ᐃᓄᐃᑦ ᐃᖅᑲᓇᐃᔮᖃᖅᑐᑦ ᖁᕕᐊᒋᔭᖃᖅᑐᓪᓘᓐᓃᑦ ᓴᓇᐅᒐᓕᕆᓂᕐᒥᒃ ᑐᓴᕐᓕᑦ! ᐃᑲᔪᕈᒪᕕᑦ ᑮᓇᐅᔭᓂᒃ ᓴᓇᐅᒐᓕᕆᔨᓄᑦ ᐊᑐᐃᓐᓇᐅᑎᑕᐅᔪᓂᒃ ᐱᔪᓐᓇᖅᓯᕙᓪᓕᐊᒃᑲᓐᓂᕈᑎᒃᓴᖏᓐᓂᒃ? ᐄᖑᒃᐸᑦ, ᐃᓱᒪᒋᓗᒍ ᕿᒥᕐᕈᔨᙳᖃᑕᐅᓗᑎᑦ ᐃᓄᐃᑦ ᓴᓇᙳᐊᕐᓂᕐᒧᑦ ᑐᙵᕕᖓᓄᑦ (IAF).
ᓴᓇᙳᐊᕐᓂᕐᒧᑦ ᑐᙵᕕᖓᑦ ᕿᓂᓪᓚᕆᒃᐳᑦ ᕿᒥᕐᕈᔨᒃᓴᓂᒃ ᖃᐅᔨᓴᖅᑎᒃᓴᓂᒃ ᑮᓇᐅᔭᓂᒃ ᐱᓇᔪᒃᑐᓂᒃ ᒫᓐᓇ ᓯᕗᓂᒃᓴᒥᓗ ᑮᓇᐅᔭᖃᖅᑎᑕᐅᔾᔪᑎᑎᒍᑦ. ᓴᓇᙳᐊᕐᓂᕐᒧᑦ ᑐᙵᕕᒃᑯᑦ ᐃᑲᔪᖅᐸᒃᐳᑦ ᓴᓇᙳᐊᖅᑎᙳᖅᐸᓪᓕᐊᔪᓂᒃ, ᓴᓇᙳᐊᖅᑎᓂᒃ, ᓴᓇᙳᐊᖅᑎᓪᓚᕆᖕᓂᒡᓗ ᑮᓇᐅᔭᑎᒍᑦ ᐱᓕᕆᐊᒥᖕᓄᑦ ᐃᑲᔫᑎᒃᓴᐅᓂᐊᖅᑐᓂᒃ. ᕿᒥᕐᕈᔨᐅᓗᑎᑦ, ᐃᑲᔫᑎᖃᒻᒪᕆᒃᑲᔭᖅᑐᑎᑦ ᑮᓇᐅᔭᑎᒍᑦ ᐃᑲᔪᖅᓱᕐᓗᒋᑦ ᓴᓇᙳᐊᖅᑎᑦ ᑎᑎᖅᑭᕆᔨᓪᓗ ᐱᓕᕆᐊᒥᖕᓄᑦ ᐃᑲᔫᑎᒃᓴᖏᓐᓂᒃ ᓄᓇᓕᖕᒥᓂ ᓴᓇᙳᐊᖅᑎᐅᑦᑎᐊᕈᓐᓇᕈᑎᒃᓴᖏᓐᓂᒃ.
ᐃᑲᔪᕐᓂᖃᓪᓚᕆᒍᒪᒍᕕᑦ ᐃᓱᒪᒐᔾᔪᓄᑦ, ᑲᔪᖏᖅᓴᐅᑎᓄᑦ, ᓴᓇᐅᒐᕐᓄᓪᓗ ᐃᓄᖕᓂᙶᖅᓯᒪᔪᓂᒃ ᖃᓄᐃᑦᑐᑐᐃᓐᓇᑎᒍᑦ, ᐆᒃᑐᖁᕙᑦᑎᒋᑦ ᕿᒥᕐᕈᔨᐅᓂᕐᒧᑦ!
ᖃᓄᐃᓕᐅᕆᐊᖃᖅᐸᑦ ᕿᒥᕐᕈᔨᑦ?
ᕿᒥᕐᕈᔩᑦ ᕿᒥᕐᕈᖃᑦᑕᕆᐊᖃᖅᐳᑦ ᑮᓇᐅᔭᖅᑖᕋᓱᐊᕐᓂᕐᒧᑦ ᐆᒃᑐᖅᑐᓕᒫᓂᒃ ᐊᒻᒪ ᕿᒥᕐᕈᔨᐅᖃᑎᓂᒃ ᐅᖃᒪᖃᑎᖃᑦᑎᐊᖃᑦᑕᕐᓗᑎᒃ ᓂᕈᐊᕋᓱᒃᑎᓪᓗᒋᑦ ᑮᓇᐅᔭᖅᑖᖅᑎᑕᐅᓂᐊᖅᑐᓂᒃ.
ᖃᓄᖅ ᕿᒥᕐᕈᔨᑦ ᓂᕈᐊᖅᑕᐅᓲᖑᕙᑦ?
ᓴᓇᙳᐊᕐᓂᕐᒧᑦ ᑐᙵᕕᒃᑯᑦ ᐊᔾᔨᒌᙱᑦᑐᓂᒃ ᐃᓄᖕᓂᒃ ᕿᒥᕐᕈᔨᑖᕈᒪᕗᑦ ᓴᓇᙳᐊᕐᓂᓕᕆᓂᕐᒥᒃ ᖃᐅᔨᒪᓂᖃᖅᑐᓂᒃ. ᑮᓇᐅᔭᖅᑖᕐᓂᕐᒧᑦ ᐆᒃᑐᕋᓱᒃᑐᑦ ᕿᒥᕐᕈᔭᐅᖃᑦᑕᕐᓂᐊᖅᐳᑦ ᓴᓇᙳᐊᕐᓂᕐᒧᑦ ᑐᙵᕕᒃᑯᑦ ᐃᖅᑲᓇᐃᔭᖅᑎᖏᓐᓂᑦ ᓈᒻᒪᒃᑐᓂᒡᓗ ᕿᒥᕐᕈᓂᕐᒧᑦ ᑲᑎᒪᔨᕋᓛᓄᐊᖅᓯᕙᒡᓗᑎᒃ, ᐅᑯᐊ ᒪᓕᒡᓗᒋᑦ:
- ᓯᕗᓪᓕᐅᔾᔨᓗᑎᒃ ᐃᓄᐃᑦ ᓇᒻᒥᓂᖅᓱᕐᓂᖏᓐᓂᒃ ᕿᒥᕐᕈᔨᓕᒫᑦ ᐃᓄᐃᓐᓇᐅᓗᑎᒃ
- ᑲᑎᑎᓪᓗᒋᑦ ᐊᔾᔨᒌᙱᑦᑐᓂᒃ ᐱᓕᕆᐊᖃᖅᐸᒃᑐᑦ ᓴᓇᙳᐊᖅᑐᓕᕆᓂᕐᒧᑦ ᐅᖃᒪᖃᑎᒌᒃᑎᓪᓗᒋᑦ ᓴᓇᙳᐊᖅᑎᑦ, ᑕᑯᔭᒐᖃᕐᕕᓕᕆᔨᑦ, ᑎᑎᖅᑭᕆᔨᑦ, ᓂᐅᕐᕈᑎᖃᖅᑎᑦ ᐊᓯᖏᓐᓂᒡᓗ ᓴᓇᙳᐊᖅᑐᓕᕆᓂᕐᒧᑦ ᐱᓕᕆᐊᖃᖅᑐᑦ.
- ᐊᔾᔨᒌᙱᑦᑐᓂᙶᖅᑎᑦᑎᓂᒃᑯᑦ ᐊᑐᖅᓯᒪᔭᖏᑦ ᑭᒡᒐᖅᑐᖅᑕᐅᑦᑎᐊᕐᓗᑎᒃ, ᓲᕐᓗ ᓇᓂ ᓄᓇᖃᕐᓂᖏᓐᓂᒃ, ᐊᖑᑕᐅᒃᐸᑕ ᐊᕐᓇᐅᒃᐸᑕᓘᓐᓃᑦ ᐊᒻᒪ ᖃᓄᐃᑦᑐᒥᒃ ᐊᐃᑉᐸᖃᓲᖑᓂᖏᓐᓂᒃ
ᐆᒃᑐᓪᓗᐊᖅᐳᖓ?
ᐱᓇᔪᒋᑦ ᕿᒥᕐᕈᔨᐅᓂᕐᒧᑦ ᐃᓅᒍᕕᑦ ᐃᒪᐃᑦᑑᒍᕕᑦ:
- ᖁᔭᒋᓗᒋᑦ ᐃᓄᐃᑦ ᓴᓇᙳᐊᖅᐸᒃᑕᖏᑦ ᖃᓄᓗᒃᑖᖅ ᐋᖅᑭᒃᓯᒪᓂᖏᑎᒍᑦ, ᐃᓚᒋᔭᐅᓪᓗᑎᒃ ᑕᑯᒃᓴᐅᔪᑦ ᓴᓇᐅᒐᑦ, ᖁᙱᐊᒐᒃᓴᑦ, ᑕᕐᕆᔮᒃᓴᑦ, ᐊᒻᒪ ᑎᑎᖅᑭᕆᓂᒃᑯᑦ
- ᐃᓄᐃᑦ ᑮᓇᐅᔭᓂᒃ ᐊᑐᐃᓐᓇᐅᑎᑕᐅᕙᒃᑐᓂᒃ ᐊᑐᐃᓐᓇᖃᕐᕕᒋᓂᖅᓴᐅᓗᒋᑦ, ᐃᑲᔪᖅᓱᐃᓗᑎᓪᓗ ᐃᓕᖅᑯᓯᕐᓂᙶᖅᑐᓂᒃ ᓴᓇᙳᐊᖅᑎᓪᓗ ᓇᖕᒥᓂᖅᓱᕐᓂᖏᓐᓂᒃ
- ᓴᓇᙳᐊᖅᑎᐅᒍᕕᑦ ᐊᓯᖏᑎᒍᓪᓘᓐᓃᑦ ᓴᓇᙳᐊᕐᓂᓕᕆᕙᒃᑯᕕᑦ ᓲᕐᓗ ᑕᑯᔭᒐᖃᕐᕕᓕᕆᔨᐅᓗᑎᑦ, ᑎᑎᖅᑭᕆᔨᐅᓗᑎᑦ, ᖃᐅᔨᓴᖅᑎᐅᓗᑎᓪᓘᓐᓃᑦ ᓴᓇᐅᒐᕐᓂᒃ ᐃᓕᖅᑯᓯᕐᓂᒡᓗ
ᑕᒪᒃᑯᓂᖓᓕᒫᖅ ᐱᔪᓐᓇᙱᒃᑲᓗᐊᕈᕕᑦ ᑭᓯᐊᓂ ᕿᒥᕐᕈᔨᐅᖃᑕᐅᔪᒪᓪᓚᕆᒃᑯᕕᑦ, ᐆᒃᑐᖃᑕᐅᖁᕙᑦᑎᒋᑦ! ᐆᒃᑐᖁᔨᓪᓚᕆᒃᐳᒍᑦ ᐃᓄᖕᓂᒃ ᐃᓄᐃᑦ ᓄᓇᖓᓐᓃᑦᑐᓂᒃ, ᐃᓄᒃᑐᑦ ᐅᖃᓪᓚᒍᓐᓇᖅᑐᓂᒃ, ᖃᓄᑐᐃᓐᓇᖅ ᐊᔪᕈᑎᖃᖅᑐᓂᒃ, ᖃᓄᐃᑦᑑᒐᓗᐊᖅᐸᑕ, ᑕᐃᒪᐃᑦᑑᖃᑎᒥᓂᒃ ᐊᐃᑉᐸᖃᖅᐸᒃᑲᓗᐊᖅᐸᑕ.
ᐊᑭᓕᖅᑕᐅᓂᖓ:
ᕿᒥᕐᕈᔨᑦ ᑮᓇᐅᔭᑎᒍᑦ ᐊᑭᓕᖅᑕᐅᖃᑦᑕᕐᓂᐊᖅᐳᑦ ᒪᓕᒡᓗᒋᑦ ᑲᓇᑕᒥ ᓴᓇᙳᐊᖅᑐᓕᕆᔨᒃᑯᑦ ᐊᑐᐊᒐᖏᑦ ᐃᑲᔫᑎᖃᕐᓂᖏᓐᓄᑦ.
ᖃᓄᖅ ᐱᓇᔪᒍᓐᓇᕐᒪᖔᖅᐱᑦ:
ᐱᔪᒪᓂᖃᕈᕕᑦ ᕿᒥᕐᕈᔨᐅᖃᑕᐅᓂᕐᒧᑦ, ᐃᕐᖐᓐᓈᖅᑕᐅᑎᒃᑯᑦ ᑎᑎᕋᕆᑦ artistservices[at]inuitartfoundation[dot]org:
- ᐃᖅᑲᓇᐃᔮᕆᖃᑦᑕᖅᓯᒪᔭᕐᓄᑦ ᓇᓕᖅᑲᑦ
- ᓇᐃᑦᑐᒥᒃ ᓇᓗᓇᐃᖅᓯᓗᑎᑦ ᖃᓄᐃᒻᒪᑦ ᐃᓚᐅᖃᑕᐅᔪᒪᖕᒪᖔᖅᐱᑦ ᖃᓄᕐᓗ ᐱᔪᓐᓇᕐᓂᖃᕐᒪᖔᖅᐱᑦ
ᓂᕈᐊᖅᑕᐅᙱᒃᑯᕕᑦ ᕿᒥᕐᕈᔨᐅᓂᕐᒧᑦ 2022-2023−ᒧᑦ ᑮᓇᐅᔭᖃᖅᑎᑦᑎᓕᕆᓂᕐᒧᑦ, ᐸᐸᓐᓂᐊᖅᐸᕗᑦ ᑎᑎᕋᖅᓯᒪᔭᑎᑦ ᕿᒥᕐᕈᓂᕐᒧᑦ ᑲᑎᒪᔨᕋᓛᓂᒃ ᐊᑐᕆᐊᖃᕋᔭᕐᓂᕈᑦᑕ.
ᐊᐱᖅᑯᑎᒃᓴᖃᕈᕕᑦ, ᐃᓱᒫᓘᑎᖃᕈᕕᑦ ᐃᑲᔪᖅᑕᐅᔭᕆᐊᖃᕈᕕᓪᓘᓐᓃᑦ ᐆᒃᑐᕋᓱᐊᕐᓂᕐᒧᑦ, ᖃᐅᔨᒋᐊᕐᕕᒋᓗᒍ ᑲᐃᐅᓪ ᐊᓕᑲᒃ, ᐱᓕᕆᐊᒃᓴᓕᕆᔨ ᐅᕗᖓ kaleekuk[at]inuitartfoundation[dot]org ᐅᕝᕙᓘᓐᓃᑦ 647-498-7717 ᓇᕿᒃᑲᓐᓂᕐᓗᒍ 115