᐊᒥᓱᓄᑦ ᐃᓄᓐᓄᑦ? ᐊᒻᒪᓗ ᑕᒪᒃᑯᐊ ᑲᒪᒋᔪᓐᓇᖅᐱᑎᒍ ᒫᓐᓇᐅᔪᖅ ᐃᑲᔫᑎᒃᓴᖃᑦᑎᐊᖅᑎᓐᓇᑕ?

ᕗᕌᓐᓱᐊᔅ ᐅᒃᓚᒐ ᑕᐃᔭᐅᓯᒪᙱᑦᑐᖅ (ᐃᓄᙳᖅᑐᑦ ᐆᒪᔪᙳᖅᑐᓪᓗ) (1979) ᐊᒥᐊᓕᑦ ᑎᑎᕋᐅᑎᑦ ᐸᐃᑉᐹᒃᑯᑦ 63.5 x 83.8 cmᐊᔾᔨᙳᐊᖅ ᒪᕆᐊᓐ ᓯᑳᑦ ᑕᑯᔭᒐᖃᕐᕕᖓᓐᓂᑦ 

ᐃᓄᐃᑦ ᓴᓇᐅᒐᖏᓐᓂᒃ ᐅᖃᓕᒫᒐᖅ: ᑲᑭᓂᖅᑖᕋᕕᑦ, ᖃᓄᕐᓕ ᐃᓚᑎᑦ ᓄᓇᓕᖕᒥᐅᓪᓗ ᐃᓱᒪᓚᐅᖅᐸᑦ?

ᒪᓚᐃᔭ: ᐊᐅᔭᐅᓚᐅᖅᑐᖅ, ᐊᓈᓇᒐ ᐊᐱᕆᓚᐅᕋᒃᑯ, "ᐱᖅᑯᓯᑐᖃᒃᑯᑦ ᑲᑭᓂᖅᑖᕈᒪᙱᓚᑎᑦ?" ᐅᖃᖅᖢᓂ, "ᐋᒃᑲ, ᑕᐃᒪᐃᑦᑐᒪᓇᔭᕋᒪ?" ᓄᒫᓱᓕᑲᐅᑎᒋᓚᐅᖅᑐᖓ. ᐃᓱᒪᓚᐅᖅᑐᖓ, ᐊᓈᓇᒐ ᐱᔪᒪᙱᑉᐸᑦ, ᐱᔭᕆᐊᖃᙱᓚᖓᑦᑕᐅᖅ? ᑭᓯᐊᓂᓕ ᓇᖕᒥᓂᖅ ᕿᓂᕐᓂᒃᑯᑦ ᐊᒻᒪᓗ ᐱᖃᓐᓇᕆᔭᓐᓂᒃ ᐃᓚᓐᓂᒡᓗ ᐅᖃᖃᑎᖃᖃᑦᑕᓂᒃᑯᑦ, ᖃᐅᔨᓚᐅᖅᑐᖓ ᖃᓪᓗᓈᓄᑦ ᐊᒃᑐᖅᑕᐅᓯᒪᒻᒪᕆᖕᓂᖓᓂᒃ. ᐊᑯᓂᑲᓪᓚᕈᓗᒃ ᐃᓱᒪᓕᐅᕆᐊᖃᓚᖅᑐᖓ ᑲᑭᓂᖅᑖᕐᓂᐊᕐᒪᖔᕐᒪ. ᒫᓐᓇᓕ, ᐊᓯᓐᓄᑦ ᐊᖏᖅᑕᐅᔭᕆᐊᖃᖅᑰᔨᙱᑦᑐᖓ ᓲᖃᐃᒻᒪ ᖃᐅᔨᒪᒐᒪ ᐃᓅᓂᓐᓂᒃ ᓇᓂ ᓄᓇᖃᕋᓗᐊᕈᒪ. 

ᐊᐃᑕᓐ: ᐃᓚᒃᑲ ᐃᑲᔪᖅᓱᑦᑎᐊᖅᑐᒻᒪᕆᐅᓚᐅᖅᐳᑦ ᖃᓄᓕᒫᖅ ᑭᓯᐊᓂ ᑮᓇᒃᑰᖁᔨᓇᑎᒃ. ᑭᓯᐊᓂ ᐃᓱᒪᔪᖓ ᑐᓐᓂᖅᑖᓚᐅᖅᑎᓪᓗᖓ, ᐃᓕᑕᖅᓯᓚᐅᕐᒪᑕ ᑐᑭᖃᑦᑎᐊᕐᓂᖓᓂᒃ ᐃᓕᖅᑯᓯᑎᒍᑦ ᐊᒻᒪᓗ ᐃᑉᐱᓐᓂᐊᓂᒃᑯᑦ. ᑕᐃᒪᙵᓂᓪᓕ, ᖃᓄᐃᒃᓴᙱᓐᓂᖅᓴᐅᓕᖅᑐᑦ.

ᑲᑭᓂᖅᑖᖃᑦᑕᓕᓚᐅᖅᑐᖓ ᑕᐃᒪᐃᑦᑐᖃᖃᑦᑕᓕᐊᓂᒃᑎᓪᓗᒍ, ᐱᒋᐊᖅᑎᑦᑎᔨᐅᓯᒪᙱᑦᑐᖓ. 

ᐊᒃᓴᓕᖏᐊᖅ: ᑕᐃᔅᓱᒪᓂ ᐆᒻᒪᖅᑎᑦᑎᒃᑲᓐᓂᕋᓱᒃᑎᓪᓗᒋᑦ, ᐊᖓᔪᖅᑳᕋ ᐅᖃᖃᑎᒋᓚᐅᖅᐸᕋ ᐃᓄᐃᑦ ᑲᑭᓂᖅᑕᐅᔾᔪᓯᑐᖃᖏᓐᓂᒃ ᐅᖃᖅᖢᓂᓗ, "V−ᒥᒃ ᐱᑦᑕᐃᓕᒋᑦ ᖃᐅᒃᑯᑦ; ᐱᐅᙱᑦᑐᐊᓘᖕᒪᑦ, ᑕᑯᒥᓇᕐᓇᓂᓗ." ᑕᒪᓐᓇ ᐅᓪᓗᒥ ᐃᓗᐊᕆᓇᔭᙱᑦᑎᐊᖅᑕᕋ.

ᓂᖏᐅᑯᓗᒃ ᑏᕕ ᑕᐃᔭᐅᓯᒪᙱᑦᑐᖅ (2022) ᐊᒥᐊᑦ, ᑕᖅᓴᓕᑦ ᑎᑎᕋᐅᑎᑦ, ᐊᒥᐊᕆᙱᑦᑐᑦ ᐊᒻᒪ ᐃᒪᓕᑦ  39.5 x 189 cmᓴᓇᔭᐅᒃᑲᓐᓂᖅᑐᖅ ᐊᖏᖅᑕᐅᓯᒪᓪᓗᑎᒃ ᑭᙵᐃᑦ ᓴᓇᐅᒐᓕᐅᕐᕕᖓᓐᓂᑦ

ᐃᓄᐃᑦ ᓴᓇᐅᒐᖏᓐᓂᒃ ᐅᖃᓕᒫᒐᖅ: ᖃᓄᕐᓕ ᖃᐅᔨᓴᓚᐅᖅᐱᑦ ᑲᑭᓂᕐᓂᒃ? ᐊᐱᖅᓱᓚᐅᖅᐱᑦ ᐊᓯᖏᓐᓂᒃ ᐃᓄᖕᓂᒃ ᑕᒪᑐᒪ ᒥᒃᓵᓄᑦ? ᐄᖑᒃᐸᑦ, ᖃᓄᕐᓕ ᐃᓄᐃᑦ ᑭᐅᓚᐅᖅᐸᑦ ᐊᐱᖅᑯᑎᖕᓄᑦ?

ᒪᓚᐃᔭ: ᑭᓇᐅᓂᓐᓄᑦ, ᐊᒃᓱᕈᕐᓇᖅᓯᖃᑦᑕᖅᑰᖅᑐᖅ ᐊᐱᖅᓱᕆᐊᒃᓴᖅ, ᓈᒻᒪᒃᓴᙱᑦᑐᓂᒃ ᑭᐅᔭᐅᓂᐊᕋᓱᒋᕙᒃᑲᒪ. ᐊᔪᕐᓇᖅᐸᖕᒥᖕᒪᑦ ᓱᓕᔪᓂᒃ ᑐᓴᕐᕕᖃᕋᓱᒋᐊᒃᓴᖅ. ᐊᖏᕐᕋᕌᖓᒪ, ᐅᖃᓕᒫᒐᖃᕐᕕᖕᓄᑦ ᑕᑯᔭᒐᖃᕐᕕᖕᓄᓪᓘᓐᓃᑦ ᐅᐸᑲᐅᑎᒋᕙᒃᑐᖓ ᑐᓴᕐᕕᒃᓴᖃᕐᓂᖅᓴᐅᖕᒪᑕ ᖃᓪᓗᓈᑦ ᓄᓇᖏᓐᓂᑦ. 

ᐊᐃᑕᓐ: ᐃᓄᑐᖃᕐᓂᒃ ᐃᖃᓗᖕᓂᒃ ᑐᓂᓯᓪᓗᖓ ᐊᐱᖅᓱᖃᑦᑕᓚᐅᖅᑐᖓ ᑲᑭᓃᑦ ᒥᒃᓵᓄᑦ. ᑕᐃᒫᒃ ᐃᓱᒪᓕᐅᓕᓚᐅᖅᐳᖓ ᑐᑭᖏᓐᓂᒃ ᐅᕙᓐᓄᑦ. ᑕᒪᒃᑯᐊ ᑐᑭᓯᒋᐊᕈᑎᐅᔪᑦ ᐃᔨᖅᑕᐅᓯᒪᓚᐅᖅᑐᑦ ᐅᕙᑦᑎᓐᓄᑦ ᐊᒥᓱᓄᑦ. 

ᐊᒃᓴᓕᖏᐊᖅ: ᖃᐅᔨᓴᖅᑐᒻᒪᕆᐅᓚᐅᖅᐳᖓ ᑎᑎᖅᑐᒐᕐᓂᒃᑯᑦ ᐱᓕᕆᐊᖑᓚᐅᖅᑐᓂᒃ ᖃᓪᓗᓈᖑᖅᑎᑕᐅᓇᓱᓚᐅᖅᑎᓐᓇᒋᑦ. ᐱᔭᕆᐊᑐᓂᖅᐸᐅᓚᐅᖅᑐᖅ ᐊᐱᕆᒋᐊᒃᓴᖅ ᐊᑕᑕᓐᓂᒃ, ᐅᕝᕙᓘᓐᓃᑦ ᐊᑖᑕᑦᑎᐊᓐᓂᒃ, ᐃᓚᑦᑎᓐᓂᒃ ᐃᓄᐃᑦ ᐱᖅᑯᓯᖏᑎᒍᑦ ᑲᑭᓂᖅᑖᖅᓯᒪᔪᖃᕐᓂᕐᒪᖔᑦ. ᑯᒃᓴᓱᒻᒪᕆᓚᐅᖅᑐᖓ ᐊᐱᕆᒐᔪᙱᓐᓇᒃᑭᑦ ᐃᓕᖅᑯᓯᑦᑕ ᒥᒃᓵᓄᑦ.

ᐊᒃᓴᓕᖏᐊᖅ (ᔫ ᐅᓱᑲᓐᓄᐊᒃ) ᑲᓄᒃ ᐱᓂᐊᑲ, ᓴᖅᑭᑕᓂᑦ 4 (2022) ᐊᒥᐊᖅᓯᒪᔪᖅ ᑐᐱᐅᔭᕐᒦᑦᑐᖅ 165.1 x 76.2 cm

ᐃᓄᐃᑦ ᓴᓇᐅᒐᖏᓐᓂᒃ ᐅᖃᓕᒫᒐᖅ: ᖃᓄᖅ ᑐᓐᓃᑦ ᑲᑭᓃᓪᓗ ᐊᒃᑐᐊᓂᖃᖅᐸᑦ ᐃᓱᒻᒥᖅᓯᒪᔪᓄᑦ ᐃᓗᖅᑯᓯᒃᑯᓪᓗ ᓇᖕᒥᓂᖃᕐᓂᕐᓄᑦ?

ᒪᓚᐃᔭ: ᑲᑭᓃᑦ ᐃᓱᒪᓕᐊᕆᔭᐅᓯᒪᔪᑦ ᐋᖅᑭᒃᓯᒪᓂᖏᓪᓗ ᑭᖑᕚᕆᔭᐅᔪᓄᑦ ᑲᔪᓯᓯᒪᓪᓗᑎᒃ, ᑭᓯᐊᓂᑦᑕᐅᖅ ᐊᕐᓇᐅᓂᕐᒧᑦ ᐊᖑᑕᐅᓂᕐᒧᓪᓘᓐᓃᑦ ᑐᑭᖃᕆᓪᓗᑎᒃ. ᐃᓱᒪᒋᐊᓚᐅᙱᓂᔅᓯᓐᓂᒃ ᓇᓗᓇᐃᖅᓯᔪᓐᓇᕆᐊᖃᖅᑐᑎᑦ ᓇᓪᓕᐊᓐᓂᒃ ᓇᓗᓇᐃᒃᑯᑎᑖᕐᓂᐊᕐᒪᖔᖅᐱᑦ. ᐅᖃᑦᑎᐊᖅᑐᒻᒪᕆᐊᓘᒻᒪᑕ ᐃᓅᓯᕐᓂ ᓇᓃᓕᕐᒪᖔᖅᐱᑦ. ᐅᓂᒃᑳᖃᑦᑕᖅᑐᑦ. ᑭᓯᐊᓂᓕ ᐃᓱᒪᔪᖓ ᓇᖕᒥᓂᖅ ᐋᖅᑭᒃᓱᒐᒃᓴᐅᓂᖏᓐᓂᒃ. 

ᐊᐃᑕᓐ: ᑐᓴᖅᓯᒪᒻᒥᔪᖓᑦᑕᐅᖅ ᐊᔾᔨᓴᐃᓐᓇᖏᓐᓂᒃ ᑲᑭᓂᖅᑕᐅᒍᕕᑦ ᐊᓯᖏᑎᑐᑦ, ᑭᓇᐅᓃᑦ ᐃᓅᔪᓐᓃᖅᓯᒪᓕᖅᑎᓪᓗᑎᑦ ᐃᓕᓴᕆᔭᐅᔪᓐᓇᐃᓪᓕᓇᔭᖅᑐᖅ. ᑲᒪᒋᑦᑎᐊᕆᐊᖃᖅᐳᑦ ᑭᓇᑐᐃᓐᓇᕐᒥᒃ ᐋᓐᓂᖅᓯᓕᙱᒃᑲᓗᐊᕐᒪᖔᑦᑕ ᓴᓇᓯᒪᔭᖏᓐᓂᒃ ᐊᑐᕈᒪᓂᐊᕈᑦᑕ.

ᑰᕋ ᑎᕗᔅ ᑕᐃᔭᐅᓯᒪᙱᑦᑐᖅ (2017) ᐊᔾᔨᙳᐊᖅ

ᓵᓚᒨᓂ ᐳᑐᒍᖅ ᑮᓇᖓ ᑐᓐᓂᓕᒃ (1970) ᓯᑎᔪᖅ  15.2 x 12.7 x 14 cmᐅᐊᑎᖕᑕᓐ ᐊᑭᑦᑐᕋᐅᑎᔨᖏᑦ ᐊᒻᒪ ᖃᐅᔨᓴᖅᑎᖏᑦ, ᑐᕌᓐᑐ 

ᐃᓄᐃᑦ ᓴᓇᐅᒐᖏᓐᓂᒃ ᐅᖃᓕᒫᒐᖅ: ᐅᖃᐅᓯᕆᔪᓐᓇᖅᐱᒋᑦ ᑲᑭᓂᖅᐱᑦ ᑐᑭᖏᑦ?

ᐊᒃᓴᓕᖏᐊᖅ: ᑲᑭᓃᑦ ᑐᑭᓪᓚᑦᑖᖃᖅᑐᐃᓐᓇᐅᙱᑦᑐᑦ. ᑐᑭᒋᔭᖏᑦ ᐊᓯᖏᓐᓄᑦ ᐃᓄᖕᓄᑦ ᑐᑭᖏᑦ ᐊᔾᔨᒋᙱᑐᐃᓐᓇᕆᐊᖃᕐᒪᒋᑦ. ᑭᓯᕐᒥᐅᕐᓗᑎᒃ ᑐᑭᖃᕈᓐᓇᖅᑐᑦ ᐃᒪᒌᒃᑐᓄᑦ, ᓄᓇᖅᑲᑎᒌᖕᓄᑦ, ᐃᓅᖃᑎᒌᒃᑐᓄᓪᓘᓐᓃᑦ ᐊᒻᒪᓗ ᓄᓇᓕᖕᒥᓂ ᖃᓄᐃᑦᑑᓂᖏᓐᓄᑦ.

ᒪᓚᐃᔭ: ᐆᑦᑑᑎᒋᓗᒍ, ᓄᑖᐅᓛᑦ ᑲᑭᓂᒃᑲ ᓄᓕᐊᔫᕐᒥᒃ ᑐᑭᖃᖅᑐᑦ. ᓄᓕᐊᔫᖅ ᐃᒪᕐᒥ ᑑᕐᖓᖁᑎᒋᒐᑦᑎᒍ. ᐊᒥᓱᑦ ᐃᓄᐃᑦ ᐊᒡᒐᒥᒍᑦ ᑲᑭᓂᖃᖅᑐᑦ, ᑭᓯᐊᓂᓕ ᑲᑭᓂᓕᐊᒃᑲ ᐃᓅᓯᓐᓂᒃ ᐅᓂᒃᑳᖅᓯᒪᑎᑦᑕᒃᑲ. ᑐᑭᓕᐊᕆᓯᒪᔭᒃᑲ ᑎᑦᑕᕐᓂᒃ ᑐᑭᓕᕇᒃᓯᒪᓪᓗᑎᒃ ᓯᕗᓪᓕᖅᐹᓂ, ᒪᒃᑯᖕᓂᓐᓂ ᐃᓐᓇᕈᖅᐸᓪᓕᐊᓂᓐᓂᓗ ᓇᓗᓇᖅᑎᓪᓗᒍ ᓇᓗᓇᐃᖅᓯᓯᒪᓪᓗᑎᒃ. ᑭᖑᓪᓕᖅ ᑐᑭᓕᐊᖅᑐᐃᓐᓇᐅᓪᓗᓂ, ᓇᓗᓇᐃᖅᓯᓪᓗᓂ ᑭᓇᐅᓂᓐᓂᒃ ᖃᐅᔨᒪᓕᖅᐸᓪᓕᐊᓂᓐᓂᒃ. ᑲᑎᖦᖢᒋᑦ ᑲᑭᓐᓂᒃᑲ ᓇᓗᓇᐃᖅᓯᖕᒪᑕ ᐃᓕᖅᑯᓯᓐᓄᑦ ᐊᒃᑐᐊᓂᖏᓐᓂᒃ. ᑭᓯᐊᓂ ᐊᒡᒐᒃᑲ ᑐᑭᖃᑦᑎᐊᖅᑐᑦ, ᐊᒃᑐᐊᓂᖃᖅᑐᑦ ᐃᒪᕐᒧᑦ ᓂᕿᓄᓪᓗ ᐊᒻᒪ ᓄᓕᐊᔫᕐᒥᒃ.

ᐊᐃᑕᓐ: ᖁᒃᑐᕋᒃᖁᑦ ᑲᑭᓃᑦ ᐃᕐᓂᓯᒪᓂᕐᒧᑦ ᑲᑭᓂᖅᑖᕈᑕᐅᒐᔪᖕᓂᖅᓴᐅᔪᑦ ᐃᓄᖕᓄᑦ. ᐊᔾᔨᒌᙱᑦᑐᓂᒃ ᑐᓴᖃᑦᑕᖅᓯᒪᕗᖓ ᖃᐅᒃᑯᑦ ᐊᒻᒪ ᑕᓪᓗᒃᑯᑦ ᑲᑭᓃᑦ ᒥᒃᓯᖏᓐᓂᒃ. ᑕᒪᒃᑯᐊ ᐃᒻᒥᓅᖓᓂᖅᓴᐅᔪᓐᓇᖅᑐᑦ. ᓴᒡᕕᒃᑯᑦ ᑲᑭᓃᑦ ᓄᑕᐅᓂᖅᓴᐅᔪᑦ-ᑕᐃᔭᐅᓯᒪᒋᓪᓗᑎᒃ ᐊᓈᓇᐅᓕᕐᓂᕐᒧᑦ ᑕᑯᔭᒃᓴᐅᓪᓗᑎᒃ ᐊᒪᐅᓯᔭᖅᑐᓄᑦ. 

ᒪᕐᕉᓪᓗᖓ ᐃᓅᓪᓗᖓ, ᐊᕐᓇᓄᑦ ᐊᖑᑎᓄᓪᓗ ᑲᑭᓂᓕᐊᕆᔭᐅᕙᒃᑐᓂᒃ ᑕᒪᐃᓐᓂᒃ ᐊᑐᖅᐳᖓ.

Y-ᖑᔪᑦ ᐃᕕᐊᖏᒃᑯᑦ ᑲᑭᓂᒃᑲ ᓇᓗᓇᐃᖅᓯᔪᑦ ᐊᖓᓇᓲᑎᓂᒃ. ᓴᖑᐃᓕᖓᔪᑦ ᐃᒪᕐᒥᒃ ᑐᑭᖃᖅᖢᑎᒃ. ᑭᓯᐊᓂ ᓇᓗᓇᐃᕌᖓᒃᑭᑦ, ᑕᒪᐃᓐᓅᓕᖓᓇᓱᖃᑦᑕᖅᑐᖓ. ᐅᕙᓐᓄᑦ ᑐᑭᖃᓪᓚᑦᑖᖅᑐᓂᒃ ᐅᖃᐅᓯᖃᓗᐊᙱᑦᑐᖓ, ᖃᓄᖅ ᐱᐅᓯᖃᖃᑦᑕᖅᓯᒪᖕᒪᖔᕐᒪ ᑖᒃᑯᓂᖓ ᓇᓗᓇᐃᒃᑯᑕᓂᒃ. ᑐᑭᓪᓚᑦᑖᖏᓐᓂᒃ ᐅᖃᐅᓯᖃᓗᐊᖅᐸᙱᑦᑐᖓ ᐃᓅᙱᑦᑐᓄᑦ. ᐅᖃᐅᓯᕆᔭᓐᓂᒃ ᐃᓱᒪᓕᖅᑐᖃᖁᔨᙱᓐᓇᒪ, “ᐃᓄᓕᒫᑦ ᑕᐃᒪᐃᒻᒪᑕ, ᑕᐃᒪᐃᓐᓂᐊᓕᕆᕗᖓ.”

ᒫᒃ ᐸᓇᑦ ᖃᐅᔨᓴᕐᓂᖅ ᑲᑭᓂᕐᓂᒃ (2020) ᐃᒐᓚᐅᔭᕐᒥᑦ 112 × 76 cm

ᒪᓚᐃᔭ ᐃᓅᔭᖅ ᒪᓘᓂ ᐊᒥᓲᓕᖓᔪᓂᑦ ᓴᓇᙳᐊᒐᖅᑎᐅᔪᖅ ᐊᒻᒪᓗ ᑎᑎᕋᖅᑎᐅᔪᖅ ᐃᖃᓗᖕᓂᙶᖅᓯᒪᔪᖅ, ᓄᓇᕗᒻᒥ, ᒫᓐᓇᓗ ᓄᓇᖃᖅᖢᓂ Musqueam (xʷməθkʷəy̓əm), Squamish (Sḵwx̱wú7mesh Úxwumixw) and Tsleil-Waututh (səlilwətaɬ) Nations. ᐊᒡᒐᒧᑦ ᑲᑭᓂᓕᐅᖅᐸᒃᑐᖅ, ᒥᖅᐳᖅᐸᒃᑐᖅ ᓴᐸᙱᕆᕙᒃᖢᓂᓗ ᐊᔾᔨᒌᙱᑦᑐᓂᒃ ᓯᕗᕚᖏᓐᓂᙶᖅᑐᓂᒃ ᓄᓇᓕᐸᐅᔭᒥ ᓄᓇᖃᓕᖅᖢᓂ. 

ᐃᐊᑕᓐ ᑰᕆ ᐃᓅᓪᓗᓂ ᑲᑭᓂᓕᐅᖅᑎ ᐊᒻᒪ ᑎᑎᕋᖅᑎᐅᓪᓗᓂ ᐃᖃᓗᒃᑑᑦᑎᐊᕐᒥᑦ (ᐃᖃᓗᒃᑑᑦᑎᐊᖅ), ᓄᓇᕗᒻᒥ, ᒫᓐᓇ ᓄᓇᖃᖅᑐᖅ ᐋᓪᒑᓐᑯᐃᓐᒥ ᐋᑐᕚᒥ, ᐋᓐᑎᐅᕆᐅᒥ. ᐊᒡᒐᒧᑦ ᑲᑭᓂᓕᐅᖅᑎᐅᓪᓗᓂ, ᖃᕋᓴᐅᔭᒃᑯᑦ ᑎᑎᖅᑐᒐᖅᑎᐅᓪᓗᓂ ᐅᖃᓗᕋᐅᔭᖅᑎᐅᓪᓗᓂᓗ, ᖃᐅᔨᓴᖅᐸᒃᖢᓂ ᐃᓄᖕᓂᒃ ᐊᔾᔨᐅᙱᑦᑐᓂᒃ, ᐃᓚᒌᓄᑦ ᐃᓱᒪᒃᑯᓪᓗ ᖃᓄᐃᙱᑦᑎᐊᕋᓱᐊᕐᓂᕐᒧᑦ. 

ᐊᒃᓴᓕᖏᐊᖅ (ᔫ ᐅᓱᑲᓐᓄᐊᖅ) ᐃᖃᓗᒃᑑᑦᑎᐊᕐᒥᙶᖅᓯᒪᔪᖅ, ᓄᓇᕗᒻᒥᑦ. ᐃᓕᓐᓂᐊᖅᑐᖅ ᓯᓚᑦᑐᖅᓴᕐᕕᒡᔪᐊᕐᒥ ᕼᐊᓕᕚᒃ, ᓅᕙᓯᑰᑎᐊᒥ. ᐱᓕᕆᐊᕆᓵᖅᓯᒪᔭᖓ ᖃᓄᖅ ᐱᓕᐊᖅᑲ / ᑎᒥᒃᑯᑦ ᓴᖅᑭᑕᐅᓯᒪᔪᑦ ᑕᑯᔭᒐᖃᕐᕕᖕᒥ ᓴᖅᑭᔮᖅᑎᑕᐅᔪᑦ ᑲᑭᓃᑦ ᒥᒃᓵᓄᑦ ᑎᓴᒪᐅᓪᓗᑎᒃ ᐊᒥᐊᖅᓯᒪᔭᖏᑦ. ᐃᓕᓐᓂᐊᖅᑎᑕᐅᓪᓗᑎᒃ ᔮᔅᓕᓐ ᐱᕈᐃᓐᒧᑦ, ᑲᑭᓃᑦ / ᓯᕗᓂᒡᓯᔪᑕᑦ ᐅᐃᓂᐹᒡᒥ ᓴᓈᓄᑦ ᑕᑯᔭᒐᖃᕐᕕᖕᒥ-ᖃᐅᒪᔪᕐᒥ, ᑕᑯᒃᓴᐅᑎᑦᑎᓪᓗᑎᒃ ᐃᓄᐃᑦ ᓴᓇᙳᐊᖅᑎᖏᓐᓂᒃ ᑕᑯᒃᓴᐅᑎᑦᑎᔪᓂᒃ ᐃᓄᖕᓂᒃ ᑲᑭᓂᕐᓂᒃ.

ᐃᓚᖓ ᑖᔅᓱᒪ ᓴᖅᑭᔮᖅᑎᑕᐅᔫᑉ ᓴᖅᑭᑕᐅᕐᖓᓚᐅᖅᑐᖅ ᐅᐱᕐᖔᖓᓂ 2023-ᒥ ᐃᓄᐃᑦ ᓴᓇᐅᒐᖏᓐᓂᒃ ᐅᖃᓕᒫᒐᕐᒥ.

ᐊᓯᔾᔨᖅᐸᓪᓕᐊᔪᑦ ᐃᓄᐃᑦ ᑲᑭᓂᓕᐅᖅᐸᖕᓂᖏᑦ

ᑖᒃᑯᐊ ᐅᖃᓕᒫᒐᐃᑦ ᐊᔪᕐᓇᙱᑎᑕᐅᓚᐅᖅᑐᑦ ᐃᑲᔪᖅᑐᖅᑕᐅᓪᓗᑎᒃ ᑲᓇᑕᒥ ᑲᑎᒪᔨᖏᓐᓄᑦ ᓴᓇᙳᐊᕐᓂᕐᒧᑦ.