ᖃᓪᓗᓈᑎᑐᑦ
ᐅᑭᐅᑦ 15 ᐊᓂᒍᖅᓯᒪᓕᖅᐳᑦ ᐃᓄᐃᑦ ᑐᓐᓂᓕᐅᕈᓯᖏᓐᓂᒃ ᐱᑕᖃᓕᖅᑎᓪᓗᒍ ᑕᐃᒪᓐᓇᑐᑦ ᐊᔾᔨᓕᐅᖅᑕᐅᖃᑦᑕᓕᖅᑐᑎᑐᑦ ᑖᔅᓱᒧᖓ ᐊᓕᑎᐊ ᐊᕐᓇᖅᑯᖅ-ᐸᕆᐊᓪ ᑐᓐᓃᑦ: ᐅᑎᖅᑎᑦᑎᓇᓱᓕᖅᑎᓪᓗᒋᑦ ᐃᓄᐃᑦ ᑐᓐᓂᓕᐅᕈᓯᖏᓐᓂᒃ (2011), ᑕᐃᒪᓐᓇᑐᑦ ᐱᒻᒪᕆᐅᔪᑎᑐᑦ ᐃᓄᐃᑦ ᑐᓐᓂᓕᐅᕈᓯᖏᓐᓂᒃ ᓴᖅᑭᑎᑦᑎᒃᑲᓐᓂᕋᓱᖕᓂᕐᒥᒃ ᑖᔅᓱᒧᖓ ᐱᓕᕆᐊᖑᓪᓗᓂ ᕼᐅᕙᒃ ᔮᓐᔅᑕᓐᒧᑦ, ᐊᒻᒪᓗ ᐃᓕᓐᓂᐊᖅᑎᑕᐅᓪᓗᑎᒃ ᑲᑎᒪᓪᓗᑎᒃ ᐃᓄᐃᑦ ᑐᓐᓂᓕᐅᕈᓯᖏᓐᓂᒃ.
ᐃᓄᐃᑦ ᓴᓇᐅᒐᓕᕆᔨᒃᑯᓐᓂᑦ ᑎᑎᕋᖅᑕᐅᓯᒪᔪᓂᒃ ᐋᖅᑭᒃᓱᐃᔨᓄᑦ ᐃᓚᒋᔭᐅᔪᖅ ᓇᐸᑦᓯ ᕗᐊᕐᔪ ᐃᒃᓯᕚᖃᑎᖃᓚᐅᖅᑐᖅ ᒫᔭ ᓯᐊᓗᒃ ᔭᐃᑯᑉᓴᓐᒥᒃ ᐊᒻᒪᓗ ᑯᕆᔅᑕ ᐅᓗᔪᒃ ᔭᕙᑦᔅᑭᒥᒃ, ᖃᓄᖅ ᐃᓱᒪᖕᒪᖔᑕ ᓈᓚᒃᖢᓂᒋᑦ ᐱᔾᔪᑎᓕᖕᓂᒃ ᐊᔪᕐᓇᕈᔪᒃᑐᓂᒃ ᐱᑕᖃᓕᖅᐸᓪᓕᐊᔪᓂᒃ ᐱᓕᕆᐊᖑᔪᓂᒃ. ᔭᐃᑯᑉᓴᓐ ᑐᓐᓂᓕᖅᓱᐃᓲᖅ ᐊᒻᒪᓗ ᐃᓕᓐᓂᐊᖅᑎᑦᑎᕙᒃᖢᓂ ᑐᓐᓂᓕᖅᓱᐃᓂᕐᒥᒃ ᐃᓄᐃᑦ ᓄᓇᖓᓐᓂ, ᐊᒻᒪᓗ ᔭᕙᑦᔅᑭ, ᐃᓕᖅᑯᓯᓕᕆᔨᐅᔪᖅ ᐊᒻᒪᓗ ᑲᒪᔨᐅᓪᓗᓂ ᑕᑯᔭᒐᖃᕐᕕᖕᒥ ᐃᓕᓐᓂᐊᖅᑐᖅ ᐃᓄᐃᑦ ᑐᓐᓂᓕᐅᕈᓯᖏᓐᓂᒃ ᐊᒻᒪᓗ ᒥᖅᓱᕈᓯᖏᓐᓂᒃ, ᐅᖃᓪᓚᖃᑕᐅᓚᐅᖅᑐᖅ ᐃᑦᑕᕐᓂᓴᕐᓂᒃ ᑐᓐᓂᕐᓂᒃ (ᑮᓇᕐᒧᑦ ᑐᓐᓂᓕᐅᕈᓰᑦ) ᐊᒻᒪᓗ ᑲᑭᓂᕐᓂᒃ (ᑎᒥᒧᑦ ᑲᑭᓃᖅ), ᐊᑐᓚᐅᖅᑕᖏᓐᓂᒃ ᐊᒻᒪᓗ ᖃᐅᔨᓴᕐᓂᒃᑯᑦ ᖃᐅᔨᓚᐅᖅᑕᖏᓐᓂᒃ. ᑖᓐᓇ ᐅᓂᒃᑲᐅᓯᖃᖅᑐᖅ ᑐᓴᕈᒥᓇᖅᑐᓂᑦ ᐅᖃᐅᓯᖃᖅᖢᓂᓗ ᐊᑐᖅᑕᐅᕙᒃᑐᓂᑦ, ᐊᔾᔨᒌᖏᓐᓂᖏᓪᓗ ᐊᑯᑭᑦᑐᒥᐅᑦ ᑲᓇᑕᒥᐅᓪᓗ ᐃᓄᖏᑦᑕ ᓯᕗᓂᕕᓂᖏᓐᓂᑦ ᐊᒻᒪᓗ ᖃᓪᓗᓇᖃᓕᖅᑎᓪᓗᒍ ᖃᓄᖅ ᐊᒃᑐᓂᖃᓚᐅᓂᖓᓂᑦ ᑲᑭᓂᓕᕆᓂᕐᒧᑦ.
ᐃᓄᐃᑦ ᓴᓇᐅᒐᓕᕆᔩᑦ: ᐃᓕᔅᓯᒃ ᒪᕐᕉᓗᓯᒃ ᐃᒃᐱᒋᔭᐅᑦᑎᐊᖅᑐᒥᒃ ᓂᐱᒋᔭᐅᕗᓯᒃ ᐅᖃᓪᓚᖃᑎᖃᖅᑎᓪᓗᓯ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᓂᒃ ᑐᓐᓂᓕᐅᕈᓯᖏᓐᓂᒃ ᐅᓪᓗᒥᐅᔪᖅ. ᖃᓄᕐᓕ ᐃᓕᓐᓂᐊᕈᒪᓕᓚᐅᖅᓯᒪᕕᓯᒃ ᐱᐅᓯᑐᖃᕆᔭᐅᔪᓂᒃ ᑐᓐᓂᓕᐅᕐᓂᕐᒥᒃ?
ᑯᕆᔅᑕ ᐅᓗᔪᒃ ᔭᕙᑦᔅᑭ: ᐱᕈᖅᐸᓪᓕᐊᑎᓪᓗᖓ ᐃᒡᓗᓕᒑᕐᔪᖕᒥ, ᓄᓇᕗᒻᒥ, ᐱᐅᒌᓐᓇᐅᔭᓚᐅᖅᓯᒪᔭᕋ, ᑭᓯᐊᓂᓕ ᓇᓗᓇᐃᓐᓇᐅᔭᓚᐅᖅᑐᖅ. ᓯᓚᑦᑐᖅᓴᕐᕕᒡᔪᐊᕐᒥ, ᐃᑦᑕᕐᓂᑕᓕᕆᓂᕐᒥᒃ ᐃᓕᓐᓂᐊᖃᑎᒋᔭᕋ ᐅᖃᓚᐅᖅᑐᖅ ᐊᒥᓱᐃᒡᒎᖅ ᓴᓇᔭᐅᓯᒪᔪᑦ ᓴᓇᕐᕈᑎᓂᒃ ᐱᔾᔪᑎᓖᑦ ᑐᓐᓂᓕᖅᓱᐃᓂᕐᒧᑦ ᐊᑐᖅᑕᐅᔪᓐᓇᖅᑐᒃᓴᐅᔪᑦ. ᖃᐅᔨᓴᒃᑲᓐᓂᓕᓚᐅᖅᐳᖓ ᖃᓄᖅ ᑐᓐᓂᓕᖅᓱᐃᓪᓗᓂ ᐊᑐᖅᑕᐅᖃᑦᑕᖅᑐᓂᒃ, ᓱᖓᐅᔭᓕᕆᓂᕐᒧᓪᓗ, ᐊᓐᓄᕋᔾᔨᐅᕐᓂᕐᒧᓪᓗ ᐊᒻᒪᓗ ᒥᖅᓱᕐᓂᕐᒧᑦ. ᐊᑯᓂᐊᓗᒃ ᖃᐅᔨᓴᓚᐅᖅᐳᖓ ᖃᐅᔨᒪᓂᖃᑦᑎᐊᕈᒪᓪᓗᖓ. ᐊᑐᓗᐊᖃᑦᑕᓚᐅᕋᒪ ᑐᖅᑯᖅᑕᐅᓯᒪᔪᓂᒃ ᖃᐅᔨᓴᕈᑎᓂᒃ, ᓴᓇᐅᒐᓂᒃ ᐊᔾᔨᓕᐅᖅᓯᒪᔪᓂᒃ ᐊᒻᒪᓗ ᐃᓕᖅᑯᓯᑐᖃᕆᔭᐅᔪᓂᒃ.
ᒪᔭ ᓯᐊᓗᒃ ᔭᐃᑯᑉᓴᓐ: ᑲᑭᓕᖅᓱᐃᓐᓇᖃᑕᓚᐅᖅᐳᖓᓕ ᖃᓪᓗᓈᑦ ᐱᐅᓯᖏᑦᑎᑐᑦ. ᖃᐅᔨᒪᒐᓗᐊᖅᐳᖓ ᑐᓐᓂᓕᖅᓱᐃᓂᕐᒥᒃ ᐱᐅᓯᑐᖃᖃᕋᑦᑕ, ᑭᓯᐊᓂ ᖃᐅᔨᒪᖏᓐᓇᒪ ᑐᓐᓂᓕᖅᓱᐃᓂᕐᒥᒃ. ᑕᒫᓂᓕ ᑲᓛᖦᖠᑦ ᓄᓈᓐᓂᒥᐅᑦ ᐅᐊᖕᓇᖓᓂ, ᑐᓐᓂᓕᖅᓱᐃᖃᑦᑕᕈᓐᓃᓚᐅᖅᓯᒪᕗᒍᑦ ᐅᑭᐅᑦ 250 ᐊᓂᒍᖅᓯᒪᓕᖅᑐᑦ. ᐃᓚᑦᑎᓐᓂᓗ ᐊᐱᖅᓱᕈᓐᓇᖏᖦᖢᑕ ᖃᐅᔨᒪᔪᓂᒃ. ᑕᐃᒪᓕ ᑕᒪᒃᑯᓂᖓ ᐊᑐᓗᐊᓕᓚᐅᖅᐳᖓ ᑎᑎᖃᓂᒃ ᐃᓕᖅᑯᓯᑐᖃᕆᔭᐅᔪᕕᓂᕐᓂᒃ, ᐃᑦᑕᕐᓂᑕᑐᖃᕐᓂᒃ ᐊᒻᒪᓗ ᐃᓕᖅᑯᓯᑐᖃᕐᓂᒃ.
ᐅᑭᐅᑦ 12 ᐊᓂᒍᖅᓯᒪᓕᖅᑎᓪᓗᒋᑦ ᐱᓕᕆᓗᐊᕈᓐᓃᓕᓚᐅᖅᐳᖓ ᖃᓪᓗᓈᑦ ᑲᑭᓕᖅᓱᐃᓂᕆᔭᖏᓐᓂᒃ ᐱᔾᔪᑎᒋᓪᓗᒍ ᑐᐃᒃᑯᑦ ᐋᓐᓂᖅᓯᒪᓂᓐᓄᑦ ᐊᒻᒪᓗ ᑕᐃᒪ ᐅᖃᓕᒫᓕᓚᐅᖅᐳᖓ ᐃᓄᐃᑦ ᑐᓐᓂᓕᐅᕈᓯᖏᓐᓂᒃ. ᖃᐅᔨᔪᒪᒻᒪᕆᓕᓚᐅᖅᐳᖓ. ᑕᐃᒪᓕ ᖃᐅᔨᔭᕌᖓᒪ, ᖁᓕᓂᒃ ᐊᐱᖅᑯᑎᒃᓴᖃᓕᓚᐅᖅᐳᖓ, ᐊᒻᒪᓗ ᓄᖅᑲᕈᓐᓇᐃᓪᓕᓪᓗᖓ. ᑕᐃᒪᓕ ᐃᓄᖕᓂᒃ ᐅᖃᓪᓚᖃᑎᖃᖃᑦᑕᓕᓚᐅᖅᐳᖓ ᑲᓇᑕᒥᐅᓂᒃ ᐊᒻᒪᓗ ᐊᓛᔅᑲᒥᐅᓂᒃ, ᖃᐅᔨᓕᓚᐅᖅᐳᖓ ᓄᓇᖃᖅᑳᖅᓯᒪᔪᓂᒃ ᖃᐅᔨᓴᕐᓂᖃᕈᒪᒍᑦᑕ ᖃᐅᔨᓴᕈᑕᐅᕙᒃᑐᓂᒃ, ᖃᐅᔨᒪᔭᕆᐊᖃᖅᐳᒍᑦ ᓇᖕᒥᓂᖅ ᐱᔪᓐᓇᕐᓂᖃᒻᒪᕆᖏᓐᓇᑦᑕ ᐊᒻᒪᓗ ᑕᒪᒃᑯᐊ ᐃᓄᐃᑦ ᖃᐅᔨᓴᖅᑕᕗᑦ, ᐊᒻᒪᓗᑦᑕᐅᖅ ᑕᒪᒃᑯᐊ ᐊᑐᖅᑕᕗᑦ ᐱᓕᕆᔾᔪᑏᑦ.
ᑭᓱᒥᒡᓕ ᐱᔾᔪᑎᖃᖅᐱᑕ, ᐅᑭᐅᖅᑕᖅᑐᒥᑐᐊᖑᖏᑦᑐᖅ, ᑭᓯᐊᓂᓕᑦᑕᐅᖅ ᓄᓇᕐᔪᐊᓕᒫᒥ, ᑕᒪᒃᑯᐊ ᐅᒃᐱᕐᓂᓕᕆᔩᑦ ᑎᑭᓚᐅᖅᑎᓪᓗᒋᑦ ᐅᑭᐅᑦ 50 ᐊᓂᒍᖅᓯᒪᓕᖅᑎᓪᓗᒋᑦ ᑕᒪᓐᓇ ᑐᓐᓂᓕᖅᓱᐃᓂᖅ ᐱᑕᖃᕈᓐᓃᓕᓚᐅᖅᓯᒪᕗᖅ. ᐅᑭᐅᓂᒃ 50-ᓂᒃ ᐊᑐᕈᓐᓃᖅᑎᑦᑎᓯᒪᕗᑦ ᐅᖃᐅᓯᑐᖃᑦᑎᓐᓂᒃ ᐊᒻᒪᓗ ᐃᖅᑲᐅᒪᖃᑦᑕᖅᑕᑦᑎᓐᓂᒃ ᐃᓕᖅᑯᓯᑐᖃᕐᓂᒃ ᑭᖑᕚᑦᑎᓐᓄᑦ.
ᑕᐃᒪᓕ ᐊᒥᓱᓂᒃ ᑲᑎᖅᓱᐃᓚᐅᖅᑎᓪᓗᖓ ᐊᔾᔨᙳᐊᓂᒃ ᑮᓇᕐᒥᒍᑦ ᑐᓐᓂᓕᖅᓱᖅᓯᒪᔪᓂᒃ, ᐃᓕᓚᐅᖅᐸᒃᑲ ᓇᑎᕐᒧᑦ ᓲᕐᓗ ᓄᓇᖑᐊᓕᐅᖅᓯᒪᓪᓗᒋᑦ ᐃᓄᐃᑦ ᓄᓇᖓᓐᓂᒃ ᑕᑯᓕᖅᖢᖓᓗ ᐃᓄᐃᑦ ᐃᖏᕐᕋᖃᑦᑕᕐᓂᖏᓐᓂᒃ, ᐊᒻᒪᓗ ᑭᓱᑐᐃᓐᓇᑦ ᐊᓯᔾᔨᖅᐸᓪᓕᐊᓕᖅᖢᑎᒃ, ᑭᓯᐊᓂᓕ ᖃᐅᔨᒪᖏᑦᑐᖓ ᖃᓄᐃᒻᒪᑦ ᑕᐃᒪᐃᓐᓂᖏᓐᓂᒃ. ᑐᑭᓯᓕᓚᐅᖅᐳᖓ ᐅᒃᐱᕐᓂᕐᒧᑦ ᑕᐃᒪᐃᑎᑕᐅᓇᓱᒋᓪᓗᒍ, ᐱᔾᔪᑎᒋᓪᓗᒍ ᑕᒪᓐᓇ ᐃᖏᕐᕋᕕᒋᕙᓚᐅᖅᑕᖏᑦ ᐃᓄᐃᑦ ᖃᐅᔨᒪᑎᑦᑎᖕᒪᑕ ᐱᒻᒪᕆᐊᓘᓂᖏᓐᓂᒃ. ᑐᑭᓯᓕᓚᐅᕆᕗᖓ ᖃᓄᖅ ᓄᓇ ᐊᒻᒪᓗ ᐊᖑᓇᓱᒡᕕᐅᖃᑦᑕᖅᑐᑦ ᐊᔾᔨᒌᖏᑦᑐᓃᑦᑐᑦ ᓄᓇᓂᒃ ᐊᒃᑐᐊᓂᖃᐅᕐᒪᑕ ᖃᓄᑐᐃᓐᓇᖅ ᐋᖅᑭᒃᓯᒪᓂᐅᔪᓂᒃ. ᑕᑯᓕᖅᖢᖓᓗ ᓄᓇᙳᐊᕐᒥᒃ ᐃᓕᓚᐅᖅᑕᓐᓂᒃ ᐅᓪᓗᓂᒃ ᐱᖓᓱᑦ ᐊᓂᒍᖅᓯᒪᓕᖅᑎᓪᓗᒋᑦ ᐊᒻᒪᓗ ᑕᐃᒪ ᐃᒪᓐᓇ ᐅᖃᓚᐅᖅᐳᖓ, “ᑐᙵᓱᒋᑦ ᑕᐃᒪᙵᓕᒫᖅ ᐃᓄᓯᕆᔭᕐᓄᑦ.”
ᐊᔾᔨᙳᐊᖅ ᒥᐊᓕ ᐃᔨᑐᐊᖅ, ᓵᓕ ᑲᒻᓯᐅᓪ ᐃᖅᑭᓕᑦ ᐋᓐᓂᐊᕐᕕᖓᓐᓂ, ᐃᑦᒪᓐᑕᓐ, 1958ᐊᔾᔨᓕᐅᖅᓯᔪᖅ ᐅᖃᓕᒫᒐᖃᕐᕕᒃ ᑐᖅᑯᖅᑕᐅᓯᒪᔪᓕᕆᔨᓪᓗ ᑲᓇᑕᒥ/ᑲᓇᑕᒥ ᑕᕐᕆᔮᒃᓴᓕᕆᔨᒃᑯᑦ ᑲᑎᒪᔨᖏᑦ / E011176882 ᐊᔾᔨᙳᐊᖅ ᒑᕐ ᓘᓂ ᑕᒪᕐᒥᒃ © ᓴᓇᙳᐊᖅᑎᑦ
ᐃᓄᐃᑦ ᓴᓇᐅᒐᓕᕆᔨᒃᑯᑦ: ᖃᓄᕐᓕ ᐃᓚᑎᑦ ᐊᒻᒪᓗ ᓄᓇᖅᑲᑎᑎᑦ ᖃᓄᐃᓕᓚᐅᖅᐸᑦ ᑐᓐᓂᖃᓕᕐᓂᕐᓄᑦ ᓯᕗᓪᓕᖅᐹᒥᒃ ᑐᓐᓂᖅᑖᓵᖅᑎᓪᓗᑎᑦ?
ᑯᕆᔅᑕ ᐅᓗᔪᖅ ᔭᕙᑦᔅᑭ: ᐊᒥᓱᐊᓗᖕᓂᒃ ᐃᓄᖕᓂᒃ ᕿᓂᓚᐅᖅᑐᑦ ᐊᔪᕆᖅᓱᐃᔾᔨᓂᕐᒥᒃ ᐅᕙᓐᓄᑦ ᐊᐱᕆᔪᓂᒃ, ᐱᓗᐊᖅᑐᒥᒡᓕ ᐃᓚᓐᓂᒃ. ᓄᐊᑯᓗᒃᑲ ᐊᐱᕇᓐᓇᓕᓚᐅᖅᑐᑦ ᐊᐱᖅᑯᑎᓂᒃ ᐊᒥᓱᓂᒃ. ᐆᒻᒪᑎᒃᑯᑦ ᓲᕐᓗ ᐆᓇᖅᓯᓕᓚᐅᖅᐳᖅ, ᐱᔾᔪᑎᒋᓪᓗᒍ ᐃᑲᔪᕐᓂᖃᓕᓚᐅᕋᒪᑦ ᐃᓚᓐᓂᒃ ᐱᐅᓯᑐᖃᕕᓂᕐᒥᒃ ᐃᓚᓐᓄᑦ. ᐃᓚᒋᔭᖓ ᐱᔾᔪᑕᐅᔫᑉ ᖁᒃᓴᓪᓚᖕᓇᓗᐊᖏᑦᑐᖅ ᓄᓇᖅᑲᑎᓐᓄᑦ ᐱᔾᔪᑕᐅᑐᐃᓐᓇᕆᐊᓕᒡᓕ ᑕᒫᓂ ᑎᒥᒥᑦ “ᓈᒻᒪᒃᑐᒦᑎᓐᓇᒃᑭᑦ”; ᑮᓇᓐᓂᓪᓕ ᐱᑕᖃᖏᑦᑐᖅ ᐅᕙᓘᓐᓃᑦ ᖁᖓᓯᓐᓂ ᐅᕙᓘᓐᓃᑦ ᓴᒡᕕᓐᓂ. ᑭᓯᐊᓂᓕ ᖃᐅᔨᒪᔪᖓᓕ ᐃᓄᐃᑦ ᑐᓐᓂᓕᖅᓱᖅᓯᒪᔪᑦ ᑕᒫᓂ “ᐱᔭᕆᐊᖃᙱᑦᑐ”-ᒦᑦᑐᑦ ᑕᐃᒪᓐᓇᑐᑦ ᐅᖃᖅᑕᐅᓯᒪᔪᑦ ᖃᓪᓗᓈᑦ ᑎᑭᓯᒪᓕᖅᑎᓪᓗᒋᑦ.
ᒪᔭ ᓯᐊᓗᒃ ᔭᐃᑯᑉᓴᓐ: ᑮᓇᒃᑯᑦ ᑐᓐᓂᓕᖅᑕᐅᑎᓪᓗᖓ, ᑐᓐᓂᓕᖅᑕᐅᓯᒪᓪᓚᕆᓕᓚᐅᖅᐳᖓ, ᐊᒻᒪᓗ ᑕᐃᒪᓐᓇᑐᑦ ᖃᓪᓗᓈᑦ ᑐᓐᓂᓕᖅᓱᖃᑦᑕᖅᑕᖏᑦᑎᑐᑦ ᐃᓚᒋᔭᐅᓕᖅᖢᓂ. ᐊᖏᕐᕋᒻᒪᕆᓐᓂᓪᓕ ᑲᓛᖦᖠᑦ ᓄᓇᖓᓐᓂ ᑕᒪᒃᑯᐊ ᑐᓐᓂᓕᖅᓱᐃᓂᖅ ᐃᓚᒋᔭᐅᓚᐅᖅᓯᒪᕗᑦ ᖃᓪᓗᓈᑦ ᑎᑭᑎᓪᓗᒋᑦ ᐊᑐᖅᑕᐅᔪᓐᓃᓕᓚᐅᖅᓯᒪᖕᒪᑕ. ᒐᕙᒪᓕᕆᓂᕐᒧᑦ ᐊᑐᖁᔭᐅᔪᓐᓃᓕᓚᐅᖅᓯᒪᖕᒪᑕ ᐊᒻᒪᓗ ᐃᓄᐃᑦ ᐅᖃᖅᐸᓕᖅᖢᑎᒃ ᐱᔾᔪᑎᖃᖅᑐᒃᓴᐅᒐᕕᑦ ᐊᒻᒪᓗ ᐃᓱᒪᒋᔭᖃᖅᑐᒃᓴᐅᒐᕕᑦ ᑕᐃᒪᓕ ᑐᓐᓂᖃᓕᖅᐳᑎᑦ, ᐅᕙᓐᓄᓪᓕ ᑕᐃᒪᓐᓇ ᐃᓱᒪᖏᑦᑎᐊᖅᑐᖓ.
ᑕᐃᒪᓕ ᐃᓄᐃᑦ ᑐᓐᓂᓕᖅᓱᖅᑕᐅᒑᖓᒥᒃ ᐃᓚᒋᔭᖏᑦ ᐊᒃᓱᐊᓗᒃ ᖁᕕᐊᓱᖃᑦᑕᖅᑐᑦ ᑐᓐᓂᓕᖅᓱᖅᑕᐅᑦᑎᐊᕌᖓᒥᒃ ᓄᓇᖓᓐᓂᕐᒥᐅᑎᑐᑦ ᐱᓯᒪᔭᐅᓪᓗᑎᒃ. ᑭᓯᐊᓂᓕ ᐋᖅᑭᒃᓱᐃᒑᖓᑕ ᐃᒻᒥᓂᒃ ᑐᓐᓂᓕᖅᓱᕐᓂᐊᖅᑕᒥᓂᒃ, ᐃᔾᔪᐊᖅᓯᓪᓗᑎᒃ ᑐᓐᓂᓕᖅᓱᕈᑎᓪᓚᕆᖕᓂᒃ, ᑕᑯᓕᓚᐅᖅᐳᖓᓕ ᓲᕐᓗ ᐅᑎᖅᑎᓯᒪᓕᖅᑐᓂᒃ. ᑕᐃᒪᓕ ᖃᓪᓗᓈᖃᓕᖅᑎᓪᓗᒍ ᑕᒪᒃᑯᐊ ᑐᓐᓂᓕᖅᓱᕈᑕᐅᕙᒃᑐᑦ ᐊᓯᔾᔨᕈᑕᐅᓕᓚᐅᕆᕗᑦ. ᑕᒪᒃᑯᐊᓕ ᑕᓪᓗᒃᑯᑦ ᑐᓐᓂᓕᖅᓱᕈᑕᐅᕙᒃᑐᑦ ᐱᔭᐅᓯᒪᖏᑦᑐᑦ ᐊᑐᓕᖅᑕᐅᓯᒪᖏᑦᑐᑦ; ᐃᓱᒪᔪᖓᓕ ᖃᓪᓗᓈᑦ ᐱᐅᓇᓱᖕᓂᖏᑦᑎᒍᑦ ᐱᓇᓱᒋᔭᒃᑲ.
ᑯᕆᔅᑕ ᐅᓗᔪᖅ ᔭᕙᑦᔅᑭ: ᑕᒪᒃᑯᐊᓕ ᐱᐅᒻᒪᕆᒃᑐᑦ ᐅᖃᐅᓯᐅᔪᑦ ᐱᔾᔪᑎᒋᓪᓗᒋᑦ ᖃᓪᓗᓈᖅᑕᖃᓕᖅᑎᓪᓗᒍ ᐊᓯᔾᔨᕈᑕᐅᓯᒪᓕᕐᓂᖏᓐᓂᒃ ᐊᒻᒪᓗ ᐊᑐᕈᑕᐅᓕᖅᖢᓂ ᐆᒻᒪᖅᑎᑦᑎᒃᑲᓐᓂᕐᓂᕐᒥᒃ ᐅᓪᓗᒥᐅᔪᒧᑦ ᐱᔾᔪᑕᐅᓪᓗᓂ.
ᒪᔭ ᓯᐊᓗᒃ ᔭᐃᑯᑉᓴᓐ: ᖃᐅᔨᓴᕐᓂᒃᑯᓪᓕ, ᐅᖃᕈᓐᓇᖅᐳᖓ ᐆᒻᒪᖅᑎᑦᑎᒃᑲᓐᓂᕈᑕᐅᖏᑦᑐᖅ, ᐊᑐᓕᖅᑎᑕᐅᒃᑲᓐᓂᕐᓂᕐᒥᒡᓕ ᐃᓱᒪᒋᔭᕋ. ᑐᐊᕕᓗᐊᕋᓱᒋᔭᕋᓕ ᐆᒻᒪᖅᑎᑦᑎᒃᑲᓐᓂᕐᓂᕐᒥᒃ ᑕᐃᔭᐅᓪᓗᓂ ᐱᔾᔪᑎᒋᓪᓗᒍ ᐊᑯᓂᐸᓗᒃ ᐱᓇᓱᓲᖑᖕᒪᑕ ᐅᒃᐱᕐᓂᒃᑯᑦ ᐆᒻᒪᖅᑎᑦᑎᒃᑲᓐᓂᕐᒥᒃ ᐊᒻᒪᓗ ᐊᓯᔾᔨᖅᑎᑦᑎᓪᓗᓂ ᐃᓱᒪᒋᔭᕐᓂᒃ ᑕᒪᒃᑯᓂᖓ ᖃᓪᓗᓈᑦ ᐱᐅᓇᓱᐊᕐᓂᖏᓐᓂᒃ ᐱᔾᔪᑎᒋᓪᓗᒍ, ᐊᒻᒪᓗ ᐃᓕᓐᓇᓱᒡᓗᓂ ᐱᓪᓚᑦᑖᕐᓗᓂ ᐃᓄᐃᑦ ᑮᓇᖏᑦ ᐱᐅᓂᖏᓐᓂᒃ. ᓱᓕᓯᒪᑦᑎᐊᕆᐊᖃᖅᐳᒍᓪᓕ ᐱᔾᔪᑎᒋᓪᓗᒍ ᑭᓇᑐᐃᓐᓇᖅ ᐱᔪᒪᔪᒃᓴᐅᓂᖓᓂᒃ ᐊᑐᓕᖅᑎᑕᐅᒃᑲᓐᓂᕐᓂᕐᒥᒃ ᐱᐅᒃᓴᕋᓱᒋᓪᓗᒍ ᐱᒻᒪᕆᐅᔪᓂᒃ ᐊᑐᖅᑕᐅᖃᑦᑕᓚᐅᖅᓯᒪᔪᓂᒃ ᐊᒻᒪᓗ ᑭᓱᑐᐃᓐᓇᐃᑦ ᑖᔅᓱᒧᖓ ᐃᓚᒋᔭᐅᓪᓗᑎᒃ.
ᓇᓃᑉᐸᓪᓕ ᒪᓕᒐᕆᔭᐅᔪᑦ ᑕᒪᒃᑯᓄᖓ ᑐᓐᓂᓕᖅᓱᐃᓂᕐᒥᒃ ᐊᒻᒪᓗ ᐱᔪᓐᓇᖅᐱᒍᑦ ᓱᖏᐅᑎᓗᒋᑦ ᒫᓐᓇᐅᓕᖅᑐᒨᑦ ᐃᓅᓯᕆᔭᑦᑎᓐᓅᑦ? ᑕᒫᓃᑦᑐᓐᓃᖅᑐᑦ, ᑕᐃᒪᓕ ᑭᒃᑯᑐᐃᓐᓇᑦ ᐱᓇᓱᓕᕐᒪᑕ ᐃᒃᐱᒋᔭᖏᓐᓂᒃ ᓈᒻᒪᖕᓂᖏᓐᓂᒃ ᐃᓱᒪᖏᖦᖢᑎᒃ ᐃᓚᒋᔭᒥᓂᒃ. ᑕᕝᕘᓇᓕ ᐊᑲᐅᒋᖏᑦᑎᐊᖅᑕᕋ ᐅᑭᐅᓂᒃ 12-ᓂᒃ ᐱᓕᕆᐊᕆᖃᑦᑕᓕᖅᖢᒍ: ᑭᙴᒪᓂᖃᖅᐱᑕᓕ ᐅᖃᐅᓯᐅᖃᑦᑕᓚᐅᖅᑐᓂᒃ ᐱᔾᔪᑎᖃᖅᖢᑕ ᐃᓅᖃᑎᒌᒃᖢᑕ ᐋᖅᑭᒃᓱᐃᓂᕐᒥᒃ ᑐᓐᓂᓕᖅᓱᐃᓂᕐᒦᒃ? ᐱᖁᔭᐅᓯᒪᕕᑕ ᓲᕐᓗ ᐅᑎᖅᑎᖁᔭᐅᓪᓗᑕ ᑕᒪᒃᑯᓂᖓ? ᖃᓄᐃᒃᑲᔭᖅᐸᓕ ᐆᒃᑐᕈᑕᐅᕙᒃᑐᒥᒃ ᐊᑐᕐᓂᐊᖅᖢᑕ? ᓱᕋᒃᑎᕆᓕᖅᐱᑕᓕ ᓴᓇᒃᑲᓐᓂᓕᖅᑎᓪᓗᑎᒎᑦ?
ᐊᔾᔨᙳᐊᖅ ᕼᐊᓚᓐ ᖃᓪᕙᒃ ᐅᓗᒃᓴᖅᑑᖅ, 1977ᓄᓇᑦᓯᐊᕐᒥ ᑐᖅᑯᖅᑕᐅᓯᒪᔪᑦ / Hᐊᓄᕆ ᕙᓯᒧᑦ ᑎᑭᓴᖅᑕᐅᔪᑦ / N-1979-052: 0955 ᐊᔾᔨᙳᐊᖅ ᑕᓴ ᒫᑭᓐᑖᔅ
ᐃᓄᐃᑦ ᓴᓇᐅᒐᓕᕆᔨᒃᑯᑦ: ᑕᒪᑐᒪᓂ ᐅᓪᓗᒥᐅᔪᖅ ᑐᓐᓂᓕᖅᓱᐃᖃᑦᑕᓕᖅᑎᓪᓗᑕ, ᐅᖃᓪᓚᖃᑎᒌᒍᑕᐅᖃᑦᑕᐃᓐᓇᓕᖅᐳᖅ ᐱᔾᔪᑎᖃᖅᖢᑎᒃ ᑐᑭᖓᓂᒃ ᖃᓄᑐᐃᓐᓇᖅ ᓴᓇᔭᐅᖃᑦᑕᓕᕐᓂᖏᓐᓂᒃ. ᖃᓄᕐᓕ ᐃᓱᒪᕕᑦ ᑕᒪᓐᓇ ᑐᑭᖓ ᐊᓯᔾᔨᖅᐸᓪᓕᐊᓂᖓᓂᒃ ᑕᒪᒃᑯᓄᖓ ᒪᒃᑯᒃᑐᓄᑦ ᐃᓄᖕᓄᑦ?
ᒪᔭ ᓯᐊᓗᒃ ᔭᐃᑯᑉᓴᓐ: ᐅᒃᐱᕈᓱᖕᓂᖅ ᐊᒻᒪᓗ ᐊᖑᓇᓱᖕᓂᖅ (ᐱᑕᖃᕈᓐᓃᖅᑐᑦ). ᑐᑭᖓ ᑐᑭᖃᖅᐳᖅ ᑭᓇᐅᓂᕐᒥᒃ. ᐊᔾᔨᒌᒃᑐᑦ ᑐᓐᓃᑦ ᑐᓐᓂᓕᖅᓱᖅᑕᐅᓯᒪᔪᑦ 20-ᐅᔪᓄᑦ ᐊᕐᓇᓄᑦ ᑐᑭᖃᖅᐳᖅ 20-ᐅᔪᓂᒃ ᐊᔾᔨᒌᖏᑦᑐᓂᒃ ᐱᔾᔪᓯᖃᖅᐳᖅ. ᑲᑎᓯᒪᔪᓄᑦ ᐱᔾᔪᑕᐅᔪᕕᓂᖅ, ᑕᐃᒪᓐᓇᑐᑦ ᑭᓱᑐᐃᓐᓇᕐᓂᒃ ᐊᔾᔨᒌᖏᑦᑐᓂᒃ ᐃᓅᓯᑦᑎᓐᓂ ᐱᖃᑦᑕᕋᑦᑕ. ᐅᖃᐅᓯᒃᑯᓪᓕ, ᐅᓂᒃᑳᓕᒫᑦ ᐱᔾᔪᑎᓖᑦ ᐃᓄᖕᓂᒃ ᐃᒻᒥᒃᑯᑐᐊᖅ ᐊᑐᕐᓂᖃᕋᓱᒃᑐᑦ ᑕᑯᒃᓴᐅᑎᑦᑎᕗᑦ ᖃᓄᖅ ᐊᑦᑕᓇᖅᑑᓂᖓᓂᒃ ᐃᓄᖕᓂᒃ ᐃᒻᒥᓂᑐᐊᖅ ᐃᓱᒪᒋᔪᓂᒃ. ᐃᒻᒥᒃᑰᓗᐊᖅᑐᑦ ᑕᐅᑐᖕᓂᖃᖅᐳᑦ ᓇᖕᒥᓂᖅ ᐊᑐᕐᓂᖃᖏᓗᐊᖅᖢᑎᒃ ᑕᒪᒃᑯᓂᖓ ᐱᐅᓯᑐᖃᕐᓂᒃ ᑐᓐᓂᓕᖅᓱᐃᓂᕐᒥᒃ.
ᑯᕆᔅᑕ ᐅᓗᔪᖅ ᔭᕙᑦᔅᑭ: ᐊᓈᓇᒐᓗ ᐅᖃᐅᓯᕆᖃᑦᑕᖅᑕᕗᒃ ᐃᓅᖃᑎᒌᑦᓯᐊᕐᓂᖅ ᐅᕙᓘᓐᓃᑦ ᑲᑐᔾᔨᖃᑎᒌᑦᓯᐊᕐᓂᖅ, ᐱᓕᕆᖃᑎᒌᒃᖢᓂ ᓄᓇᓕᖏᒥᐅᑦ ᐃᓅᔾᔪᑎᒃᓴᖏᓐᓄᑦ, ᐊᒻᒪᓗ ᐊᓈᓇᒐ ᐅᖃᑲᐅᑎᒋᖃᑦᑕᖅᑐᖅ ᐊᒥᓱᐊᓗᐃᒡᒎᑦ ᐃᓄᐃᑦ ᐅᓪᓗᒥᐅᔪᖅ ᑐᑭᓯᐅᒪᖏᒻᒪᑕ ᖃᓄᖅ ᐃᓅᔾᔪᑎᖃᕆᐊᖃᕐᒪᖔᑦᑕ ᐊᒻᒪᓗ ᓄᓇᓕᖕᒥᐅᑦ ᐱᖃᑎᒌᓗᒋᑦ ᐱᓕᕆᖃᑦᑕᓚᐅᖅᓯᒪᒐᑦᑕ ᐅᑭᐅᓂᒃ 50-ᓂᒃ. ᐃᓱᒪᖅᑳᕆᐊᖃᒻᒪᕆᒃᐳᑎᑦ ᓄᓇᓕᖕᒥᐅᑕᐅᖃᑎᖕᓂᒃ ᓯᕗᓪᓕᐹᒥᒃ, ᐱᓗᐊᖅᑐᒥᒃ ᒥᑭᓐᓂᖅᓴᐅᔪᓂᒃ ᐅᕙᓘᓐᓃᑦ ᐅᖓᓯᒃᑐᒥᐅᑕᕐᓂᒃ ᓄᓇᓕᖕᓂᒃ.
ᑐᖅᑯᖅᑕᐅᓯᒪᔪᓂᑦ ᐊᔾᔨᙳᐊᖅ ᐊᖑᓛᓕᒃ ᓄᓕᐊᖓ, ᑯᑉᑖᓇ, ᑎᒍᒥᐊᖅᑕᖓ ᑖᓄᑦ ᐊᔭᓕᒃ, 1937ᓄᓇᑦᓯᐊᕐᒥ ᑐᖅᑯᖅᑕᐅᓯᒪᔪᓂᑦ / Hᐊᓄᕆ ᑯᒃ, ᐃᒃᓯᕋᕐᔪᐊᖅ ᐅᑭᐅᖅᑕᖅᑐᒥ, 1906 / N-1979-032: 0016 ᐊᔾᔨᙳᐊᖅ Hᐊᓄᕆ ᑯᒃ
ᐃᓄᐃᑦ ᓴᓇᐅᒐᓕᕆᔩᑦ: ᐅᖃᕈᓐᓇᖅᐱᑦ ᓴᓇᒪᓂᐅᑉ ᑐᑭᖓᓂᒃ, ᐅᕝᕙᓘᓐᓃᑦ ᐊᒥᓱᓗᐊᓂᒃ ᐊᔾᔨᒌᖏᕈᓘᔭᖅᑐᓂᒃ ᑐᑭᖃᕐᒪᑕ ᑭᐅᔾᔪᑎᒋᔭᕆᐊᒃᓴᖅ ᐊᔪᕐᓇᕈᔪᓗᐊᕐᒪᑦ?
ᒪᔭ ᓯᐊᓗᒃ ᔭᐃᑯᑉᓴᓐ: ᐃᒻᒪᓂᓴᕐᓕ, (ᑐᓐᓂᓕᐅᕈᓰᑦ ᐅᕝᕙᓘᓐᓃᑦ ᐊᖓᒃᑯᓄᑦ ᐱᓯᒪᔭᐅᓲᑦ ᓲᕐᓗ ᐋᕐᖑᐊᑦ) ᑭᒡᓕᖃᓗᐊᕋᔭᖅᑐᑦ ᖃᓄᖅ ᐊᖑᓇᓱᖕᓂᖅ ᐊᑐᖅᑕᐅᖃᑦᑕᕐᓂᖓᓂᒃ. ᑕᒪᒃᑯᐊ ᐋᕐᖑᐊᑦ ᓴᓇᐅᒪᓂᖏᑦ ᑐᓂᓯᓯᒪᕗᑦ ᐊᖑᓇᓱᒃᑎᒧᑦ ᓴᙱᓂᕐᒥᒃ ᐊᒻᒪᓗ ᑲᔪᓯᑦᑎᐊᕈᓐᓇᕐᓂᕐᒥᒃ ᐊᖑᓇᓱᒃᑎᑦᑎᐊᕙᐅᓗᓂ ᓄᓇᓕᖕᒥᐅᓄᑦ ᐃᑲᔪᕈᓐᓇᕋᔭᕐᓂᖓᓂᒃ ᐆᒪᔾᔪᑎᒃᓴᖏᓐᓂᒃ ᑐᓂᓯᕙᒡᓗᓂ.
ᑐᖅᑯᖅᑕᐅᓯᒪᔪᑦ ᑎᑎᕋᖅᑕᐅᓯᒪᔪᑦ ᑕᑯᒃᓴᐅᓂᖃᖅᐳᑦ ᑕᒪᒃᑯᐊ ᑕᓕᒃᑯᑦ ᐊᒻᒪᓗ ᓂᐅᒃᑯᑦ, ᐊᒻᒪᓗ ᓴᒡᕖᖕᓄᑦ ᑐᓐᓂᓕᖅᓯᒪᔪᑦ ᐊᔾᔨᒋᔭᐅᕗᑦ ᑕᒪᒃᑯᓄᖓ ᐃᓄᖕᓄᑦ ᐊᔾᔨᒌᖏᑦᑐᓄᑦ; ᐅᔭᒦᑦ ᑲᑎᑕᐅᓪᓗᑎᒃ ᐋᖅᑭᒃᑕᐅᓲᖑᕗᑦ ᐊᒻᒪᓗ ᑕᓕᖓᓐᓄᑦ ᐋᖅᑭᒃᓯᒪᓂᖏᑦ ᐃᓕᔭᐅᓲᖑᕗᑦ. ᑕᐃᒪᓐᓇ ᐅᖃᖅᖢᓂ ᐊᔪᕐᓇᖏᓐᓂᖅᓴᐅᕗᖅ ᓇᓕᐊᖕᓄᑐᐃᓐᓇᖅ ᐃᓄᖕᓄᑦ ᐃᓚᒋᔭᐅᒍᕕᑦ ᐅᖃᕈᓐᓇᖅᐳᑎᑦ ᑕᐃᒪᓐᓇ ᐱᓲᖑᓂᖏᓐᓂᒃ ᑎᒥᖏᓐᓄᑦ ᑐᓐᓂᓕᖅᓱᐃᓂᕐᒥᒃ.
ᑕᐃᒪᓕ, ᑮᓇᒃᑯᑦ ᑐᓐᓂᓕᖅᓱᖅᓯᒪᔪᑦ, ᑕᐃᒪᙵᓕᒫᖅ ᐊᔾᔨᒌᖏᓐᓂᖃᓲᖑᕗᑦ. ᐆᒃᑑᑎᒋᓗᒍ, ᖃᐅᖓᒍᑦ. ᐊᓯᖏᑦ ᐃᓚᒌᖑᔪᑦ ᐃᒪᐃᓕᖓᔪᒥᒃ ᐱᓲᖑᔪᑦ, ᑕᒪᓐᓇ ᑐᑭᓕᐊᖅᑐᖅ ᕿᖓᖓᒍᑦ ᑎᑭᓯᒪᓲᖑᕗᑦ; ᐊᓯᒃᑲᓐᓂᖏᑦᑕᐅᖅ ᐃᓚᒌᖑᔪᑦ ᑕᐃᒪᓐᓇ ᐱᖃᑦᑕᖏᑦᑐᑦ ᐃᓚᖏᓪᓗ ᓲᕐᓗ M-ᒥᒃ ᐃᒪᓐᓇ ᐱᖃᓲᖑᓪᓗᑎᒃ. ᒪᓕᒐᖃᖅᑐᖃᕐᒥᔪᖅ, ᑭᓯᐊᓂᓕ ᑕᒪᒃᑯᓄᖓ ᒪᓕᒐᕐᓄᑦ ᐃᓚᐅᑎᑕᐅᔪᓐᓇᕐᒥᔪᑦ. ᑕᐃᒪᓕ ᐅᕙᓐᓄᑦ ᑕᒪᒃᑯᐊ ᑮᓇᕐᒧᑦ ᑐᓐᓂᓕᖅᓯᒪᔪᑦ ᐃᓄᖕᒧᑦ ᐊᑕᐅᓯᕐᒧᑦ ᐊᔾᔨᐅᖏᓐᓂᖃᕈᓐᓇᖅᑐᖅ, ᐃᓄᖕᒧᑦ ᐊᑕᐅᓯᕐᒧᑦ ᐊᔾᔨᐅᖏᓐᓂᖃᓕᕈᑕᐅᔪᓐᓇᖅᑐᑦ ᑕᒪᒃᑯᐊ ᑐᓐᓃᑦ.
ᐅᓪᓗᒥᐅᔪᕐᓕ ᑕᒪᒃᑯᐊ ᑐᓐᓃᑦ ᐊᒃᑐᐊᓂᖃᕉᓐᓃᕐᒪᑕ ᐊᖑᓇᓱᖕᓂᕐᒧᑦ ᐃᓄᐃᑦ ᑕᐃᔅᓱᒪᓂᑐᖃᖅ ᐊᑐᕐᓂᕆᕙᓚᐅᖅᑕᖏᑦᑎᑐᑦ. ᐃᓛᓐᓂᒃᑯᑦ ᐃᓄᐃᑦ ᐅᖃᖃᑦᑕᕐᒪᑕ ᐃᒪᓐᓇ, “ᐅᖃᕈᒪᙱᑦᑐᖓ (ᑐᑭᖓᓂᒃ) ᐱᔾᔪᑎᒋᓪᓗᒍ ᓇᒻᒥᓂᕆᔭᐅᓂᐅᖕᒪᑦ, ᐃᓅᖃᑎᑦᑎᓐᓄᑦ ᐱᒋᔭᐅᓂᖓᓄᑦ,” ᐃᓱᒪᔪᖓᓕ ᖃᐅᔨᒪᖏᒻᒪᑕᖃᐃ, ᐅᖃᐅᓯᖃᕈᓐᓇᙱᓚᑦ. ᐱᔾᔪᑕᐅᔪᕐᓕ ᐅᑭᐅᓂᒃ ᑕᐅᓴᓐᕌᓗᖕᓂᒃ ᐊᓂᒍᖅᓯᒪᓕᖅᑎᓪᓗᒋᑦ ᖃᐅᔨᔪᓐᓇᕐᒪᑕ ᐊᒻᒪᓗ ᑐᑭᓯᔾᔪᑎᒋᓕᕐᓗᓂᒋᑦ ᐊᒻᒪᓗ ᖃᐅᔨᓴᕈᑎᒋᓕᕐᓗᓂᒋᑦ.
ᑯᕆᔅᑕ ᐅᓗᔪᖅ ᔭᕙᑦᔅᑭ: ᐅᖃᕈᓐᓇᖅᐳᖓ ᐃᒪᓐᓇ, “ᒫᓂᕐᒥᐅᑕᐅᕗᖓ, ᑕᒫᓂᓗ ᓄᓇᓕᖕᒥᐅᑕᐅᓪᓗᖓ ᐊᒻᒪᓗ ᐃᒪᓐᓇ ᑐᑭᖃᖅᐳᖅ, ᑭᓯᐊᓂᓕ ᐊᓯᐊᓂᒃ ᑐᑭᖃᑐᐃᓐᓇᕆᐊᓕᒃ ᐊᓯᖏᓐᓄᑦ.” ᐊᖏᖅᐳᖓᓕ ᐃᓄᐃᑦ ᖃᐅᔨᒪᓂᖃᓗᐊᖏᒻᒪᑕ. ᑕᒪᒃᑯᐊ ᐃᓚᖏᑦ ᐅᒃᐱᕆᔭᕗᑦ ᓱᓕ ᑭᖑᓂᑦᑎᓐᓄᑦ ᐱᔭᐅᕙᓪᓕᐊᖕᒪᑕ ᐊᒻᒪᓗ ᐃᓅᔾᔪᑎᒋᓪᓗᓂᔾᔪᒃ, ᑭᓯᐊᓂᓕ ᖃᓪᓗᓈᑦ ᐱᓇᓱᐃᓐᓇᕐᒪᑕ ᐃᓕᖅᑯᓯᑦᑎᓐᓂᒃ.
ᐊᔾᔨᙳᐊᖅ ᑭᓚ, ᖁᕐᓗᖅᑑᑉ ᐃᖃᓗᒃᑑᑦᑎᐊᓪᓗ ᐊᑯᓐᓂᖓᓂ, 1916ᐊᔾᔨᓕᐅᖅᓯᔪᖅ ᔪᐊᔾ H. ᐅᐃᓪᑭᓐᔅ / ᐅᖃᓕᒫᒐᖃᕐᕕᒃ ᑐᖅᑯᖅᑕᐅᓯᒪᔪᓕᕆᔨᓪᓗ ᑲᓇᑕᒥ / ᑭᐊᓇᑦ ᒍᐊᑕᓐ ᓯᑉᒪᓐ / PA-165665 ᐊᔾᔨᙳᐊᖅ ᔪᐊᔾ ᐅᐃᓪᑭᓐᔅ
ᐃᓄᐃᑦ ᓴᓇᐅᒐᓕᕆᔨᒃᑯᑦ: ᖃᓄᕐᓕ ᐃᓱᒪᖃᖅᐱᑦ ᐃᓕᖅᑯᓯᑐᖃᒃᑯᑦ ᑐᓐᓂᓕᐅᕈᓯᕐᓂᒃ ᐊᒻᒪ ᒫᓐᓇᐅᓕᖅᑐᖅ ᑲᑭᓂᓕᖅᓱᐃᔾᔪᑕᐅᓲᓂᒃ?
ᒪᔭ ᓯᐊᓗᒃ ᔭᐃᑯᑉᓴᓐ: ᒫᓐᓇᐅᔪᕐᓕ ᑐᓐᓂᓕᖅᓯᐃᔪᓐᓇᖅᐳᒍᑦ (ᑐᓐᓂᓕᖅᓯᓂᖅ ᓴᓗᒪᓂᒃᑯᑦ ᐊᒻᒪᓗ ᐊᑦᑕᕐᓇᖏᑦᑐᒃᑯᑦ ᐃᓕᓐᓂᐊᖅᑎᑕᐅᓂᖅ) ᐊᒻᒪᓗ ᑕᐃᒪ ᒪᑯᑎᒎᓇᖅ ᖃᓪᓗᓈᑦ ᑐᓐᓂᓕᖅᓱᕈᑎᒋᕙᒃᑕᖏᑦᑎᒍᑦ. ᐃᓕᓐᓂᐊᖅᑎᑕᐅᑐᐃᓐᓇᕆᐊᖃᖏᓚᑎᑦ ᐊᑐᕆᐊᒃᓴᖅ ᑐᓐᓂᓕᖅᓱᕈᑎᒥᒃ, ᑭᓯᐊᓂᓕ ᐋᓐᓂᐊᖃᕐᓇᖏᑦᑐᒃᑯᑦ ᐊᒻᒪᓗ ᐊᑦᑕᕐᓇᖏᑦᑐᒃᑯᑦ ᐊᑐᕆᐊᖃᖅᐳᒍᑦ ᑐᓐᓂᓕᖅᓱᕈᑎᒥᒃ ᓴᓗᒪᓂᖅᓴᐅᖕᒪᑦ ᑲᐱᓯᑦᑕᕐᓂᕐᒥᒃ. ᐃᓕᓐᓂᐊᖅᑎᑕᐅᓯᒪᖏᒃᑯᕕᓪᓕ ᑐᓐᓂᓕᖅᓱᐃᓂᕐᒥᒃ ᐃᓕᓐᓂᐊᖅᐸᓪᓕᐊᓪᓗᑎᓪᓗ ᑐᓐᓂᓕᖅᓱᐃᓂᕐᒥᒃ, ᑕᐃᒪᓕ ᑲᐱᓯᑦᑕᕈᓐᓇᖅᐳᑎᑦ. ᑕᐃᒪᓕ ᐊᓐᓂᖅᓯᓇᔭᖏᓚᑎᑦ ᐃᓄᖕᓂᒃ ᑐᓐᓂᓕᖅᓱᖅᑕᕐᓂᒃ.
ᐊᓯᐊᒍᑦᑕᐅᖅ ᑐᓐᓂᓕᖅᓱᕈᑎᓂᒃ ᐱᑕᖃᕐᒥᔪᖅ, ᒪᑯᓂᖓ ᓴᐅᓂᕐᓂᒃ ᓴᓇᓯᒪᔪᑦ ᒥᖅᑯᑎᓂᒃ ᐊᒻᒪᓗ ᐃᕙᓗᓂᒃ. ᑕᐃᒪᐃᑦᑐᓂᒃ ᐊᑐᖃᑦᑕᖏᓪᓗᓯ, ᑭᓯᐊᓂᓕ ᐃᓕᓐᓂᐊᖅᑎᑕᐅᑦᑎᐊᖅᓯᒪᒍᕕᑦ ᑐᓐᓂᓕᖅᓱᐃᓂᕐᒥᒃ ᐊᒻᒪᓗ (ᓴᓗᒪᑦᑎᐊᖅᑐᒥᒃ ᐊᒻᒪᓗ ᐊᑦᑕᕐᓇᖏᑦᑐᒥᒃ) ᐊᑐᖃᑦᑕᕈᕕᑦ. ᑕᑯᓯᒪᓕᖅᐳᒍᑦ ᑕᒻᒪᖅᓯᒪᓪᓗᑎᒃ ᐱᓕᕆᖃᑦᑕᖅᑐᓂᒃ. ᓯᕗᓪᓕᕐᒥᒃ ᑐᓐᓂᓕᖅᓱᕈᑎᒥᒃ ᒥᖅᑯᑎᒥᒃ ᓴᓇᓪᓗᓂ ᐊᔪᖏᑦᑎᐊᖅᑐᓄᑦ ᖃᐅᔨᒪᑦᑎᐊᖅᑐᓄᓪᓗ ᐱᔭᐅᓲᖑᔪᖅ, ᖃᓄᕐᓗ ᓴᓗᒻᒪᖅᓴᖅᑕᐅᖃᑦᑕᕐᓂᖏᓐᓂᒃ ᐱᔭᐅᓲᖑᔪᑦ. ᑕᐃᒪᓐᓇ ᐊᔪᕈᓐᓃᕈᒪᒍᕕᑦ ᐃᓕᓐᓂᐊᖅᑎᑕᐅᓯᒪᑦᑎᐊᕆᐊᖃᖅᑐᑎᑦ. ᐊᑐᕈᓐᓃᕐᓗᒋᓪᓗ ᐱᐅᓯᑐᖃᖅᑎᑐᑦ ᑐᓐᓂᓕᖅᓱᕈᑕᐅᕙᒃᑐᑦ ᐊᒻᒪᓗ ᑐᓐᓂᓕᖅᓱᕐᓂᐊᕐᓗᓂ ᐊᑐᑦᑕᐅᓲᑦ, ᐊᔾᔨᒋᙱᑕᒃᑰᓕᕋᑦᑕ; ᐃᓄᖕᓂᒃ ᐊᒥᓱᓂᒃ ᐱᑕᖃᓕᖅᐳᖅ; ᐃᖏᕐᕋᕗᒍᑦ; ᐱᑕᖃᕆᓪᓗᓂ ᐋᓐᓂᐊᕐᓇᖅᑐᓂᒃ; ᓄᓇᕐᔪᐊᕐᒥᒡᓗ ᖃᓂᒻᒪᒍᑕᐅᕙᓪᓕᐊᔪᑦ; ᐳᕙᒡᓗᖕᓇᐃᑦ ᐊᒻᒪᓗ ᐊᑦᑕᓇᖅᑐᐊᓗᖕᓂᒃ ᐱᑕᖃᕆᓪᓗᓂ.
ᑯᕆᔅᑕ ᐅᓗᔪᖅ ᔭᕙᑦᔅᑭ: ᐊᖏᕈᑎᖃᖅᐳᖓ ᓴᐅᓂᕐᓂᒃ ᓴᓇᓯᒪᔪᓂᒃ ᒥᖅᑯᑎᓂᒃ. ᐊᓯᐊᒍᑦᑕᐅᖅ ᐃᓱᒪᖃᕆᕗᖓ ᑐᓐᓂᓕᖅᓱᐃᓲᖑᔪᑦ ᐊᔪᖏᑦᑎᐊᕐᒪᑕ ᒥᖅᓱᕐᓂᕐᒥᒃ? ᑕᐃᒪᓕ ᒥᖅᓱᕈᓐᓇᑦᑎᐊᖏᒃᑯᕕᑦ ᐊᒻᒪᓗ ᑭᓗᖃᑦᑎᐊᖏᑦᑐᒥᒃ ᓴᓇᕙᒡᓗᑎᑦ ᐊᒻᒪᓗ ᐊᑐᖅᖢᑎᑦ ᓴᐅᓂᕐᒥᒃ ᓴᓇᓯᒪᔪᒥᒃ ᒥᖅᑯᑎᒥᒃ, ᑕᐃᒪᓕ ᑕᒻᒪᑦᑎᐊᕋᔭᖅᐳᑎᑦ.
ᐃᓄᐃᑦ ᓴᓇᐅᒐᓕᐅᓕᕆᔨᒃᑯᑦ: ᐅᖃᐅᓯᖃᕈᓐᓇᖅᐱᑦ ᑭᓱᓄᑦ ᑐᓐᓂᓕᖅᓱᐃᔾᔪᑎᕕᓃᑦ ᐊᑐᖅᑕᐅᔪᓐᓃᖅᐸᓪᓕᐊᓕᕐᓂᕐᒪᖔᑕ?
ᑯᕆᔅᑕ ᐅᓗᔪᖅ ᔭᕙᑦᔅᑭ: ᐊᔾᔨᒌᙱᑦᑐᒻᒪᕆᖕᓂᙶᕋᑦᑕ. ᐃᓱᒪᒋᓗᒍ ᓄᓇᑦᓯᐊᕗᒥ, ᑕᐃᒪᓐᓇᑦᑕᐅᖅ ᑲᓛᖦᖡᑦ ᓄᓈᑦ, ᖃᓪᓗᓈᓄᑦ ᑎᑭᑕᐅᓚᐅᖅᓯᒪᔪᐃᓐᓇᕗᑦ ᑕᐃᒪᓗ ᐃᓕᖅᑯᓯᑐᖃᖏᓐᓂᒃ ᐊᓯᐅᔨᕙᓪᓕᐊᓕᖅᖢᑎᒃ ᐅᖃᐅᓯᑐᖃᖏᓐᓂᒡᓗ ᐅᓪᓗᒥᐅᔪᖅ, ᑕᐃᒪᓕ ᑕᒫᓂ ᓄᓇᕗᒻᒥ, ᐊᑖᑕᑦᑎᐊᒃᑯᒃᑲ ᐊᓈᓇᑦᑎᐊᒃᑯᒃᑲ ᓄᓇᒥᐅᑕᐅᓚᐅᖅᓯᒪᕗᑦ ᑭᓯᐊᓂᓕ ᒪᒃᑯᒃᑑᓕᖅᖢᑎᒃ ᓄᓇᓕᖕᒥᐅᑕᙳᖅᖢᑎᒃ. ᑕᐃᒪᓕ ᐃᓄᐃᑦ ᐃᓱᒪᖏᓐᓃᖏᓐᓇᖅᐳᖅ ᐃᓕᖅᑯᓯᑐᖃᖏᓐᓂᒃ. ᐊᓈᓇᑦᑎᐊᕋ ᐅᖃᓪᓚᖃᑦᑕᖅᐳᖅ ᖃᓄᖅ ᑕᒪᒃᑯᐊ ᑐᓐᓃᑦ ᐱᔭᐅᓲᖑᓂᖏᓐᓂᒃ, ᐅᕙᓘᓐᓃᑦ ᖃᓄᖅ ᕿᖓᖏᑦᑎᒍᑦ ᑐᓐᓂᓕᖅᓱᐃᒑᖓᑕ ᐱᔭᕆᐊᖃᕐᓂᖏᓐᓂᒃ.
ᐊᓯᖏᓐᓂᒡᓗ ᓄᓇᓖᑦ ᐊᔾᔨᒌᙱᑕᖏᓐᓂ ᖃᐅᔨᒪᓂᖃᖅᐳᑦ. ᓄᓇᕗᒻᒥᓪᓕ, ᐅᒃᐱᕐᓂᖅ ᐊᑐᖅᑕᐅᓕᖅᑎᓪᓗᒍ ᐊᒻᒪᓗ ᖃᓪᓗᓈᖃᓕᖅᑎᓪᓗᒍᓗ ᐊᓯᐅᔨᔾᔪᑕᐅᓛᖑᒻᒪᕆᒃᐳᖅ ᖃᐅᔨᒪᔭᑐᖃᖏᓐᓂᒃ. ᐊᒻᒪᓗ ᑕᐃᒪ ᐊᑐᖃᑦᑕᓕᕆᕗᑦ ᖃᓪᓗᓈᑦ ᐱᐅᓯᖏᓐᓂᒃ. ᐊᖓᔪᒋᓗᐊᙱᑕᒃᑲ ᐃᖅᑲᐅᒪᕗᑦ ᐊᓈᓇᑦᑎᐊᖏᑦ ᑕᐃᒪᐃᑦᑐᓂᒃ ᑐᓐᓂᖃᖅᖢᑎᒃ, ᑭᓯᐊᓂᓕ ᑕᐃᒪ ᐊᑐᖅᑕᐅᖃᑦᑕᕈᓐᓃᖅᖢᑎᒃ. ᐃᒻᒪᖄ ᑕᒫᓂ 1940-ᓂ ᐊᒻᒪᓗ 1950-ᓂ ᐃᒃᓯᕋᕐᔪᐊᑦ ᐊᒻᒪᓗ ᓇᔭᐃᑦ ᐅᖃᖃᑦᑕᓚᐅᖅᐳᑦ ᐃᒪᓐᓇ, “ᐋᒃᑲ, ᑕᐃᒪᓐᓇ ᐱᔭᕆᐊᖃᖏᑦᑐᓯ” 1970 ᐊᒻᒪᓗ 1980 ᐊᑐᓕᖅᑎᓪᓗᒋᑦ ᑕᐃᒪᐃᓗᐊᕈᓐᓃᓚᐅᖅᓯᒪᔪᑦ ᑭᓯᐊᓂᓕ ᐃᓕᖅᑯᓯᑐᖃᕐᓂᒃ ᐊᑐᕈᓐᓃᖅᑎᑦᑎᓚᐅᖅᐳᑦ.
ᒪᔭ ᓯᐊᓗᒃ ᔭᐃᑯᑉᓴᓐ: ᐃᓱᒪᔪᖓᓕ ᑕᐃᒪᓐᓇᑦᑕᐅᖅ ᐅᕙᒍᑦ ᐱᔭᐅᓇᓱᒋᕗᖓ, ᑭᓯᐊᓂᓕ ᐅᑭᐅᑦ ᐊᔾᔨᒋᖏᑕᖏᑦᑎᒍᑦ. ᐃᓄᐃᑦ ᐅᒃᐱᓕᖅᑐᑦ ᓴᙱᓂᖃᒻᒪᕆᒃᑐᑦ ᐅᒃᐱᕈᓱᖕᓂᕐᒥᓂᒃ ᐊᒻᒪᓗ ᐊᔪᕐᓇᒻᒪᕆᒃᖢᓂ ᐅᖃᐅᓯᕆᔭᕆᐊᒃᓴᖅ. ᐊᔪᕐᓇᕆᕗᖅ ᖃᓄᐃᒻᒪᒃ ᓄᑖᑦ ᐅᒃᐱᖅᑐᑦ ᓲᕐᓗ ᐊᓯᐅᑎᑦᑎᓇᓱᒻᒪᕆᖕᒪᑕ ᐃᓕᖅᑯᓯᑐᖃᕕᓂᑦᑎᓐᓂᒃ. ᑕᓗᕈᒃᑯᓇᖅᓯᑎᖦᖢᓂᔾᔪᒃ.
ᑕᐃᒪᓕ ᐅᖃᓪᓚᒍᑎᖃᕈᓐᓇᐃᓪᓕᓗᑕ ᑐᓐᓂᓕᖅᓱᐃᓂᕐᒥᒃ ᐃᓐᓇᖁᑎᒋᔭᑦᑎᓐᓄᑦ ᐊᕐᓇᓄᑦ, ᐅᕙᑦᑎᓐᓂᒃ ᐃᓕᓐᓂᐊᖅᑎᑦᑎᔪᓐᓇᕐᒥᔪᑦ ᐊᓯᖏᓐᓂᒃ ᐊᒥᓱᓂᒃ ᐱᐅᓯᕆᕙᓚᐅᖅᑕᖏᓐᓂᒃ, ᑕᐃᒪᓕ ᓴᙱᓂᖃᒻᒪᕆᒃᑲᓗᐊᖅᐳᒍᑦ ᐃᓕᖅᑯᓯᑐᖃᕕᓂᑦᑎᓐᓂᒃ ᑕᒫᓂ ᑲᓛᖦᖠᑦ ᓄᓇᖓᓐᓂ. ᑕᐃᒪᓕ ᓲᕐᓗ “ᑲᓛᖦᖠᐅᒐᕕᑦ” ᐃᓄᓯᓕᒫᓐᓂᒡᓗ ᐊᖑᓇᓱᒡᕕᐅᕙᒃᑐᒥᐅᑕᐅᓗᑎᑦ, ᑐᓐᓂᓕᖅᓯᒪᔭᕆᐊᖃᖏᓚᑎᑦ. ᑭᓯᐊᓂᓕ ᖃᓪᓗᓈᑦ ᐅᕙᓘᓐᓃᑦ ᖃᓪᓗᓈᕐᒥᒃ ᐊᑖᑕᖃᕈᕕᑦ, ᐅᖃᐅᓯᑐᖃᕐᓂᒃ ᖃᐅᔨᒪᙱᓕᕐᓗᑎᑦ, ᐊᖏᓂᖅᓴᒥᒡᓗ ᓄᓇᓕᖕᒥᐅᑕᕕᓂᐅᓪᓗᑎᑦ, ᑐᓐᓂᓕᖅᓱᖅᑕᐅᔪᒪᓂᖅᓴᐅᓇᔭᖅᑐᑎᑦ. ᑕᐃᒪᓕ ᐃᓇᖏᖅᓯᖅᑰᔨᓯᒪᓕᖅᑐᖅ ᑐᓐᓂᓕᖅᓱᐃᓂᖅ ᐊᓯᖏᓐᓂᒃ ᐃᓕᖅᑯᓯᑐᖃᕕᓂᑦᑎᓐᓂ.
ᑯᕆᔅᑕ ᐅᓗᔪᖅ ᔭᕙᑦᔅᑭ: ᐱᔭᕆᐊᖃᒻᒪᕆᒃᐳᒍᑦ ᐃᓅᖃᑎᑦᑎᓐᓂᒃ ᐃᓕᓐᓂᐊᖅᑎᑕᐅᓗᑕ ᐃᓕᖅᑯᓯᑐᖃᕕᓂᑦᑎᓐᓂᒃ. ᐅᖃᓪᓚᖃᑎᖃᒻᒪᕆᒃᐸᒃᐳᖓ ᐊᖏᕐᕋᓐᓂ ᒥᖅᓱᕐᓂᕐᒥᒃ ᐊᒻᒪᓗ ᐆᒃᑑᑎᓕᐅᕐᓂᕐᒥᒃ ᐊᒻᒪ ᐊᔪᕆᑕᐅᔭᕆᐊᖃᙱᑦᑐᓕᕆᓂᕐᒥᒃ. ᐊᒥᓱᓂᒃ ᐆᒃᑑᑎᖃᐅᓕᖅᐳᖓ ᐃᓄᖕᓂᑦ ᐱᔭᕕᓂᓐᓂᒃ. ᑕᒪᒃᑯᐊ ᐆᒃᑑᑏᑦ ᐱᓯᒪᔭᒃᑲ ᓇᓗᓇᖏᑦᑎᐊᖅᑐᑦ ᖃᓄᖅ ᐅᑭᐅᓂᒃ ᐊᑐᖅᑕᐅᖃᑦᑕᓚᐅᖅᓯᒪᓂᖏᓐᓂᒃ. ᓇᑭᓪᓕ ᐱᓚᐅᖅᐱᒋᑦ? ᐊᑐᕈᓐᓇᖅᐳᖓ? ᐋᖅᑭᒋᐊᒃᑲᓐᓂᖁᓐᓇᖅᐸᕋ? ᑐᓐᓂᖅᑯᑎᒋᔪᓐᓇᖅᐸᕋ? ᑕᒪᒃᑯᐊ ᐅᖃᐅᓰᑦ ᐊᑐᖅᑕᐅᓲᖑᕗᑦ ᐃᓕᖅᑯᓯᑐᖃᖅᐳᑦ ᐊᑐᖅᖢᑎᒍᑦ, ᐃᓚᒋᔭᐅᓪᓗᓂᓗ ᐊᓐᓄᕌᕗᑦ ᐊᒻᒪᓗ ᑐᓐᓂᓕᖅᓱᐃᓂᖅ.
ᒪᔭ ᓯᐊᓗᒃ ᔭᐃᑯᑉᓴᓐ: ᐃᓄᖕᓂᒃ ᐊᔾᔨᒌᖏᓐᓂᖏᓐᓂᒃ ᐅᖃᐅᓯᖃᖁᔨᒐᓗᐊᖅᐳᖓ ᑕᒪᒃᑯᓂᖓ ᑕᐃᔅᓱᒪᓂᑐᖃᖅ ᐆᒃᑑᑎᒋᔭᐅᓚᐅᖅᑐᓂᒃ ᐊᑐᕐᓂᖃᖅᖢᑎᒃ ᐱᐅᓯᕆᔭᐅᓚᐅᖅᑐᓂᒃ ᑐᓐᓂᕐᓂᒃ ᐊᒻᒪᓗ ᑕᐃᒪ ᑕᐃᔪᓐᓇᖅᑕᕗᑦ ᓄᑖᑦ-ᐃᓄᐃᑦ ᓴᓇᔭᖏᑦ, ᐅᕝᕙᓘᓐᓃᑦ ᓄᑖᑦ- ᐱᐅᓯᑐᖃᕐᓂᒃ ᓴᓇᔪᑦ. ᖃᓄᐃᑦᑐᑐᐃᓐᓇᑦ ᑐᓐᓃᑦ ᐱᐅᒻᒪᕆᒃᑐᑦ. ᑕᒪᕐᒥᒃ ᐱᐅᒋᑦᑎᐊᖅᑕᒃᑲ. ᑕᐃᒪᓕ, ᐱᒻᒪᕆᐊᓘᕗᖅ ᖃᐅᔨᒪᑦᑎᐊᕐᓗᑕ ᐃᓄᐃᑦ ᑐᓐᓂᓕᖅᓱᕈᑎᖏᓐᓂᒃ, ᐊᒻᒪᓗ ᖃᓄᐃᑦᑑᕙ ᐱᐅᓯᑐᖃᐃᑦ ᑕᒪᒃᑯᐊᓗ ᓄᑖᖑᔪᑦ. ᑕᒪᒃᑯᐊ ᓄᑖᑦ ᐃᓄᐃᑦ ᑐᓐᓂᓕᖅᓱᕈᑎᒋᕙᓕᖅᑕᖏᑦ ᓲᕐᓗ ᐊᑐᕈᑕᐅᔪᓐᓃᖅᐳᑦ ᐱᐅᓯᑐᖃᖅᑎᑐᖅ ᑐᓐᓂᓕᖅᓱᕈᑕᐅᕙᓚᐅᖅᑐᓂᒃ ᑕᑯᒍᕕᑦ ᖃᐅᔨᔪᓐᓇᖅᐳᑎᑦ ᖃᕆᓴᐅᔭᑎᒍᑦ. ᑭᓯᐊᓂᓕ ᐱᐅᔪᒻᒪᕆᖕᓂᒃ ᑐᖅᑯᖅᑕᐅᓯᒪᔪᓂᒃ ᐱᑕᖃᕆᕗᖅ, ᐊᒥᓱᒻᒪᕆᐊᓗᖕᓂᒃ ᐊᔾᔨᙳᐊᓂᒃ ᐊᒻᒪᓗ ᑎᑎᕋᐅᔭᖅᓯᒪᔪᓂᒃ ᐊᒻᒪᓗ ᐅᖃᐅᓯᒃᑯᑦ ᑎᑎᕋᖅᑕᐅᓯᒪᔪᑦ ᐱᑕᖃᕆᕗᑦ ᐱᐅᓯᑐᖃᖅᑎᑐᑦ ᑐᓐᓂᓕᖅᓱᕈᑕᐅᕙᒃᑐᓂᒃ. ᐱᓇᓱᒻᒪᕆᒃᑲᓗᐊᖅᐳᖓ (ᐃᓄᖕᓂᒃ) ᐊᑐᖁᓪᓗᒋᑦ ᑕᐃᒪᐃᑦᑐᓂᒃ ᐊᒻᒪᓗ ᓇᓂᓯᔪᓐᓇᕐᓗᑎᒃ ᐊᓈᓇᖏᑦᑕ ᑐᓐᓂᓕᖅᓱᖅᓯᒪᓂᕕᓂᖏᓐᓂᒃ. ᑕᐃᒪᓕ ᐊᓈᓇᐅᑉ ᐱᖏᑦ ᐊᑐᕐᓂᖃᑦᑎᐊᖅᐳᑦ, ᐱᔾᔪᑎᒋᓪᓗᒍ ᑕᒪᒃᑯᐊ ᐊᕐᓇᐃᑦ ᑐᓐᓂᓕᖅᓱᖅᓯᒪᖃᑦᑕᓚᐅᕐᒪᑕ.
ᒪᔭ ᓯᐊᓗᒃ ᔭᐃᑯᑉᓴᓐ ᑐᓐᓂᓕᖅᓯᓲᖑᕗᖅ, ᖃᐅᔨᓴᖅᑎᐅᓪᓗᓂᓗ ᐊᒻᒪᓗ ᐃᓕᖅᑯᓯᑐᖃᓕᕆᔨᐅᓪᓗᓂ ᒪᓂᕐᒥᐅᑕᓂᒃ ᕿᑭᖅᑕᖅᓱᐊᕐᒥ ᑲᓇᖕᓂᖅᐸᓯᐊᓂ ᑲᓛᖦᖠᑦ ᓄᓇᖓᓐᓂ. ᑐᓐᓂᓕᖅᓱᐃᖃᑦᑕᓕᓚᐅᖅᓯᒪᔪᖅ ᐅᑭᐅᓂᒃ 22-ᓂᒃ. ᖃᐅᔨᓴᕐᓂᕆᖃᖅᑕᖅᑕᖏᑦ ᑐᓐᓂᓕᖅᓱᐃᓂᕐᒧᒃ ᐃᓚᖃᖅᐳᖅ ᖃᓄᐃᑦᑐᓂᒃ ᐊᑐᖅᑕᐅᔭᕆᐊᓕᖕᓂᒃ ᐊᒻᒪᓗ ᐃᑦᑕᕐᓂᓴᖅᑎᒍᑦ ᐃᓄᐃᑦ ᐊᓛᔅᑲᒥᐅᑕᑦ, ᑲᓇᑕᒥᐅᑕᑦ ᐊᒻᒪᓗ ᑲᓛᖦᖠᑦ ᓄᓇᖓᓂᕐᒥᐅᑕᑦ.
ᑯᕆᔅᑕ ᐅᓗᔪᖅ ᔭᕙᑦᔅᑭ ᐃᓕᓐᓂᐊᖅᓯᒪᓂᖃᒻᒪᕆᒃᖢᓂ ᓂᕈᐊᒐᒃᓴᐅᕗᖅ, ᑲᒪᔨᐅᓪᓗᓂᓗ ᑕᑯᔭᒐᖃᕐᕕᖕᒥ, ᐃᓕᖅᑯᓯᓕᕆᔨᐅᓪᓗᓂᓗ, ᓱᖓᐅᔭᓕᕆᔨᐅᓪᓗᓂᓗ ᐊᒻᒪᓗ ᒥᖅᓱᖅᑎᐅᓪᓗᓂ ᐃᒡᓗᓕᒑᕐᔪᖕᒥᐅᑕᐅᓪᓗᓂ ᐊᒻᒪᓗ ᑲᖏᖅᖠᓂᕐᒥᐅᑕᐅᓪᓗᓂ, ᓄᓇᕗᒻᒥ. ᐃᓕᖅᑯᓯᓕᕆᓂᕐᒧᑦ ᐸᐃᑉᐹᖅᑖᖅᓯᒪᕗᖅ ᑖᒃᑯᓇᖓᑦ ᐳᕆᔅᑎ ᑲᓚᒻᐱᐊ ᓯᓚᑦᑐᖅᓴᕐᕕᒡᔪᐊᖓᓐᓂᑦ.
ᑭᖑᕚᒃᓴᕗᑦ ᐃᓄᐃᑦ ᑲᑭᓂᓕᐅᖅᑎᐅᓛᖅᑐᑦ ᓴᖅᑮᒃᑲᓐᓂᕋᓱᐊᕐᓗᑎᒃ ᐊᑐᖅᑕᐅᕙᒍᓐᓃᖅᓯᒪᔪᒥᒃ