English Text
50-ᓂᒃ ᐊᕐᕋᒍᕐᑐᓕᕐᓂᒥᒃ ᓇᓪᓕᐅᓂᕐᓯᐅᓂᖃᕐᓱᑎᒃ, ᔫᓕ ᑯᕆᓃ, ᑲᒪᔨᒻᒪᕆᒋᔭᐅᔪᖅ ᑕᕐᕋᒥᐅᑦ ᓂᐱᖓᒃᑯᓄᑦ (TNI), ᐊᑖᑕᖓᓗ ᑯᓘᑦ ᑯᕆᓃ, ᑲᒪᔨᒻᒪᕆᐅᓯᒪᒻᒥᔪᖅ 1998-ᒥᑦ 2017-ᒧᑦ, ᐅᖄᒍᑎᖃᕐᐴᒃ ᖁᕕᐊᓲᑎᖃᕐᓱᑎᓪᓗ ᓄᐃᑕᐅᓯᒪᓂᖓᓂᒃ, ᐃᖏᕐᕋᓯᒪᓂᖓᓂᓪᓗ ᓯᕗᓂᑦᓴᖓᓂᓪᓗ ᑕᕐᕋᒥᐅᑦ ᓂᐱᖓᒃᑯᑦ.
ᔫᓕ ᑯᕆᓃ: ᑕᕐᕋᒥᐅᑦ ᓂᐱᖓ ᑐᓴᕋᑦᓴᓕᕆᔨᐅᔪᖅ ᓄᓇᕕᒻᒥ ᑐᓴᐅᒪᑎᑦᓯᔨᐅᑦᓱᓂ ᑕᑯᓐᓇᕋᑦᓴᖃᕐᑎᓯᔨᐅᑦᓱᓂᓗ ᓄᓇᕕᒻᒥᐅᓂᒃ ᐃᓄᑦᑎᑑᕐᑐᓂᒃ. ᐱᑦᔪᔨᔪᖅ 14-ᓂᒃ ᓄᓇᓕᓐᓂᒃ—ᑐᓴᕐᓴᐅᒍᓐᓇᓱᓂ ᓄᓇᓕᐊᕐᓯᒪᔪᓄᑦ, ᒪᙯᕝᕕᒦᑦᑐᓄᑦ ᐱᑐᑦᓯᒪᕕᐅᒍᓐᓇᓱᓂᓗ ᖃᕆᑕᐅᔭᒃᑯᑦ—ᑕᕿᕐᕋᒥᐅᑦ ᓂᐱᖓᑦ ᖃᐅᑕᒫᑦ ᓈᓚᐅᑎᒥᒃ ᑐᓴᕐᓴᐅᑎᑦᓯᖃᑎᐅᔪᖅ ᑕᓚᕖᓴᒃᑯᑐᓂᓗ ᑕᑯᑦᓴᐅᑎᑦᓯᓱᓂ ᓄᓇᕕᒻᒥᐅᓄᑦ ᐃᓄᑦᑎᑑᕐᑐᓂᒃ, ᓄᓇᕕᓕᒫᒨᓕᖓᔪᓂᒃ ᓄᓇᓕᒻᒨᓕᖓᑐᐃᓐᓇᑐᓂᓪᓘᓃᑦ ᑐᓴᕋᑦᓴᖃᓲᖅ, ᐅᓂᒃᑳᑐᐊᓂᒃ ᑲᑎᒪᓂᐅᔪᓂᓪᓗ ᐊᑑᑎᑎᓪᓗᒋᑦ ᑐᓴᕐᑕᐅᑎᑦᓯᕙᒻᒥᓱᓂ. ᑐᓴᕋᑦᓴᓕᕆᒍᑏᑦ ᐃᓚᒋᔭᐅᓪᓚᕆᑦᑐᖅ ᓄᓇᖃᕐᖄᓯᒪᔪᑦ ᓄᓇᓕᖏᓐᓄᑦ, ᐱᓗᐊᕐᑐᒥᒃ ᐅᖓᓯᑦᑐᒥᐅᓄᑦ ᐅᐸᒐᓐᓃᑑᒍᓐᓇᑐᓄᑦ. ᐅᖄᖃᑎᒌᒍᑎᐅᒍᓐᓇᑐᑦ, ᑐᓴᐅᒪᒍᑎᐅᓗᑎᓪᓗ ᓱᔪᖃᓕᕐᒪᖔᑦ ᓇᓂᑐᐃᓐᓇᖅ, ᓯᓚᓐᓂᐊᕈᑎᐅᔪᓂᒃ ᖃᐅᔨᒪᒍᑎᐅᓗᓂ ᒪᙯᑦᑐᓄᑦ, ᖃᐅᔨᒪᔭᐅᑎᑦᓯᔨᐅᑦᓱᓂᓗ ᐱᒻᒪᕆᐅᔪᓂᒃ ᑐᓵᒍᑎᐅᑦᓱᓂᓗ ᐅᖃᐅᓯᕐᒥᒃ. ᐊᓂᕐᕋᐅᔪᓕᒫᑦ ᓄᓇᕕᒻᒥ, ᖃᖓᑐᐃᓐᓇᓕᒫᖅ ᓈᓚᒐᓱᐊᓯᒍᓐᓇᑐᑦ ᑕᑯᓐᓇᕋᓱᐊᓯᓗᑎᓪᓘᓃᑦ ᑕᕐᕋᒥᐅᒃᑯᑦ ᑐᓴᕐᓴᐅᑎᑕᖏᓐᓂᒃ.
ᐊᕐᕌᒍᐃᑦ ᐱᒋᐊᕐᐸᓕᐊᓂᕕᓂᐅᔪᑦ ᑐᑭᓯᓇᕐᑎᑫᓐᓇᓚᕗᑦ ᑕᑯᒋᐊᖕᖏᓂᑦᑎᓂᒃ ᐱᕙᓪᓕᐊᓯᒪᓂᖓᓂᒃ ᑐᓴᕈᑎᓕᕆᔨᐅᑉ, 1970-ᐃᑦ ᐱᒻᒪᕆᐊᓘᓯᒪᒻᒪᑕ ᐱᕙᓪᓕᐊᑎᑕᐅᓕᕐᓂᖓᓄᑦ ᓄᓇᕕᐅᑉ.
ᓴᐅᒥᐊᓂᑦ: ᓯᐊᔭ ᐁᓐᓇᓕᒃ ᐁᑭ ᐱᑕ ᑕᔭᕋᕐᓗ ᓈᓚᐅᑎᒃᑰᑑᒃ
ᑯᓘᑦ ᑯᕆᓃ: 1970-ᐃᑦ ᐱᒋᐊᕐᖃᒥᐅᑎᓪᓗᒋᑦ ᐊᖏᖃᑎᒌᒐᓱᐊᕐᓂᒪᕆᖃᕐᓯᒪᕗᖅ ᑯᐯᑉ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᖓᓄᑦ (NQIA) ᑯᐯᒃᑯᑦ ᑲᕙᒪᖓᓄᑦ ᑲᕙᒪᑐᖃᒃᑯᓄᓪᓗ ᓄᐃᑦᓯᒍᑎᐅᑦᓱᓂ ᐊᑎᓕᐅᕐᑕᐅᓯᒪᔪᒥᒃ ᓯᕗᓪᓕᐹᓪᓚᕆᒻᒥᒃ ᓄᓇᑖᕈᑎᐅᔪᒥᒃ ᑲᓇᑕᒥ, ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓ (JBNQA), 1975-ᖑᑎᓪᓗᒍ. ᓲᑭᐊᖑᒐᓗᐊᖅ, ᑐᓴᕋᑦᓴᓕᕆᒍᑏᑦ ᐃᓚᐅᑎᑕᐅᓯᒪᖕᖏᑐᑦ ᐊᖏᖃᑎᒌᒐᓱᐊᕐᑐᓂ ᐅᐱᓐᓇᕋᓂ ᓄᓇᑖᕋᓱᐊᕐᓂᒧᑦ ᐊᖏᖃᑎᒌᒍᑎᐅᑉ ᐃᓗᐊᓂᖕᖏᓚᕿᔪᑦ, ᑌᒣᒻᒪᑦ ᐃᒻᒥᒎᕐᑐᑯᑦ ᐱᓇᓱᐊᕐᑕᐅᒋᐊᖃᕐᓂᖓ ᓄᐃᑕᐅᒋᐊᖃᕐᓯᒪᔪᖅ ᑐᓴᕋᑦᓴᓕᕆᓂᖅ ᓵᖕᖓᔭᐅᖁᑦᓱᒍ.
JG: ᖃᓄᕐᓖ ᐃᓱᒪᑖᖑᓐᓂᖃ ᑐᓴᕋᑦᓴᓕᕆᔨᕐᑖᕆᐊᖃᕐᓂᖅ, ᖃᓄᕐᓗ ᑯᐯᑉ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᖓ ᑐᑭᓯᑎᑦᓯᒍᓐᓇᓯᓐᓂᖃ ᑲᕙᒪᑐᖃᒃᑯᓂᒃ ᑐᓴᕋᑦᓴᓕᕆᓂᐅᑉ ᐊᑑᑎᖃᓪᓚᕆᓐᓂᖓᓂᒃ ᐱᓇᓱᐊᕈᑕᐅᒋᐊᖃᕐᓂᑯᑦ ᓄᓇᕕᒻᒥ?
CG: ᔫᓯᐱ ᐹᓪᓚᔮᑦ (1974–2024), ᐊᖓᔪᕐᖃᖑᒋᐊᖕᖓᓕᕐᑐᕕᓂᖅ ᑕᕐᕋᒥᐅᒃᑯᓂ, ᓯᕗᓪᓕᐸᐅᑦᓱᓂ ᐃᓄᑐᐃᓐᓇᐅᓱᓂ ᐱᓇᓱᑦᑎᑖᖑᓯᒪᔪᖅ NQIA-ᑯᓄᑦ ᐱᓇᓱᐊᕐᓂᐊᓕᕐᑎᓗᒍ ᑐᓴᕋᑦᓴᓕᕆᓂᕐᒨᓕᖓᔪᓂᒃ 1970-ᐃᑦ ᐱᒋᐊᕐᖃᒥᐅᑎᓪᓗᒋᑦ. ᐊᕐᕕᑕᕐᓂᖃᓯᓚᐅᕐᑐᕕᓂᖅ ᐊᑐᓂ ᓄᓇᓖᑦ ᑲᑎᒪᔨᖏᑦ ᐅᖄᖃᑎᒋᔭᐅᒋᐊᕐᑐᑎᓪᓗᒋᑦ ᑕᒪᓐᓇᓗ ᑐᓴᕈᑎᖃᑦᓯᐊᖏᓐᓂᖅ ᓄᓇᕕᒻᒥ ᐅᖄᔭᑦᓴᒪᕆᐅᖃᑕᐅᑎᓪᓗᒍ. ᐊᕐᕕᑕᕐᓂᖃᕇᕐᓯᒪᓕᕐᑎᓗᒍ, ᕿᒥᕐᕈᐊᖅ ᐊᑐᐊᒐᖅ ᑌᔭᐅᔪᖅ ᑕᕐᕋᒥᐅᑦ (Taqramiut); The Northerners; Les septentrionaux (1974) ᓄᐃᑕᐅᓕᓚᐅᕐᓯᒪᔪᖅ NQIA-ᑯᓄᑦ, ᐱᖓᓱᓂᒃ ᐅᖃᐅᓯᕐᓂᒃ ᐊᓪᓚᓯᒪᔪᕐᑕᖃᕐᓱᓂ ᑐᓂᔭᐅᓕᕐᓂᒥᔪᖅ ᑲᕙᒪᑐᖃᕐᑯᓄᑦ ᓄᐃᑕᑎᑦᓯᒍᑎᐅᒐᓱᐊᕐᓱᓂ ᐱᒻᒪᕆᐅᓂᖓᓂᒃ ᐃᓄᕐᓴᕈᑕᐅᓯᒪᔪᑦ JBNQA-ᒧᑦ, ᐃᓚᒋᔭᐅᑎᓪᓗᒍᑦ ᑐᓴᕈᑎᓕᕆᓂᖅ.
ᐃᓄᑐᖃᕐ ᐊᑭᓂᓯ ᓯᕗᐊᕌᐱᓪᓗ ᐱᓇᓱᐊᕐᑑᒃ ᓄᐃᑕᔪᑦᓴᓕᐊᖑᑎᓪᓗᒍ “ᑑᕐᙰᑦ ᖃᕐᖃᖏᑦᑕ ᒥᕐᖑᐃᓯᕐᕕᖓ, ᕿᒥᕐᕈᓂᖅ” ᐃᓅᖁᑎᕗᑦ, ᓄᓇᕗᑦ, ᑑᕐᙰᑦ ᖃᕐᖃᖏᑦᑕ ᒥᕐᒍᐃᓯᕐᕕᖓ, 2015
JG: ᑖᓐᓇ Northerners ᐊᑐᐊᒐᖅ ᑐᓂᔭᐅᓚᐅᕐᑎᓗᒍ ᑲᕙᒪᒃᑯᓄᑦ, ᑕᕐᕋᒥᐅᑦ ᓂᐱᖓᑦ ᓄᐃᑕᐅᓕᓚᐅᕐᓯᒪᔪᖅ ᑐᓴᕋᑦᓴᓕᕆᔨᐅᓂᐊᓕᕐᑎᓗᒍ ᓄᓇᕕᒻᒥ. ᖃᓄᐃᑦᑑᓯᒪᕙ ᐱᓇᓱᐊᕐᑕᐅᓂᖓ?
CG: ᐱᓇᓱᐊᕐᑕᐅᓂᖓ ᐱᒋᐊᕐᓯᒪᔪᖅ 1973-ᖑᑎᓪᓗᒍ, ᓯᕗᓪᓕᐹᑦᓯᐊᒥ ᓄᓇᕕᒻᒥ ᐊᑑᑎᒋᐅᕐᑐᒥᒃ ᑲᑎᒪᓂᖃᓕᕐᑐᕕᓂᖅ ᓴᓪᓗᓂ, ᓄᓇᕕᒻᒥ ᑐᓴᕈᑎᖃᕆᐊᖃᕐᓂᖅ ᑲᑎᒪᐅᑕᐅᑎᓪᓗᖑ, ᓄᓇᓖᑦ ᐊᑐᓂ ᑭᒡᒐᑐᑎᖃᕐᑎᓗᒋᑦ ᑲᑎᒪᔪᓂ. ᑕᕐᕋᒥᐅᑦ ᓂᐱᖓᑦ ᓄᐃᑕᐅᓪᓚᕆᓕᓚᐅᕐᓯᒪᔪᖅ ᓯᑎᒻᐱᕆ 8, 1975-ᒥ, ᖃᖏᕐᓂᑯᓕᐅᕐᑎᐅᖏᑦᑐᒥᒃ ᑎᒥᖕᖑᒍᑎᖃᕐᓱᓂ, ᑭᖑᓂᐊᒍᑦ ᑲᖏᕐᓂᑯᓕᐅᕐᑎᐅᖏᑦᑑᓂᕐᒥᒃ ᑯᐊᐳᕇᓴᖕᖑᓂᖃᓕᓚᐅᕐᓯᒪᔪᖅ 2014-ᒥ.
JG: ᑕᕐᕋᒥᐅᑦ ᓂᐱᖓᑦ ᐊᑦᔨᒌᖕᖏᑐᓂᒃ ᑐᓴᕋᑦᓴᓕᕆᒍᓯᖃᓕᕋᓗᐊᕐᑎᓗᒍ ᐅᓪᓗᒥ, ᓇᓗᓀᕐᓯᓂᖃᕆᐊᖃᕐᓯᒪᔪᖅ ᓯᕗᓪᓕᐸᐅᑦᔭᐅᔭᕆᐊᓕᒻᒥᒃ ᓄᓇᕕᒻᒥ. ᐱᓇᓱᐊᕋᑦᓴᓕᒻᒪᕆᐊᓘᓯᒪᔪᖅ, ᑭᓯᐊᓂ, ᓱᕐᖁᐃᓯᐊᕐᑐᒥᒃ ᓈᓚᐅᑎᒃᑯᑦ ᑐᓴᐅᒪᑎᑕᐅᓂᐅᒋᐊᓕᒃ ᐱᑕᖃᕆᐊᖃᕐᓂᖓ ᓇᓗᓀᕐᑕᐅᓯᒪᔪᖅ ᑭᖕᖑᒪᓇᕐᑐᓚᕆᐅᒋᐊᖓ.
ᓴᐅᒥᐊᓂᑦ: ᓵᓕ ᓯᕐᐸᓗᒃ, ᐹᐱ ᒣ ᓄᑲᕐᓯᖅ, ᓭᓚᓯ ᖁᒪᖅ ᓵᓕ ᐋᑕᒥᓗ ᐊᐅᓚᔫᓕᐅᕐᑕᐅᒪᔪᓂᒃ ᐱᓇᓱᐊᕐᑐᑦ
CG: ᑌᑦᓱᒪᓂ, ᓄᓇᕕᒻᒥᐅᑦ ᓰᐱᓰᒃᑯᑦ ᑕᕐᕋᒥᐅᓂᒃ ᓈᓚᐅᑎᒃᑯᑦ ᑐᓵᐅᒪᑎᑦᓯᒍᑎᖓᓂᒃ ᑐᓴᒍᓐᓇᑕᑐᐊᖃᕐᓯᒪᔪᑦ (ᐅᓪᓗᒥᐅᓕᕐᑐᖅ ᓰᐱᓰᑯᑦ ᐅᑭᐅᕐᑕᑐᒥ), ᐱᒋᐊᓚᐅᕐᑐᕕᓂᕐᒥᒃ 1960-ᓂ. ᓰᐱᓰᒃᑯᑦ ᐃᑭᑦᑑᒐᓗᐊᓂᒃ ᐃᓄᑦᑎᑑᕐᑐᓂᒃ ᑐᓴᕐᓴᐅᑎᑦᓯᖃᑦᑕᓯᒪᔪᑦ ᐅᐱᒋᔭᐅᓪᓚᕆᑦᓯᒪᔪᐃᓪᓗ ᑖᑯᐊ ᐃᓄᓐᓄᑦ.
ᑕᕐᕋᒥᐅᑦ ᓂᐱᖓᑦ ᐊᕐᕌᒍᓕᒫᒥ ᓄᐃᑕᓕᕐᑎᓗᒍ, ᐱᒋᐊᖕᖓᑕᐅᔪᖃᓕᕐᓂᒥᔪᖅ ᓄᓇᓖᑦ ᐱᑐᑦᓯᒪᐅᑎᒋᒍᓐᓇᑕᖓᓂᒃ ᐆᕚᕈᑎᓂᒃ ᓈᓚᐅᑎᓂᒃ ᐊᑐᐃᓐᓇᕈᕐᑕᐅᓱᑎᒃ ᑐᓴᐅᒪᖃᑎᒌᒍᑎᐅᓂᐊᕐᑎᓗᒋᑦ ᓄᓇᕕᒻᒥᐅᓄᑦ. ᑖᒃᑯᐊ ᐃᓂᓪᓚᑕᐅᕙᓪᓕᐊᓯᔪᕕᓃᑦ ᐊᑐᓂ ᓄᓇᓕᓐᓂ ᐊᐅᓚᑕᐅᑦᓱᑎᓪᓗ ᓄᓇᓕᐅᑉ ᑲᑎᒪᔨᖏᓐᓄᑦ.
ᐊᑦᔨᖑᐊᖓ ᒫᒃ ᒍᐊᑦ ᕿᒧᑦᓯᑐᖅ ᓄᐃᑕᔪᑦᓴᐅᑎᓪᓗᒍ “ᐊᑖᑕ ᐃᕐᓂᖓᓗ” ᓄᓇᒦᓐᓂᖅ ᐃᓄᐃᑦ ᓄᓇᖓᓐᓂ (2021–ᐅᓪᓗᒥᒧᑦ)
ᐊᓪᓗᕆᐊᕐᓂᒪᕆᐅᓯᒪᒻᒥᔪᕐᑕᐅᒃ ᓄᐃᑎᕐᑕᐅᓂᖓᑦ ᑐᓴᐅᑏᑦ ᓄᓇᓕᓐᓂ. ᑕᕐᕋᒥᐅᒃᑯᑦ ᓂᐱᓕᐅᕆᖃᑦᑕᑎᓪᓗᒋᑦ ᐅᓂᒃᑳᑐᐊᓂᒃ ᑐᓴᕋᑦᓴᓂᓪᓗ, ᐊᒥᓱᓕᐊᕆᑦᓱᒋᑦ ᖃᖓᑦᑕᔫᒃᑯᑦ ᐊᐅᓪᓚᑎᑦᓱᒋᑦ ᑐᔫᑎᐅᖃᑦᑕᓱᑎᒃ ᓄᓇᓕᓐᓄᑦ ᑐᓴᕐᓴᐅᔪᑦᓴᐅᑎᓪᓗᒋᑦ ᑐᓴᐅᑎᖏᑦᑎᒍᑦ. ᑕᒪᓐᓇ ᐃᓱᐊᕐᑐᑐᐃᓐᓇᐅᓯᒪᖕᖏᑑᒐᓗᐊᖅ ᐅᐱᓐᓇᕋᓂ ᖃᖓᑦᑕᔫᑦ ᑭᖑᕙᕐᑕᓂᖏᓐᓄᑦ ᓯᓚᕐᓂᓗᒻᒧᑦ ᑭᓯᐊᓂ ᓄᓇᓖᑦ ᐃᓄᑦᑎᑑᕐᑐᓂᒃ ᑐᓵᒍᓐᓇᓯᑦᓴᓕᕋᑕᕈᑎᕕᓂᖓᑦ.
ᑭᖑᓂᐊᖑᑦ, ᓂᐱᓕᐅᕐᓯᒪᔪᑦ ᓯᐱᓰᑯᓄᑦ ᒪᓐᑐᕆᐊᒥ ᑐᔫᑎᐅᖃᑦᑕᓯᓐᓂᒥᔪᑦ, ᓈᓚᐅᑎᖏᑦᑎᒍᑦ ᑐᓴᕐᑕᐅᓂᐊᓕᕐᓱᑎᒃ, ᑭᓯᐊᓂ ᐃᓓᓐᓇᖏᓐᓄᑦ ᓄᓇᓕᓐᓄᑦ ᑐᓴᕐᑕᐅᒍᓐᓇᖃᑦᑕᓯᒪᔪᑦ ᓯᐱᓰᒃᑯᑦ ᐱᐅᒃᑯᑎᖃᕈᓐᓇᓯᑎᑦᓯᓯᒪᒻᒪᑕ ᑕᓪᓕᒣᓐᓇᓂᒃ ᐅᓄᒋᐊᓐᓂᐹᓂᒃ ᐃᓄᓕᓐᓂᒃ ᓄᓇᓕᓐᓂᒃ. ᓯᐱᓰᒃᑯᓂᒃ ᑐᓴᕐᓴᐅᑎᑦᓯᒍᒪᒍᑎᒃ ᐊᓯᖏᓐᓂ ᓄᓇᓕᓐᓂ, ᑕᕐᕋᒥᐅᒃᑯᑦ ᑮᓇᐅᔭᖃᕐᑎᓯᒋᐊᖃᕐᓯᒪᔪᑦ ᓂᐅᕕᕆᐊᓕᓐᓂᒃ, ᐃᓕᔭᐅᒋᐊᓕᓐᓂᒃ ᓯᖁᒥᑦᓯᒪᑎᑦᓯᑌᓕᒍᑎᓂᓪᓗ ᐱᐅᒃᑯᑎᓂᒃ.
ᐊᑭᓂᓯ ᓯᕗᐊᕌᐱᒃ ᓘᑲᓯ ᓇᑉᐹᓗᓪᓗ ᐱᓇᓱᐊᕐᑑᒃ ᓄᐃᑕᔪᑦᓴᓕᐊᖑᑎᓪᓗᒍ “ᐅᕕᓗᕐᑕᓂᖅ ᓯᑰᑉ ᐊᑖᓂ ᑲᖏᕐᓱᔪᐊᒥ” ᓄᓇᕕᐅᑉ ᐃᔨᕐᑐᐊᖏᑦ (2011–2014), ᑲᖏᕐᓱᔪᐊᖅ, 2013
ᑕᒪᑦᓱᒪ ᑭᖑᓂᐊᐱᐊᒍᑦ, ᐱᑐᑦᓯᒪᒍᑎᒃ ᖁᒻᒧᐊᑎᑕᐅᓯᒪᓕᕐᑎᓗᒍ, Telesat Canada (Telesat-ᖑᓕᕐᑐᖅ) ᐱᒍᑦᔨᐸᓪᓕᐊᓯᔪᕕᓂᖅ ᓄᓇᕕᒻᒥᒃ, ᖃᐅᑕᒫᑦ ᓈᓚᐅᑎᒃᑰᕈᑎᐅᓂᐊᕐᑐᑦ ᐊᑐᐃᓐᓇᕈᕐᑎᑕᐅᖃᑦᑕᓯᔪᕕᓃᑦ ᑕᕐᕋᒥᐅᑦ ᐊᓪᓚᕕᒻᒪᕆᖃᕐᕕᖓᓂ ᓴᓪᓗᓂ ᑐᓴᕐᑕᐅᑎᑕᐅᖃᑦᑕᓯᑦᓱᑎᒃ ᖁᒻᒧᐊᑎᑕᐅᓯᒪᔪᕐᑎᒍᑦ ᓯᐱᓰᒃᑯᑎᒍᑦ ᒪᓐᑐᕆᐊᒥᑦ ᓂᐱᓕᐅᕐᓯᒪᖕᖏᑑᑦᓱᑎᒃ. ᑌᑦᓱᒪᓂ, ᑕᕐᕋᒥᐅᒃᑯᑦ ᑐᓴᕐᓴᐅᖃᑦᑕᑐᕕᓃᑦ ᒪᕐᕈᓂᒃ ᑫᕙᓪᓚᒍᓰᓐᓂᒃ ᖃᐅᑕᒫᑦ—ᐱᖓᓱᖕᖑᓂᐊᓕᕋᒥᒃ ᖃᐅᑕᒫᑦ—ᐊᓪᓕᕇᕐᑐᓂ ᓂᕿᑦᓯᕕᒻᒧᑦ. ᓄᓇᕕᒻᒥᐅᑦ ᐅᓪᓗᒥ ᓈᓚᐅᑎᒃᑯᓯᐊᕐᓂᓴᐅᔪᓂᒃ ᑐᓵᕙᓕᕐᑐᑦ ᐃᓄᑦᑎᑐᓪᓗ ᐱᑦᔪᔭᐅᒍᑎᖃᑦᓯᐊᓂᕐᓴᐅᓕᕐᓱᑎᒃ.
1999-ᖑᑎᓪᓗᒍ ᑕᕋᒥᐅᑦ ᓂᐱᖓᒃᑯᖏᑦᑕ ᑲᑎᒪᔨᖏᑦ ᐱᒻᒪᕆᓐᓂᒃ ᑐᑭᑖᕆᐊᖃᕐᓯᒪᔪᑦ, ᓄᐃᑎᕆᒍᑎᒋᓕᕐᓱᒍ ᓇᒻᒥᓂᖅ ᓄᓇᕕᓕᒫᒥ ᓈᓚᐅᑎᒃᑰᑎᑦᓯᓂᕐᒥᒃ. ᑕᒪᓐᓇ ᑌᒣᓚᕿᓯᒪᔪᖅ ᓯᐱᓰᒃᑯᑦ ᐊᓯᑦᔨᑎᕆᓂᕆᓯᒪᔭᖓᓄᑦ ᓈᓚᐅᑎᒃᑰᑎᑦᓯᓂᕐᒥᓂᒃ, ᖃᓄᐃᑦᑐᐃᑦ ᑐᓴᕐᓴᐅᔪᑦᓴᐅᒪᖔᑕ ᐊᐅᓚᑦᓯᓕᕐᓱᑎᒃ ᓄᓇᕕᒻᒨᓕᖓᔪᐃᓪᓗ ᑐᓴᕐᑕᐅᓂᑦᓴᖓᓂᒃ ᒥᑭᓪᓕᑎᕆᑦᓱᑎᒃ, ᑌᒣᒻᒪᑦ ᑕᕐᕋᒥᐅᒃᑯᑦ ᐱᑦᔪᔨᑦᓯᐊᓕᐅᒥᒍᒪᓯᔪᕕᓃᑦ ᓄᓇᕕᒻᒥᐅᓂᒃ ᐊᖏᓕᒋᐊᕆᓗᑎᒃ ᑐᓴᔭᐅᒍᓐᓇᑐᓂᒃ ᐃᓅᓱᑦᑐᓅᓕᖓᔪᓂᒃ ᐃᓄᑐᖄᕐᓅᓕᖓᔪᓂᓪᓗ ᓄᓇᕕᓕᒫᒧᓕᖓᔪᓪᓗ ᑐᓴᕋᑦᓴᓕᕆᓃᒃ ᐊᖏᓕᐅᒥᑎᑦᓱᒋᑦ. ᐱᔭᕆᐊᑭᑦᑑᓯᒪᖕᖏᑐᖅ ᓄᑖᒥᒃ ᓈᓚᐅᑎᒃᑯᑎᑦᓯᒍᑎᒥᒃ 14-ᓂᒃ ᓄᓇᓕᓐᓂᒃ ᖃᖓᑦᑕᔫᒃᑯᑭᓯᐊᓂ ᐅᐸᑦᑕᐅᒍᓐᓇᑐᓂᒃ ᐱᔪᔨᒐᓱᐊᕆᐊᖅ, ᑭᓯᐊᓂ ᐱᒍᓐᓇᓯᓯᒪᔭᕗᑦ!
ᐱᓇᓱᐊᕐᑐᑦ ᓄᐃᑕᔪᑦᓴᓕᐊᖑᑎᓪᓗᒍ “ᑕᓪᓗᕈᕐᓀ” ᓄᓇᒦᓐᓂᖅ ᐃᓄᐃᑦ ᓄᓇᖓᓐᓂ, ᐅᒥᐊᕐᑐᑐᑦ ᖁᐊᕐᑕᐅᑉ ᓴᓂᐊᓂ, 2021
2006-ᖑᑎᓪᓗᒍ ᑕᕐᕋᒥᐅᒃᑯᑦ ᓄᓇᕕᓕᒫᒧᑦ ᑐᓴᕐᓴᐅᒍᓐᓇᑐᒥᒃ ᓈᓚᐅᑎᒃᑰᕈᓐᓇᓯᓚᐅᔪᑦ 94.1 FM ᐱᒋᐊᕐᑎᑕᐅᑎᓪᓗᒍ, ᐊᐅᓚᑦᓯᒍᓐᓇᓯᑦᓱᑕ ᓱᓀᑦ ᑐᓴᕐᓴᐅᖃᑦᑕᓂᐊᕐᒪᖔᑕ ᖃᓄᐃᑦᑐᒥᓪᓗ ᐅᖃᐅᓯᕐᒥᒃ ᓈᓚᐅᑎᒃᑰᓕᕈᑦᑕ ᐊᑐᖃᑦᑕᓂᐊᕐᒪᖔᑦᑕ—ᐃᓕᖓᑎᑦᓱᒍ ᓄᓇᕕᒻᒥᐅᑦ ᐅᓇᒻᒥᓲᑎᖏᓐᓄᑦ. 9-ᒍᒥᑦ ᐅᓪᓛᑯᑦ 9-ᖑᒧᑦ ᐅᓐᓄᑯᑦ, ᑐᓴᕐᓴᐅᑎᑦᓯᕙᑦᑐᒍᑦ ᓂᐱᓕᐅᕐᓯᒪᒐᑎᒃ ᓂᑦᔭᑎᑕᐅᔪᓂᒃ, ᑐᓴᕐᓂᔮᕈᑎᓂᒃ, ᑐᓴᕋᑦᓴᓂᒃ, ᓯᓚᓐᓂᐊᑐᓂᒃ ᑎᒥᐅᔪᓪᓗ ᑲᑎᒪᓂᖃᕐᑎᓗᒋᑦ ᑐᓴᕐᓴᐅᑎᑦᓯᕙᑦᓱᑕ ᓈᓚᐅᑎᒃᑰᑎᑕᐅᑎᓪᓗᒋᑦ, ᐊᑐᐃᓐᓇᐅᑎᑕᐅᒻᒥᑎᓪᓗᒋᑦ ᑕᕐᕋᒥᐅᑦ ᖃᕆᑕᐅᔭᒃᑯᑦ ᐱᑐᑦᑕᐅᕕᖓᒍᑦ. ᑕᕐᕋᒥᐅᒃᑯᑦ ᐱᓇᓱᑦᑎᑖᕐᓯᒪᒻᒥᔪᑦ ᓄᓇᓕᓐᓂ ᑐᓴᕋᑦᓴᓂᐊᕐᑎᐅᔪᓂᒃ ᓄᓇᓕᒥᑕ ᑐᓴᕋᑦᓴᖏᓐᓂᒃ ᐅᓂᒃᑳᐸᑦᑐᓂᒃ, ᓄᓇᕕᒻᒥᐅᑦ ᓈᓚᒍᓐᓇᓯᑎᑦᓱᒋᑦ ᐅᐱᒍᓱᑦᓱᑎᓪᓗ ᓱᔪᖃᓕᕐᒪᖔᑦ ᖃᐅᔨᒪᑎᑕᐅᒋᐊᒥᒃ ᓄᓇᕕᓕᒫᒥ.
ᑖᓐᓇ ᐱᒋᐊᕐᑎᑕᕕᓂᐅᓕᕐᑎᓗᒍ ᑐᑭᓯᓴᓯᓚᐅᕐᓯᒪᔪᒍᑦ ᖃᐅᔨᒍᑎᒋᑦᓱᒍᓗ 94.1 FM ᐅᐱᒋᔭᐅᒋᐊᖓ ᐊᒥᓱᓄᑦ ᓄᓇᓕᒻᒥᐅᓄᑦ. ᐅᑦᑑᑎᒋᓗᒍ, ᐃᓅᓱᑦᑐᖅ ᐅᖃᕐᓯᒪᔪᖅ ᐊᓕᐊᒋᔭᖃᒻᒪᕆᓐᓂᕋᕐᓱᓂ ᐅᓪᓛᑯᑦ ᑐᓴᕐᓴᐅᑎᑦᓯᑎᓪᓗᒍ ᐃᓪᓚᓱᒃ ᐸᐅᔪᖏ (1941–2014), ᓲᓱᒋᔭᐅᓂᖃᑦᓯᐊᑐᐊᓘᑦᓱᓂ ᓄᓇᕕᒻᒥᐅᓄᑦ ᓈᓚᐅᑎᒃᑰᖃᑦᑕᓯᒪᔪᖅ. ᑲᐅᑦᔭᔪᖅ (2018), ᓄᓇᕕᐅᑉ ᐃᓄᖏᑦᑕ ᓱᓕᔪᖕᖑᐊᑎᖏᑦ, ᐅᓪᓗᒥ ᖃᐅᔨᒪᔭᐅᒍᑎᖃᓕᕐᑐᑦ ᐋᕐᓰᖅ ᓱᓕᔪᖕᖑᐊᑎᖏᓐᓂᒃ, ᓈᓚᐅᑎᒃᑯᑦ ᑐᓴᕐᓴᐅᓯᓚᐅᕐᓯᒪᔪᖅ 94.1 FM-ᑯᑦ ᐊᓕᐊᒋᔭᐅᒻᒪᕆᑦᓱᓂᓗ ᑐᓵᔪᓄᑦ ᓄᓇᕐᖃᑎᖏᑦᑕ ᓂᐱᖏᑦ ᑐᓴᕐᓴᐅᑎᑕᐅᒻᒪᑕ.
ᐊᑦᔨᖑᐊᖓ ᐲᑐᕆᔅ ᑎᐊᑉ ᓄᐃᑕᔪᑦᓴᓕᐊᖑᑎᓪᓗᒍ “ᓇᓴᓕᐅᖃᑎᖃᕐᓂᖅ ᐲᑐᕆᔅ ᑎᐊᒥᒃ - ᐱᖓᔪᐊᑦ” ᖃᓄᐃᓘᕐᓗᒎ ᓄᐃᑕᑎᑕᐅᒍᓯᖏᑦ (c. 2014–2015)
JG: ᐱᒻᒪᐅᕗᖅ ᓴᕐᕿᔭᕐᑎᑕᐅᔪᑦᓴᐅᓂᖓ ᑕᕐᕋᒥᐅᑦ ᓇᓚᐅᑎᖓ ᐊᕐᖁᑕᐅᓯᒪᒻᒪᑦ ᖏᓐᓇᓱᓂᓗ ᓂᑦᔭᓗᑦᑖᑎᓂᒃ ᓄᐃᑕᑎᑦᓯᒍᑎᐅᑦᓱᓂ ᓄᓇᕕᒻᒥ. ᓈᓚᐅᑎᒃᑯᑎᑦᓯᔨᕗᑦ ᐊᒥᓱᑦ ᖃᐅᔨᒪᔭᐅᒍᑎᖃᓕᕐᑐᑦ ᓂᑦᔭᓗᑦᑖᑎᓪᓚᕆᐅᓂᕐᒥᒃ, ᐅᑦᑑᑎᒋᓗᒍ ᔮᔨ ᖃᕐᖄᔪᖅ ᓴᓪᓗᒥᐅᑦ ᓂᑦᔭᓗᑦᑖᑎᖏᓐᓄᑦ ᐃᓚᐅᔪᖅ ᐊᒻᒪᓗ ᓵᓐᑎ ᑑᒪ ᑯᑦᔪᐊᑉ ᓂᑦᔭᓗᑦᑖᑎᖏᓂᒥᐅᔭᖅ; ᐃᓚᖏᓐᓄᑦ, ᐱᓇᓱᐊᕐᑎᐅᓂᒃᑯᑦ ᑕᕐᕋᒥᐅᒃᑯᓂ ᐱᒋᐊᕈᑎᐅᓯᒪᔪᖅ ᓂᑦᔭᓗᑦᑕᑎᖕᖑᓂᕐᒧᑦ ᑐᓴᕐᓂᔮᕐᑎᓯᔨᐅᓂᕐᒧᓗ.
CG: ᐊᕐᕌᒍᓂ ᐊᓂᒍᕐᓯᒪᓕᕐᑐᓂ, ᐃᑉᐱᒋᔭᖃᕐᓯᒪᕗᒍᑦ ᐃᓄᐃᑦ ᓂᑦᔭᓗᑦᑖᑏᑦ ᓈᓚᐅᑎᒃᑰᓯᑎᐅᓂᖃᕆᐊᖏᑦ ᑕᓚᕖᓴᒃᑰᑐᑦᓴᔭᓕᐅᕈᓐᓇᕆᐊᖏᓪᓗ. ᐊᒻᒪᓗᑦᑕᐅᒃ, ᐊᒥᓱᑦ ᓂᑦᔭᓗᑦᑕᑏᑦ ᐅᓂᒃᑳᑐᐊᕐᑏᓗ ᐱᒍᓐᓇᕕᖃᓚᕿᓯᒪᔪᑦ ᑐᓴᕐᑕᐅᑎᑦᓯᓱᑎᒃ ᓈᓚᐅᑎᒃᑯᑦ, ᑲᔪᖏᕐᓭᓚᕿᑦᓱᑎᒃ ᓄᓇᕕᒻᒥᐅᓂᒃ ᓄᐃᑎᕆᒍᓐᓇᓯᑎᑦᓱᒋᑦ ᑐᓴᕐᑕᐅᔪᑦᓴᓂᒃ ᐅᖃᐅᓯᕐᒥᓂᒃ ᐊᑐᕐᓗᑎᒃ, ᐱᒍᑦᔨᓂᕐᑕᖃᕐᓯᒪᒻᒪᑦ ᐃᓕᖓᑦᓯᐊᑐᒥᒃ ᐃᓄᑦᑎᑑᕐᑐᓄᑦ. ᐃᖕᖏᑎ-ᐃᖕᖏᕈᓯᓕᐅᕐᑎ ᓵᓕ ᐋᑕᒥ (1952–2008), ᓄᐃᑎᕆᔨᒋᓯᒪᔭᕗᑦ, ᐊᒥᓱᓂᒃ ᐃᖕᖏᖃᑦᑕᓯᒪᔪᖅ ᐃᖕᖏᕈᓯᓕᐊᕆᓯᒪᔭᒥᓂᒃ 94.1 FM-ᑯᑦ; “ᖁᕕᐊᓱᑉᐳᖓ” ᑐᓴᕐᓴᐅᖏᓐᓇᓕᒫᕐᑐᖅ ᐊᕐᕌᒍᓂ ᐊᒥᓱᓂ.
ᓘᑲᓯ ᐃᖃᓗᒃ ᐱᓇᓱᐊᕐᑐᖅ ᓄᐃᑕᔪᑦᓴᓕᐊᖑᑎᓪᓗᒍ “ᖃᔭᖅ” ᐃᓅᖁᑎᕗᑦ, ᓄᓇᕗᑦ, ᐃᓄᒃᔪᐊᖅ, 2016
ᐊᑦᔨᓕᐅᕆᔪᖅ ᔫᓕ ᖁᕆᓃ
JG: ᓈᓚᐅᑎᒃᑰᑎᑦᓯᒍᑏᒃᑦ ᐃᓂᓪᓚᓯᐊᑐᐊᕐᒪᑕ, ᑕᕐᕋᒥᐅᑦ ᐱᔭᑦᓴᖃᕆᐊᓪᓚᕈᒪᓯᒪᔪᖅ ᐃᓄᒃᑎᑐᑦ ᑕᓚᕖᓴᒃᑯᑐᑦᓴᓕᐅᕐᓂᒥᒃ. ᑭᓯᐊᓂ ᑕᒪᓐᓇ ᐊᑑᑎᓯᒪᔭᐅᓂᖓ ᐃᒻᒥᒎᓪᓚᕆᑦᑐᒥᒃ ᐅᓂᒃᑲᐅᓯᕐᑕᖃᕐᒥᔪᖅ.
CG: 1980-ᐃᑦ ᐱᒋᐊᕐᖃᒥᐅᑎᓪᓗᒋᑦ, ᑕᕐᕋᒥᐅᑦ ᓄᐃᑎᕆᔨᖕᖑᕋᑕᕐᑎᓇᒍ ᑕᑯᑦᓴᐅᑎᑦᓯᕋᑕᕐᑎᓇᒍᓗ ᐊᐅᓚᔫᓂᒃ ᐊᑦᔨᓕᐅᕐᑕᐅᓯᒪᔪᓂᒃ, ᑕᕐᕋᒥᐅᑦ ᐱᓇᓱᐊᖃᑎᖃᓯᓚᐅᔪᖅ ᓯᐱᓰᒃᑯᓂᒃ ᐃᓕᓐᓂᐊᑎᑦᓯᓱᑎᒃ ᐃᓄᓐᓂᒃ ᐊᐅᓚᔪᓂᒃ ᐊᑦᔨᓕᐅᕆᓂᕐᒥᒃ ᑕᑯᑦᓴᐅᓚᐅᕐᑎᓇᒋᓪᓗ ᐊᕐᕿᓱᐃᒍᓯᕐᓂᒃ. ᐊᐅᓚᔫᓕᐊᕕᓃᑦ ᓇᑲᑎᕐᓯᒪᔪᑦ, ᐊᕐᕿᓱᕐᑕᐅᒪᓕᕐᓱᑎᒃ ᓯᐱᓰᒃᑯᓅᕐᑕᐅᖃᑦᑕᓯᑦᓱᑎᒃ ᑕᑯᑦᓴᐅᑎᑕᐅᓂᐊᕐᓕᕋᒥᒃ.
ᐊᑦᔨᓕᐅᕈᑎᒃ ᐊᐅᓚᔫᓕᐅᕈᑎᒃ ᑲᓕᒐᕐᒦᑐᖅ ᓄᐃᑕᔪᑦᓴᓕᐊᖑᑎᓪᓗᒍ ᐃᓅᖁᑎᕗᑦ, ᓄᓇᕗᑦ ᐊᑦᓵᓯᔫᖅ, 2017
1987-ᒥ ᓄᓇᖃᕐᖄᓯᒪᔪᑦ ᑕᑯᓐᓇᕋᑦᓴᓕᐅᕐᑏᑦ ᓈᓚᐅᑎᒃᑰᑎᑦᓯᔩᑦ ᑲᓇᑕᐅᑉ ᐅᑭᐅᕐᑕᑐᖓᓂ ᑲᑎᓚᐅᕐᓯᒪᔪᑦ ᔨᐊᓗᓀᒥ, ᓄᓇᑦᓯᐊᒥ, ᓯᕗᓂᖃᕋᓱᐊᓕᕐᓱᑎᒃ ᓄᐃᑦᓯᒍᒪᓂᕐᒥᒃ ᐅᑭᐅᕐᑕᑯᒥ ᑕᓚᕖᓴᒃᑯᑎᑦᓯᓂᕐᒥᒃ, ᓄᐃᑦᓯᒍᑎᐅᓯᒪᔪᕐᓗ ᑲᓇᑕᐅᑉ ᐅᑭᐅᕐᑕᑐᖓᓂ ᑕᓚᕖᓴᒃᑯᑦ ᑕᑯᑦᓴᐅᑎᑦᓯᕕᖓᓂᒃ (TVNC) 1992-ᖑᑎᓪᓗᒍ. [1] ᑕᕐᕋᒥᐅᑦ ᐃᓚᒋᔭᐅᓯᒪᔪᖅ 13-ᓄᑦ ᓄᓇᖃᕐᖄᓯᒪᔪᓄᑦ ᑐᓴᕋᑦᓴᓕᐅᕐᑎᓄᑦ, ᑲᕙᒪᓄᑦ ᐃᓕᓐᓂᐊᓂᓕᕆᔨᓄᓪᓗ ᑲᓇᑕᐅᑉ ᐅᑭᐅᕐᑕᑐᖓᓂ ᓇᒻᒥᓂᖃᖃᑎᐅᑦᓱᓂ ᓄᐃᑎᕆᔨᐅᖃᑎᐅᑦᓱᓂᓗ ᑕᒡᒐᓂ ᑕᒡᒎᓇ ᑕᑯᑦᓴᐅᔪᑦᓴᓂᒃ. 1999-ᖑᑎᓪᓗᒍ ᑲᓇᑕᐅᑉ ᓈᓚᐅᑎᒃᑯᑐᓂ-ᑕᓚᕖᓴᒃᑯᑐᓂᒃ ᑐᓴᕋᑦᓴᓕᕆᐅᑎᓂᓪᓗ ᕿᒥᕐᕈᔨᖓᑦ ᐱᒍᓇᓯᑎᑦᓯᓕᓚᐅᔪᖅ TVNC-ᒥᒃ ᑲᓇᑕᓕᒫᒥ ᑕᑯᑦᓴᐅᑎᑦᓯᒍᓐᓇᓂᕐᒧᑦ ᐱᔪᓐᓇᐅᑎᑖᕐᑎᓱᒍ ᐊᑎᖓᓗ ᐊᓯᑦᔨᔭᐅᑦᓱᓂ ᓄᓇᖃᕐᖄᓯᒪᔪᑦ ᑕᓚᕖᓴᒃᑰᑎᑦᓯᒍᑎᖓᓕᐊᖑᑦᓱᓂ (APTN). ᓄᐃᑦᓯᖃᑎᐅᓯᒪᑦᓱᓂ ᑕᒪᑐᒥᖓ, ᑕᕐᕋᒥᐅᑦ ᐃᓚᐅᓯᒪᔪᑦ ᐊᓯᑦᔨᐸᓕᐊᓂᖓᓄᑦ TVNC APTN-ᖑᕋᓱᐊᕐᑎᓗᒍ ᐊᒻᒪᓗ ᓄᐃᑎᕆᖃᑎᐅᓯᒪᓕᕐᓱᓂ ᐱᔪᓐᓇᐅᑎᖃᕐᑎᓯᔨᐅᑦᓱᓂ ᑕᑯᑦᓴᐅᔪᑦᓴᓂᒃ ᐊᕐᕌᒍᓂ 25-ᓂ, ᐅᑦᑑᑎᒋᓗᒍ ᐃᓄᐃᑦ ᓄᓇᖓᓐᓃᓃᑦ (2021–ᑲᔪᓯᔪᖅ ᐅᓪᓗᒥᒧᑦ) ᐊᒻᒪᓗ ᓰᓚ: ᐃᓄᓯᖓ ᐱᓇᓱᐊᕐᓯᒪᔭᖏᓪᓗ ᓰᓚ ᒍᐊᑦ-ᑯᓗᑦᓰ (2008), ᓴᕐᕿᑎᑕᐅᓯᒪᔪᖅ ᑕᕐᕋᒥᐅᑦ ᑎᒥᖁᑎᖓᒍ ᑕᕐᕋᒥᐅᑦ ᑕᑯᓐᓇᕋᑦᓴᓕᕆᔨᒃᑯᖏᓐᓄᑦ.
ᐄᕙ ᓴᑭᐊᒐᖅ ᐊᐅᓪᓚᓗᒃ ᓂᐱᓕᐅᕆᔪᖅ ᐊᐱᕆᑦᓱᓂ ᔦᐱᑎ ᓄᖕᖓᒥᒃ
JG: ᓇᓗᓇᖕᖏᓯᐊᕐᑐᖅ, ᑕᕐᕋᒥᐅᑦ ᐃᓚᐅᓯᒪᓂᖓ ᐱᒍᓐᓇᓯᑎᑦᓯᖃᑎᐅᓯᒪᓪᓚᕆᒋᐊᖓ ᐃᓄᑦᑎᑑᕐᓂᖅ ᓴᕐᕿᔮᕐᑎᑕᐅᓂᖓᓂᒃ ᓈᓚᐅᑎᒃᑯᑦ ᑕᓚᕖᓴᒃᑯᓗ ᓄᓇᕕᒻᒥ ᑲᓇᑕᓕᒫᒥᓗ. ᑭᓯᐊᓂ, APTN-ᑯᑦ ᑲᓇᑕᓕᒫᒥ ᓄᓇᖃᕐᖄᓯᓚᔪᓅᓕᖓᔪᓂᒃ ᑕᓚᕖᓴᒃᑰᑎᑦᓯᔨᐅᒐᒥ, ᑕᑯᑦᓴᐅᑎᑦᓯᕙᓪᓗᓲᑦ ᖃᓪᓗᓈᑎᑑᕐᑐᓂᒃ, ᒍᐃᒍᐃᑎᑑᕐᑐᓂᓪᓗ ᐊᓯᖏᓐᓂᓗ ᓄᓇᖃᕐᖄᓯᒪᔪᑦ ᐅᖃᐅᓯᖏᓐᓂᒃ ᑲᓇᑕᒥ. ᐃᓄᑦᑎᑑᕐᑐᑦ ᑲᔪᓯᖏᓐᓇᕋᓗᐊᕐᓱᑎᒃ ᑕᑯᑦᓴᐅᑎᑕᐅᖏᓐᓇᕋᓗᐊᕐᓱᑎᓪᓗ ᑕᓚᕖᓴᒃᑯᑦ, ᐅᖃᐅᓯᕗᑦ ᓯᕗᓪᓕᐸᐅᓗᐊᓯᒪᖕᖏᑐᖅ. ᖃᓄᖅ ᑕᒪᓐᓇ ᓱᕐᕃᓯᒪᕙᑦ ᓄᓇᕕᒻᒥᐅᓂᒃ, ᑐᓵᒋᐊᓪᓛᕈᒪᔪᓂᒃ ᐃᓄᑦᑎᑑᕐᑐᓂᒃ?
CG: ᓄᓇᕕᒻᒥᐅᑦ ᐊᐱᕐᓱᖃᑦᑕᓯᓚᐅᕐᓯᒪᔪᑦ ᑕᑯᑦᓴᐅᔪᓂᒃ ᐃᓄᑦᑎᑑᕐᑐᓂᒃ ᐊᑐᐃᓐᓇᐅᓂᕐᓴᐅᖁᔨᑦᓱᑎᒃ ᓄᐃᑕᑎᑦᓯᒍᑎᐅᓂᐊᕐᑐᓂᒃ ᐃᓕᕐᕈᓯᕐᒥᓂᒃ, ᐃᓅᒍᓯᕐᒥᓂᒃ, ᐱᒍᓐᓇᓯᓯᒪᔭᒥᓂᒃ ᐊᓯᖏᓐᓂᓗ. ᑌᒣᒻᒪᑦ ᑕᕐᕋᒥᐅᑦ ᑲᑎᒪᔨᖏᑦ ᐊᐱᕆᓕᓚᐅᕐᓯᒪᔪᑦ ᐊᐅᓚᑦᓯᔨᖁᑎᒥᓂᒃ ᖃᐅᔨᓴᖁᓕᕐᓱᒋᑦ ᖃᓄᓪᓗᐊᑎᒋᒃ ᑮᓇᐅᔭᕐᑐᓂᖃᕋᔭᕐᒪᖔᑦ ᑕᒪᓐᓇ, ᓄᐃᑦᓯᒍᑎᐅᓕᓚᐅᕐᓯᒪᔪᖅ ᓄᑖᒥᒃ ᑕᑯᑦᓴᐅᑎᑦᓯᔨᒻᒥ, ᓄᓇᕕᐅᑉ ᓄᓇᓕᖏᓐᓂ ᑕᓚᕖᓴᒃᑯᑎᑦᓯᒍᑎᖓᓂᒃ (NCTv), 2010-ᒥ.
ᓴᐅᒥᐊᓂᑦ: Dave Stonier, ᐊᑭᓂᓯ ᓯᕗᐊᕌᐱᒃ ᑎᕕᑦ ᓯᖁᐊᕐᓗ ᐱᓇᓱᐊᕐᑐᑦ ᓯᕗᓪᓕᖓᓂ ᑐᖓᓕᐊᓂᓪᓗ “ᑑᕐᙰᑦ: ᐃᖏᕐᕋᓂᖅ ᓛᐸᑐᐊᒃᑯᑦ” ᐃᓅᖁᑎᕗᑦ, ᓄᓇᕗᑦ, ᑑᕐᙰᑦ ᖃᕐᖃᖏᑦᑕ ᒥᕐᖑᐃᓯᕐᕕᖓ, 2015
ᑌᒪᓪᓗᐊᖅ ᓄᓇᕕᓕᒫᒥ ᓈᓚᐅᑎᒃᑯᑎᑦᓯᓂᐅᑉ ᐃᓂᓪᓚᑕᐅᒐᓱᐊᕐᓂᕆᓯᒪᔭᖓᑎᑐᑦ ᐱᔭᕆᐊᑭᑦᑑᓯᒪᖕᖏᑐᖅ ᓄᐃᑎᕆᒐᓱᐊᕆᐊᒥᒃ ᓄᓇᓕᒻᒥ ᑕᓚᕖᓴᒃᑯᑎᑦᓯᒍᑎᐅᒍᓐᓇᑐᒥᒃ. ᐊᒥᓱᐃᑦ ᐊᑦᓱᕈᕐᓇᑑᓯᒪᔪᑦ, ᐅᑦᑑᑎᒋᓗᒍ ᑮᓇᐅᔭᖃᕆᐊᖃᕐᓂᖅ, ᐱᐅᒃᑯᑎᖃᕆᐊᖃᕐᓂᖓ ᐅᖓᓯᑦᑐᒥᐅᑦ ᓄᓇᓖᑦ, ᐅᓯᔭᐅᒋᐊᖃᕐᓂᖏᑦ ᐊᓯᖏᓪᓗ. ᓇᑯᕐᑐᕋᑕ, ᐊᑐᓂ ᓄᓇᓖᑦ ᑯᐊᐸᖏᑦ ᐃᑲᔪᕐᓯᓯᒪᒻᒪᑕ ᓄᓇᓕᐅᑉ ᐃᓗᐊᓂ ᓄᐃᑕᑎᑦᓯᕕᒻᒥᓂ ᐃᓂᓕᐅᕆᓚᐅᕐᓯᒪᒻᒪᑕ ᑕᑯᑦᓴᐅᑎᒍᒪᔭᑦᑎᓂᒃ. ᑕᕐᕋᒥᐅᒃᑯᑦ ᑕᑯᓐᓇᑕᐅᕙᓕᕐᑐᑦ ᓇᓂᓕᒫᑦᓯᐊᖅ ᓄᓇᕕᒻᒥ ᑕᓚᕕᓴᒃᑯᑦ ᑕᑯᑦᓴᐅᕕᒻᒥ 309-ᒥ.
ᑕᑯᓐᓇᑎᑦᓯᕕᕗᑦ ᐃᓗᓕᖃᕐᑐᑦ ᐅᐊᕈᑎᒌᓂᒃ ᓄᑖᓂᒃ ᓄᑕᐅᖕᖏᑐᓂᓪᓗ ᐃᓅᑦᑎᑑᕐᓱᑎᒃ ᑕᑯᑦᓴᐅᔪᓂᒃ, ᐅᑦᑑᑎᒋᓗᒍ ᐃᓅᖁᑎᕗᑦ, ᓄᓇᕗᑦ (2014–ᑲᔪᓯᔪᖅ ᐅᓪᓗᒥᒧᑦ) ᐊᒻᒪᓗ ᓄᓇᕕᒻᒥᐅᑦ (1999–2009). ᐱᒋᐊᖕᖓᓱᑕ ᑕᑯᑦᓴᐅᑎᑦᓯᕕᖃᖃᑦᑕᓯᒪᔪᒍᑦ ᐊᓂᕐᕋᓯᒪᓂᖏᓐᓂ ᐃᓄᐃᑦ—8–9 ᐅᓪᓛᑯᑦ, 12–1 ᕿᑎᕋᓕᕐᒥ ᐊᒻᒪᓗ 6–8 ᐅᓐᓄᑯᑦ ᐊᓪᓕᕇᕐᑐᓂᒃ ᓂᕿᑦᓯᕕᒻᒧᑦ, ᑕᑯᑦᓴᐅᑎᑦᓯᕙᑦᓱᑕᓗ ᐱᐊᕋᕐᓅᓕᖓᔪᓂᒃ ᐊᓪᓕᖏᓱᖓᕐᒥ ᐅᓪᓛᑯᑦ. ᐅᓪᓗᒥᐅᓕᕐᑐᖅ ᑕᑯᑦᓴᐅᑎᑦᓯᕙᓕᕐᑐᒍᑦ ᑫᕙᓪᓚᒍᓰᑦ 24, 7 ᐅᓪᓗᐃᑦ ᐱᓇᓱᐊᕈᓯᓕᒫᒥ.
Jean-Nicolas Orhon ᐃᑎᓯᑦᓱᓂ ᒍᐊᑦᑯᑦ ᐃᓚᒌᑦ ᐃᓪᓗᐊᐱᖓᓐᓄᑦ ᐊᑦᓵᓯᔫᑉ ᓴᓂᐊᓂ, ᓄᐃᑕᑦᓴᓕᐊᖑᑎᓪᓗᒍ “ᐊᑦᓵᓯᔫᓕᐊᓚᐅᕐᑕ” ᐃᓅᖁᑎᕗᑦ, ᓄᓇᕗᑦ, 2017
ᐊᑦᔨᓕᐅᕆᔪᖅ ᔫᓕ ᖁᕆᓃ
ᐊᒥᓱᐃᑦ, ᐃᓄᑐᐃᓐᓀᑦ ᐃᓄᑐᐃᓐᓇᐅᖏᑦᑑᒐᓗᐊᓪᓗ, ᐃᑲᔪᕐᓯᓯᒪᔪᒻᒪᕆᐊᓗᐃᑦ ᑕᕐᕋᒥᐅᑦ ᐱᒍᓐᓇᓯᓯᒪᓂᖓᓄᑦ. ᑌᓯᒐᓱᐊᕆᐊᖅ ᐊᑎᕐᓂᒃ ᓇᓗᓇᑐᐃᓐᓇᑐᖅ ᑕᒡᒐᓂ, ᑭᓯᐊᓂ ᖃᐅᔨᒪᕗᒍᑦ ᓄᓇᕕᒻᒥᐅᑦ ᑭᓇᐅᒻᒪᖔᒻᒥᒃ ᖃᐅᔨᒪᒻᒪᑕ, ᓇᑯᕐᒦᕈᒪᔭᕗᑦ ᐊᔪᐃᓐᓇᓂᕆᔭᓯᒪᔭᖓᓄᑦ ᐃᑲᔪᕐᓯᓯᒪᓂᖓᓄᓪᓗ ᓯᕗᓂᕐᒧᑦ ᑕᑯᓐᓇᕋᓱᐊᕐᓯᒪᓂᖓᓂᒃ ᓄᓇᓕᑦᑕ 50 ᐊᕐᕋᒍᐃᑦ ᓈᓯᒪᓕᕐᑎᓗᒋᑦ, ᑎᑭᐅᑎᒍᓐᓇᓯᓯᒪᒐᑦᑕ 94.1 FM-ᒧᑦ NCTv-ᒧᓪᓗ.
ᐊᒥᓱᓂᒃ ᐊᑦᓱᕈᕐᓇᑐᒃᑰᕈᑎᖃᕐᓯᒪᒐᓗᐊᕐᓱᑕ ᐊᐅᓚᑦᓯᒐᓱᐊᕐᓱᑕ ᖄᖏᕐᓂᑯᓕᐅᕐᑎᐅᖏᑦᑐᒥᒃ ᐱᓇᓱᐊᕐᕕᒥ ᐅᖓᓯᑦᑐᒥᐅᖑᑦᓱᑕ ᐊᕐᕋᒍᓂ 50-ᓂ ᓈᔪᓂ, ᑕᒪᒃᑯᐊ ᐱᒍᓐᓇᓯᓯᒪᔭᕗᑦ ᐃᑲᔪᕐᓯᒪᔭᐅᑦᓯᐊᓱᑕᓗ ᓄᓇᕕᒻᒥ ᐱᓇᓱᐊᕐᕕᒪᕆᐅᔪᓄᑦ, ᓄᓇᓖᑦ ᑲᕙᒫᐱᒃᑯᖏᓐᓄᑦ, ᓄᓇᓕᓐᓂ ᑯᐊᐸᓄᑦ ᓄᓇᕕᒻᒥᐅᓄᓪᓗ. ᐅᑉᐱᕆᔭᖃᑦᓯᐊᐳᖓ ᑕᕐᕋᒥᐅᒃᑯᑦ ᓯᕗᓂᖓ ᐱᐅᔪᓚᖓᒋᐊᖓ, ᑭᓯᐊᓂ ᐱᔭᕆᐊᑭᑦᑑᓚᖓᖕᖏᑐᖅ.
ᐊᐅᓚᑦᓯᒍᑎᑦᓴᓂᒃ ᑮᓇᐅᔭᖃᕆᐊᖃᕐᓂᖅ ᑐᓴᐅᒪᑎᑦᓯᓂᕐᒥᓗ ᓄᐃᑎᕆᓂᖅ ᓄᓇᕕᑐᐃᓐᓇᒨᓕᖓᔪᓂᒃ ᓯᕗᓪᓕᐸᐅᑦᔭᐅᔪᑦᓴᓕᐊᕆᓯᒪᔭᕗᑦ ᓯᕗᓂᕐᒧᑦ, ᑕᕐᕋᒥᐅᒃᑯᑦ ᐱᒍᓐᓇᓯᒍᑎᒋᓂᐊᕐᒪᖏᑦ ᐸᕐᓇᕈᓐᓇᓯᓗᓂ ᐊᑯᓃᕐᑐᒨᓕᖓᔪᓂᒃ ᐱᕈᕐᑎᓯᒋᐊᓪᓚᓗᓂᓗ ᐱᐅᓯᓕᑎᕆᓗᓂ ᑐᓴᕐᑕᐅᑎᒐᑦᓴᓕᐊᕗᓐᓂᒃ ᑕᑯᓐᓇᕋᑦᓴᓕᐊᑦᑎᓂᓪᓗ. ᓯᕗᓂᕐᒥᒃ ᑕᕐᕋᒥᐅᑦ ᓂᐱᖓᖃᖕᖏᑐᒥᒃ ᐃᓱᒪᒋᔭᖃᖕᖏᑐᖓ, ᑕᑯᓐᓇᖁᖓᓕ ᐱᐅᓂᕐᓴᓂᒃ ᑐᓴᐅᒪᑎᑦᓯᒍᑎᖃᕐᓂᒥᒃ ᑕᑯᓐᓇᕋᑦᓴᕈᑎᖃᕐᑎᓯᓂᕐᒥᒃ ᓄᓇᕕᓕᒫᒥ ᑕᕐᕋᒥᐅᒃᑯᑦ ᐊᕐᖁᑕᐅᑎᓪᓗᒋᑦ.
ᑲᖏᕐᓱᖅ, ᓄᓇᕕᒃ, ᑯᐯᒻᒥ, ᓯᕿᓂᖅ ᓂᐱᓕᕐᑎᓗᒍ, 2017
JG: ᓇᑯᕐᒦᒪᕆᐊᓗᒃ ᓄᐃᑦᓯᒍᓐᓇᕋᕕᑦ ᑕᕐᕋᒥᐅᒃᑯᑦ ᖃᓄᐃᑦᑐᑰᕐᓯᒪᓂᖓᓂᒃ. ᐅᖃᒍᑎᖃᑦᓯᐊᑐᒍᑦ ᐊᑑᑎᓯᒪᔪᓂᒃ ᐱᔭᕆᒍᓐᓇᓯᓯᒪᔭᑦᑎᓂᓪᓗ ᐅᓪᓗᒥᒧᑦ ᑎᑭᒍᑎᒋᓯᒪᓕᕐᑕᑎᓐᓂᒃ. ᐊᒥᓱᒻᒪᕆᐅᖏᓐᓇᑑᒐᓗᐊᑦ ᓵᖕᖓᔭᕆᐊᓕᕗᑦ ᓯᕗᒧᐊᕆᐊᓪᓛᓂᑦᑎᓂ, ᐅᑦᑑᑎᒋᓗᒍ ᑮᓇᐅᔭᖃᑦᓯᐊᖏᓐᓂᐅᕙᑦᑐᖅ. ᑭᓯᐊᓂ, ᐃᑲᔪᕐᓯᒪᔭᐅᓂᕗᑦ ᓄᓇᕕᒻᒥ, ᑯᐯᒻᒥ ᑲᓇᑕᒥᓗ ᐱᓇᓱᐊᖃᑎᒋᕙᑦᑕᑎᓐᓄᑦ ᖁᓚᖕᖏᔪᑎᒋᔭᕗᑦ. ᑐᓴᕋᑦᓴᓕᕆᓂᖅ ᐊᓯᑦᔨᕙᓪᓕᐊᒪᑦ ᓱᑲᑦᑐᐊᓗᒻᒥᒃ, ᓅᒋᐊᕐᓂᕗᑦ ᐊᑦᔨᒌᓕᔪᒃᑯᑦ ᓴᖑᔪᐃᑦᑐᑯᓪᓗ ᐱᓇᓱᐊᕐᕕᐅᓯᒪᔪᓂᑦ ᖃᕆᑕᐅᔭᒃᑯᑦ ᓄᐃᑕᑎᑦᓯᕕᐅᒍᓐᓇᓕᕐᑐᓄᑦ, ᑭᓯᐊᓂ ᑕᒪᒃᑯᐊ ᓄᑖᑦ ᐱᕕᖃᕐᑎᓯᒍᑎᐅᔪᑦ ᑐᓵᖃᑦᑕᓂᐊᕐᑐᓂᒃ ᑕᑯᓐᓇᖃᑦᑕᓂᐊᕐᑐᓂᓪᓗ ᓄᓇᕕᐅᑉ ᓯᓚᑖᒻᒪᕆᐊᓗᖓᓃᑦᑐᓂᒃ, ᑕᑯᑦᓴᐅᑎᑦᓯᒍᓐᓇᕈᑎᒋᓂᐊᕋᑦᑎᒋᑦ ᑐᓵᔭᐅᑎᑦᓯᒍᑎᒋᓗᒋᓪᓗ ᐅᓂᒃᑲᐅᓯᑦᑎᓂᒃ ᐃᓕᕐᕈᓯᑦᓯᐊᕌᓗᑦᑎᓂᓪᓗ ᓄᓇᕐᔪᐊᓕᒫᒧᑦ.
ᑯᓘᑦ ᑯᕆᓃ ᐃᓕᓐᓂᐊᓯᒪᐅᑎᓕᒃ MA-ᒥᒃ ᐅᓄᒋᐊᑦᑐᖏᑦᑐᑦ ᓄᓇᖓᓂ ᐊᐅᓚᑦᓯᒍᓐᓇᐅᑎᓂᒃ ᕿᒥᕐᕈᑎᐅᓂᕐᒥᒃ ᐊᒻᒪᓗ 40 ᐊᕐᕌᒍᐃᑦ ᐅᖓᑖᓄᑦ ᐱᓇᓱᐊᕐᓯᒪᓂᖃᓕᕐᓱᓂ ᑲᒪᔨᒻᒪᕆᐅᖃᑕᐅᓂᕐᒥᒃ ᓄᓇᕕᐅᑉ ᐱᓇᓱᐊᕐᕕᒪᕆᖏᓐᓂ, ᐃᓚᖃᕐᑎᓗᒍ ᑲᒪᔨᒻᒪᕆᐅᓂᕐᒥᒃ ᑕᕐᕋᒥᐅᒃᑯᓂ 1998-ᒥᑦ 2017-ᒧᑦ. ᐃᓚᐅᓯᒪᓕᕐᑐᖅ ᓄᐃᑎᕆᔨᐅᓂᕐᒧᑦ 200 ᐅᖓᑖᓃᑦᑐᓂᒃ ᑕᓚᕖᓴᒃᑰᑐᑦᓴᓂᒃ ᓈᓚᐅᑎᒃᑰᑐᑦᓴᓂᓪᓗ, ᓯᕗᓕᕐᓯᒪᓪᓚᕆᑦᑐᖅ 94.1 FM NCTv-ᓗ ᓄᐃᑎᕐᑕᐅᓂᖏᓐᓂᒃ, ᐅᓪᓗᒥᓗ ᑲᔪᓯᔪᖅ ᑭᒡᒐᑐᕐᓱᓂ ᓄᓇᕕᐅᑉ ᓄᓇᓕᖏᓐᓂᒃ ᑐᓴᕋᑦᓴᓕᕆᓂᕐᒨᓕᖓᔪᓂᒃ ᐱᓇᓱᐊᒐᖃᕐᓱᓂ ᐊᖏᕈᑎᑎᒍᑦ ᐱᓇᓱᑦᑎᐅᓱᓂ.
ᔫᓕ ᑯᕆᓃ ᑯᑦᔪᐊᒥᐅᔭᖅ, ᓄᓇᕕᒃ, ᑯᐯᒻᒥ ᑲᒪᔨᒻᒪᕆᒋᔭᐅᔪᖅ ᑕᕐᕋᒥᐅᒃᑯᓄᑦ. ᐊᒥᓱᓂᒃ ᐱᓇᓱᐊᒐᖃᖃᑦᑕᓯᒪᔪᖅ ᑕᕐᕋᒥᐅᒃᑯᓃᓚᐅᕋᓂ ᑐᑭᒧᐊᑦᓯᓯᒪᓕᕐᑐᖅ ᐊᒥᓱᓂᒃ ᑕᕐᕋᒥᐅᒃᑯᑦ ᑕᓚᕖᓴᒃᑯᑦ ᑕᑯᑦᓴᐅᑎᒐᑦᓴᖏᓐᓂᒃ. ᐃᓄᐃᑦ ᕿᒥᕐᕈᐊᕋᖓᓂ ᑲᑎᒪᔨᓄᑦ ᐃᓚᒋᔭᐅᔪᖅ ᑐᑭᒧᐊᑦᑎᓯᔨᒋᔭᐅᑦᓱᓂᓗ APTN-ᑯᑦ ᑲᑎᒪᔨᖏᓐᓂ. ᓴᓇᖕᖑᑎᐅᑦᓱᓂ, ᓴᐸᖓᓕᕆᓲᖅ, ᒥᕐᓱᓲᖅ ᓴᓇᖕᖑᐊᑎᐅᔪᓂᓪᓗ ᑲᑎᒪᓂᐊᕈᓯᖃᕐᑎᓯᔨᐅᓲᖑᑦᓱᓂ.
ᐃᓄᑦᑎᑑᓕᕐᑎᑕᐅᔪᖅ MKL Consulting Inc.-ᒧᑦ
ᖃᐅᔨᒪᔭᐅᒋᐊᓕᒃ
1 ᑐᑭᓯᒋᐊᓪᓚᕈᒪᒍᑦᓯ APTN ᓄᐃᒋᐊᖕᖓᓯᒪᓂᖓᓂᒃ, ᑕᑯᒋᐊᕈᓐᓇᑐᓯ Jennifer David, ᐃᓄᕐᖄᖑᓯᒪᔪᑦ, ᑕᓚᕖᓴᒃᑯᑎᑦᓯᖃᕐᓂᖅ: ᓄᐃᑕᐅᓂᖓ ᓄᓇᖃᕐᖄᓯᒪᔪᑦ ᑕᓚᕖᓴᒃᑰᑎᑦᓯᕕᖓ (Theytus Books, 2024).
This Feature was originally published in the Spring 2025 issue of the Inuit Art Quarterly.