English Text
ᐲᑐᕆᔅ ᑎᐊ ᓄᐃᑎᕆᕙᓪᓕᐊᓯᒪᔪᖅ ᐅᑭᐅᑭᑦᑐᐊᐱᐅᑦᓱᓂᓱᓕ. ᓂᑦᔭᓗᑦᑖᑎ-ᐃᖕᖏᕈᓯᓕᐅᕐᑎ ᑕᑯᑦᓴᐅᔪᑦᓴᓂᓪᓗ ᓴᕐᕿᑎᕆᔨ ᖁᐊᕐᑕᒥᐅᔭᖅ, ᓄᓇᕕᒻᒥ, ᑯᐯᒻᒥ, ᒥᕐᓱᕆᐊᖕᖓᖃᑦᑕᓯᒪᔪᕕᓂᖅ ᓂᑦᔭᓗᑖᕈᑎᓕᐅᕐᓱᓂᓗ ᐃᓅᓱᑦᑐᕖᖕᖓᐅᓱᓂ, 2004-ᒥ ᓄᐃᑦᓯᒋᐊᖕᖓᓯᒪᔪᖅ ᓂᑦᔭᕈᑎᒥᒃ. ᓯᕗᒧᐊᕆᐊᕐᓗᑕ ᐊᕐᕌᒍᓄᑦ ᐊᕙᑎᓄᑦ, ᑎᐊ ᐊᒥᓱᕕᑦᓱᓂ ᑎᒃᑯᐊᑕᐅᒍᑎᖃᕐᓯᒪᓕᕐᖁᖅ ᓂᑦᔭᓗᑦᑖᑎᐅᓂᕐᒧᑦ ᓯᑕᒪᐅᔪᖕᖏᒐᕐᑐᓂᒃ ᓂᑦᔭᕈᑎᓕᐅᕐᓯᒪᓕᕐᑐᖅ ᓯᑕᒪᐅᔪᖕᖏᒐᕐᑐᖓᑦ ᓄᐃᓛᓕᕐᒥᑎᓪᓗᒍ, ᓴᐸᖓᓕᐅᕐᓯᑎᒃ ᐊᓐᓄᕌᓕᐅᕐᓯᑎᐅᑦᓱᓂᓗ, ᐊᑕᓂᐊᓘᑉ ᑭᒡᒐᑐᕐᑎᖓᓂ ᒥᐊᔨ ᓭᒪᒥᒃ, CC, CMM, COM ᐊᓐᓄᕌᓕᐅᖃᑦᑕᓯᒪᓕᕐᑐᖅ, ᑎᑭᐅᑎᔭᖃᕈᒪᔫᑦᓱᓂᓗ ᓴᕐᕿᑎᕆᔨᐅᓂᕐᒥᒃ, ᓴᕐᕿᑎᕆᓯᒪᓕᕐᑐᖅ, ᑐᑭᒧᐊᑦᑎᓯᑦᓱᓂ ᑐᖕᖓᓱᑦᑎᓯᔨᐅᑦᓱᓂᓗ ᐅᖄᔨᐅᓂᒃᑯᑦ ᐊᒥᓱᓂ ᐊᑦᔨᐅᖏᑦᑐᓂ ᑕᓚᕖᓴᒃᑯᑦ ᑕᑯᑦᓴᐅᔪᑦᓴᓂ ᓂᐱᓕᐅᕐᓯᒪᔪᒃᑯᓗ ᑐᓴᕐᑕᐅᒐᑦᓴᔭᐅᑦᓱᑎᒃ ᑲᔪᓯᑦᑕᑐᓂ, ᐃᓚᖃᕐᒥᔪᑦ ᐊᒥᓱᓂᒃ ᐃᓄᑦᑎᑑᕐᑐᓂᒃ. ᑕᒡᒐᓂ ᐅᖄᖃᑎᒌᓐᓂᒥ, ᐃᓄᐃᑦ ᐅᖄᖃᑎᖃᕐᑐᖅ ᑎᐊᒥᒃ ᐅᐱᒋᓇᕐᑐᐊᓗᒻᒥᒃ ᓄᐃᑎᕆᔨᓪᓚᕆᐅᓂᒃᑯᑦ ᐊᑑᑎᓯᒪᔭᖓ ᐱᓪᓗᒍ, ᐃᓱᒪᒋᑦᓱᒍ 20-ᓂᒃ ᐊᕐᕌᒍᓂᒃ ᐊᓯᑦᔨᐸᓪᓕᐊᓂᕆᓯᒪᔭᖓ ᓴᓇᖕᖑᐊᑎᓪᓚᕆᐅᓂᒃᑯᑦ ᐊᑦᔨᒌᖕᖏᑐᑎᒍᓪᓗ ᑐᓴᕋᑦᓴᓕᐅᕐᑎᐅᓂᒃᑯᑦ.
ᐃᓄᐃᑦ: ᖃᖓ ᐱᓇᓱᐊᕆᐊᓯᓐᓂᕿᑦ ᓄᐃᑎᕆᓂᒃᑯᑦ?
ᐲᑐᕆᔅ ᑎᐊ: ᒥᕐᓱᕆᐊᖕᖓᓯᓚᐅᓯᒪᕗᖓ 13-ᓂᒃ ᐅᑭᐅᖃᓱᖓ ᑲᔪᓯᓯᒪᔪᖓ ᓄᕐᖃᓚᐅᕐᓯᒪᓇᖓ. ᐊᓱᐃᓚ ᑐᓴᕐᓂᔮᕈᑎᓕᐅᕆᐅᓯᓚᐅᕐᓯᒪᒻᒥᔪᖓ 15-ᓂᒃ ᐅᑭᐅᖃᓕᕐᓱᖓ. ᐃᖕᖏᕈᓯᓕᐊᕆᓯᒪᔭᕋ ᓯᕗᓪᓕᐹᖅ ᐊᓪᓚᓚᐅᕐᓯᒪᔭᕋ ᐃᓚᖃᕐᓱᖓ ᐊᓂᑦᓴᕋᓂᒃ ᔮᔨᒥᒃ, ᑖᓐᓇ ᓂᑦᔭᓗᑦᑖᑎ Twin Flames-ᒥ. ᑯᑭᑦᑕᐸᑦᑎᓗᒍ ᐅᖃᐅᓯᓕᐅᖃᑎᒌᓚᐅᕐᓯᒪᔪᒍᒃ. ᐊᑯᓂ ᐊᓪᓚᑐᐃᓐᓇᐸᓚᐅᕐᑐᖓ ᑐᓴᕐᓂᔮᕈᑎᓂᒃ ᐅᖃᐅᓯᖏᓐᓂᓗ ᐃᖕᖏᕈᓯᓕᐊᕐᒪ ᐊᖑᑎᒋᓯᒪᔭᕋ ᐃᓚᒋᑦᓱᒍ…12-ᒐᓚᓐᓂᒃ ᐊᕐᕌᒍᓂᒃ. ᓄᐃᑦᓯᓕᓚᐅᕐᓯᒪᔪᒐ ᐱᑐᕆᔅ ᑎᐊ ᓂᑦᔭᓗᑖᖃᑎᖏᓐᓂᒃ ᐊᖑᑎᒐᓂᒃ ᐊᕕᑦᓯᓯᒪᓕᕐᓱᖓ, ᑖᒃᑯᐊᓗ ᓂᑦᔭᓗᑦᑖᖃᑎᒋᓯᒪᓕᕐᑕᑲ 2012-ᒥᓂᑦ.
ᐊᑦᔨᖑᐊᖓ ᐲᑐᕆᔅ ᑎᐊᑉ, 2023 ᐊᑦᔨᓕᐅᕆᔪᖅ Christyna Pelletier
ᐃᓄᐃᑦ: ᖃᑦᓯᓂᒃ ᓂᑦᔭᕈᑎᓂᒃ ᓄᐃᑦᓯᓯᒪᓕᕐᕿᑦ?
ᐲᑐᕆᔅ: ᓯᑕᒪᐅᔪᖕᖏᒐᕐᑐᓂᒃ—ᐲ ᑐᐃᓐᓇᖅ (2004), ᐃᒻᒥᓂᓪᓗ ᑌᓯᔪᖅ ᓂᑦᔭᕈᑎᒃ ᐲᑐᕆᔅ ᑎᐊ (2010), ᐅᑭᐅᕐᑕᑐᒥ ᖁᕕᐊᓱᕝᕕᒃ (2010), ᑎᕆᒐᓐᓂᐊᖅ (2015), ᐊᓯᑦᔨᓂᖅ (2021) ᐊᒻᒪᓗ ᐃᖕᖏᓗᑦᑖᕈᓯᐊᕈᐃᑦ (2023), ᒫᓐᓇᓗ ᓯᑕᒪᐅᔪᕐᑑᒍᑎᖓᓂᒃ ᐱᓇᓱᐊᓕᕐᒥᔪᖓ. ᓄᐃᓛᕐᑕᕗᑦ 2025-ᒥ.
ᐃᓄᐃᑦ: ᐊᓕᐊᓇᖅ!
ᐲᑐᕆᔅ: ᐊᓕᐊᓇᕐᑐᒪᕆᒃ.
ᐲᑐᕆᔅ ᑎᐊ, ᓂᑦᔭᓗᑦᑖᑐᖅ ᒪᓐᑐᕆᐊᒥ ᓄᓇᖃᕐᖄᓯᒪᔪᑦ ᓇᓪᓕᐅᓂᕐᓯᐅᑎᑦᓯᑎᓪᓗᒋᑦ, ᒪᓐᑐᕆᐊ, ᑯᐯᒻᒥ, 2018 ᐊᑦᔨᓕᐅᕆᔪᖅ Daniel Haber
ᐃᓄᐃᑦ: ᓂᑦᔭᓗᑦᑖᕈᓰᑦ ᐊᓯᑦᔨᓯᒪᓚᕆᒃᑲ ᑌᒪᖕᖓᓂᑦ ᐱᒋᐊᓕᕐᓂᕋᕕᑦ?
ᐲᑐᕆᔅ: ᐃᓱᒣᓐᓇᖅ. ᐃᓅᓯᕋᓂ ᐊᑑᑎᓯᒪᔭᒃᑲᓄᑦ, ᐱᕙᓪᓕᐊᓂᕆᓯᒪᔭᕋᓄᑦ. ᐱᕈᕐᓯᒪᓪᓚᕆᒃᑯᖓ ᐃᑉᐱᓂᐊᕐᓂᑯᑦ. ᒪᒥᓯᒪᓪᓚᕆᑦᓱᖓᓗ. ᓂᐱᒐᒍᑦ, ᐅᖃᕈᓐᓇᑐᖓ ᐃᖕᖏᓯᑎᐅᓂᕐᓴᐅᓕᕆᐊᖅ ᐃᓅᓱᑦᑐᓚᐅᕐᓯᒪᓂᕋᓂᑦ ᓂᑦᔭᓗᑦᑖᑎᑦᓯᐊᒪᕆᐊᓗᓐᓂᓗ ᐱᓇᓱᐊᖃᑎᕐᓱᖓ ᑐᓴᕐᓂᔭᕐᑎᓯᓯᑎᐊᓗᓐᓂᒃ. ᓂᑦᔭᓗᑦᑖᓕᐅᕈᓯᒐ ᐊᓯᑦᔨᓯᒪᓪᓚᕆᑦᑐᖅ.
ᐃᓄᐃᑦ: ᑕᕐᕋᒥᐅᑦ ᓂᐱᖓᒃᑯᓂ (TNI) ᐊᑯᓂᒍᓗᒃ ᐱᓇᓱᐊᕐᓯᒪᒻᒥᔪᑎᑦ. ᑕᒪᓐᓇ ᖃᓄᖅ ᐊᑑᑎᖃᕐᓯᒪᕙ ᐱᔪᓐᓇᓂᕆᔭᕐᓄᑦ?
ᐲᑐᕆᔅ ᑎᐊ, ᑕᕐᕋᒥᐅᑦ ᓂᐱᖓᒃᑯᓂ ᐱᓇᓱᐊᕐᑐᖅ, 2016 ᐲᑐᕆᔅ ᑐᓂᓯᒪᔭᖓ
ᐲᑐᕆᔅ: ᐱᓇᓱᑦᑎᕈᓪᓚᕆᓚᐅᕐᓇᖓ ᑕᕐᕋᒥᐅᒃᑯᓂ, ᐊᖏᕈᑎᑎᒍᑦ ᐱᓇᓱᐊᕈᑦᔨᖃᑦᑕᓚᐅᔭᒃᑲ ᑕᓚᕖᓴᒃᑰᑦ ᑕᑯᑦᓴᐅᔪᓂᒃ ᑐᖕᖓᓱᑦᑎᓯᔨᐅᑦᓱᖓ ᐊᒻᒪᓗ ᑕᑯᑦᓴᐅᔪᓂᒃ ᓂᐱᓕᐅᕐᓯᒪᔪᑎᒍᑦ ᐅᓂᒃᑳᑎᐅᑦᓱᖓ. 2016-ᒥ ᐱᓇᓱᒐᕐᒧᑦ ᐃᓕᒐᓱᐊᓯᓚᐅᕐᓯᒪᔪᖓ ᑕᓚᕖᓴᒃᑰᑐᑦᓭᑦ ᓄᐃᑎᕐᑕᐅᓂᖓᓄᑦ ᑲᒪᔨᐅᔪᒧᑦ. ᓂᑦᔭᓗᑦᑖᑎᐅᓕᕇᓚᐅᔪᖓ ᑖᑦᓱᒧᖓ ᐱᓇᓱᒐᕐᒧᑦ ᐃᓕᒐᓱᐊᓕᕐᓱᖓ, ᑕᕐᕋᒥᐅᒃᑯᓗ ᖃᐅᔨᒪᓚᐅᔪᔪᑦ. ᐅᖃᐅᑎᓚᐅᔭᒃᑲ ᐅᐱᒍᓱᓪᓚᕆᒐᔭᕆᐊᖅ ᐃᑲᔪᕐᓯᒪᔭᐅᓂᖃᕈᒪ ᐱᓇᓱᕝᕕᒐᓄᑦ ᐊᐅᓪᓚᑲᑦᑕᕆᐊᖃᓯᑐᐊᕈᒪᑦ ᓂᑦᔭᓗᑦᑖᕆᐊᕐᑐᓗᖓ, ᐊᖏᖃᑎᒌᓯᓚᐅᕐᓯᒪᔪᒍᑦ ᐊᐅᓪᓚᑲᑦᑕᕈᓐᓇᓂᐊᕐᑎᓗᖓ ᐱᔭᕆᕐᓯᒪᒋᐊᓕᒃᑲ ᑕᓚᕖᓴᒃᑰᑐᑦᓭᑦ ᐱᔭᕆᕐᓯᒪᑦᓯᐊᓂᐊᕐᐸᑕ.
ᑕᕐᕋᒥᐅᑦ ᓂᐱᖓᒃᑯᓂ ᐱᓇᓱᐊᕐᑐᖅ, 2019 ᐊᑦᔨᓕᐅᕆᔪᖅ Patrick Paré
ᑕᕐᕋᒥᐅᒃᑯᑦ ᐱᓇᓱᒍᓯᑦᓯᐊᒥᒃ ᑐᓂᔨᓯᒪᔪᑦ ᐅᕙᓐᓂᒃ ᐱᒍᓐᓇᓯᑎᑦᓯᓱᑎᓪᓗ ᐸᕐᓇᕈᓐᓇᓂᕐᒥᒃ ᑕᓚᕖᓴᒃᑯᑦ ᓄᐃᔪᑦᓴᓂᒃ, ᐊᕐᕕᑕᕈᓐᓇᑎᑦᓯᓱᑎᓪᓗ ᐅᑭᐅᕐᑕᑐᒧᑦ ᓄᐃᑎᕆᒍᑎᒋᓂᐊᕐᑕᑲᓂᒃ ᑕᓚᕖᓴᒃᑰᑐᑦᓴᓂᒃ ᐊᒻᒪᓗ ᕿᓂᕈᓐᓇᓯᑎᑦᓯᓱᑎᒃ ᓱᓇᑐᐃᓐᓇᓂᒃ ᓄᓇᕕᒻᒥᐅᓄᑦ ᐃᓕᑦᓯᔭᐅᖁᔭᒃᑲᓂᒃ. ᑕᑯᓐᓇᕋᓱᐊᓪᓚᕆᑦᓯᒪᔪᖓ ᑎᒥᒃᑯᑦ ᐃᓱᒪᒃᑯᓗ ᖃᓄᐃᖕᖏᓯᐊᕈᑎᐅᒍᓐᓇᑐᓂᒃ ᑕᓚᕖᓴᒃᑯᑦ ᑕᑯᑦᓴᐅᑎᓚᖓᑦᓱᒋᑦ, ᐃᓕᕐᕈᓯᒃᑯᓗ ᓱᓇᓱᐊᕈᓯᐅᔪᑦ. ᑕᒪᓐᓇ ᐊᑑᑎᓯᒪᔭᕋ ᐊᑦᔨᓕᐅᕈᑎᐅᑉ ᓯᕗᕋᓂ ᑐᓄᐊᓂᓗ, ᑐᑭᒧᐊᑦᑎᓯᓂᖅ ᓴᕐᕿᑎᕆᓂᖅ ᑕᓚᕖᓴᒃᑰᑐᑦᓴᓂᒃ, ᐱᒍᓐᓇᓯᒍᑎᒋᓯᒪᔭᕋ ᓇᒻᒥᓂᖅ ᑐᓴᕐᑎᓯᒍᑎᓕᐅᕐᓂᒥᒃ ᓂᐱᓕᐅᕐᓂᑯᑦ ᑕᑯᑦᓴᐅᑎᑦᓯᓂᒃᑯ Northerned-ᒥᒃ, ᓄᐃᒋᐊᖕᖓᓚᐅᔪᒥᒃ 2024-ᒥ ᑕᕿᕋᓕᔭᖑᑦᓱᓂ (ᐊᐅᓚᔫᖑᑦᓱᓂ).
ᐃᓄᐃᑦ: ᓇᓕᑭᐊᖅ, ᐱᒋᐊᕈᑎᐅᓯᒪᔪᖅ ᐱᔪᓐᓇᓂᕆᔭᕐᓄᑦ ᑐᓴᕐᓂᔮᕐᑎᓯᔨᐅᓂᕐᓄᓗ? ᐱᓇᓱᐊᒻᒪᕆᑦᓯᒪᔭᑎᑦ ᑲᑎᕐᓱᓯᒪᓕᕐᒪᑕᑭᓯᐊᓂ ᐱᒍᓐᓇᓯᓯᒪᓕᕆᐊᖅ ᐃᑉᐱᓂᐊᕐᓯᒪᕕᑦ? ᐅᕝᕙᓘ ᐃᓚᐅᑦᓱᑎᑦ ᐅᕝᕙᓗᓐᓃᑦ ᐊᒥᓱᐃᑦ ᓯᕗᕋᓐᓂ ᓂᑦᔭᓗᑦᑕᓱᑎᑦ ᓇᓂᑭᐊᖅ ᐃᑉᐱᓂᐊᓚᕿᒍᑎᒋᓯᒪᔦᑦ “ᐱᒍᓐᓇᓯᓂᕐᓂᒃ”?
ᐲᑐᕆᔅ: ᐊᓯᑦᔨᑲᑕᖕᖏᑐᒃᑯᑦ ᐱᓇᓱᐊᕐᓂᖅ ᐊᕐᕌᒍᐃᑦ 20-ᐅᖓᑖᓄᑦ, ᒥᑭᔪᐊᐱᓐᓂᒃ ᓂᑦᔭᓗᑦᑖᕆᐊᕐᑐᓯᒪᓃᕐᓂᑦ ᐱᒋᐊᕐᓱᓂ ᐊᖏᓕᕙᓪᓕᐊᔪᓄᑦ ᑎᑭᑦᓱᓂ. ᐃᑉᐱᓂᐊᕐᓯᒪᕗᖓ 2024 ᐅᐱᕐᖔᖓᓂ ᓂᑦᔭᓗᑦᑖᑎᐅᓂᒃᑯᑦ ᐊᖏᓂᕐᐹᐅᓯᒪᒋᐊᖓᓂᒃ ᐊᒥᓱᑦ ᓯᕗᕌᓂ ᐃᖕᖏᕆᐊᕐᑐᖃᑎᐅᓯᒪᑦᓱᖓ. ᑯᐯᒃ ᓇᓪᓕᐅᓂᕐᓯᐅᕕᖓᓂ ᔫᓂ 23-ᖑᑎᓪᓗᒍ ᐊᒻᒪᓗ ᑯᐯᒻᒥ ᓂᑦᔭᓗᑦᑖᑎᒻᒪᕇᑦ ᑕᑯᑦᓴᐅᑎᑕᐅᑎᓪᓗᒋᑦ ᔪᓓ 26-ᖑᑎᓪᓗᒍ. ᐊᑕᐅᓯᑐᐃᓐᓇᐅᓯᒪᖕᖏᑐᖅ. ᐊᒥᓱᐃᑦ ᓄᐊᓯᒪᔪᑦ ᐊᕐᕌᒍᓂ 20-ᓂ ᐱᓇᓱᐊᕐᓂᕆᓯᒪᔭᒃᑲᓂ ᐆᒻᒪᒥᐅᑕᕆᓯᒪᔭᒃᑲᓂᓗ. ᐊᒻᒪᓗᑦᑕᐅᖅ ᐱᒍᓐᓇᕕᓕᒫᒃᑯᑦ ᐃᓚᐅᕕᖃᖃᑦᑕᓂᖅ ᐱᒍᓐᓇᓯᕙᓪᓕᐊᕈᑎᑦᓴᑲᓄᑦ ᓂᑦᔭᓗᑦᑖᑎᐅᓂᒃᑯᑦ, ᐃᓓ?
ᓯᓪᕕᐊ ᑯᓗᑦᓰ ᐲᑐᕆᔅ ᑎᐊᓗ ᑲᑕᑦᔭᑑᒃ ᐃᓚᒋᔭᐅᑦᓱᑎᒃ Diane
Dufresne-ᒧᑦ ᑯᐯᒃᒥ ᑐᓴᕐᓂᔮᕐᑎᓯᓂᖃᕐᑎᓗᒋᑦ ᐁᐸᔭᖄᒻ ᓇᑎᕐᓇᖓᓂ, ᑯᐯᒃᒥ, 2024 ᐊᑦᔨᓕᐅᕆᔪᖅ YAN TURCOTTE
ᐃᓄᐃᑦ: ᖃᐅᔨᒪᔭᐅᒍᑎᖃᑦᓯᐊᕋᕕᑦ ᐃᖕᖏᕈᓯᓕᐊᕆᓯᒪᔭᑎᓐᓂᒃ, ᑭᓯᐊᓂ ᐊᑯᓂᐅᓕᕐᑐᖅ ᒥᕐᓱᑎᐅᓯᒪᓕᕐᒥᔪᑎᑦ. ᖃᐅᔨᒪᕗᖓ ᐱᐅᔪᒻᒪᕆᐊᓗᓐᓂᒃ ᓴᐸᖓᓕᐅᓲᖑᑎᓪᓗᑎᑦ. ᐅᖃᐅᑎᒐᔭᕐᕿᖔ ᑕᒪᒃᑯᐊ ᓴᓇᓲᑉᐱᑦ ᒥᑦᓵᓄᑦ?
ᐲᑐᕆᔅ: ᒥᕐᓱᒋᐊᒥᒃ ᐊᓕᐊᒋᔭᖃᕐᖁᖓ ᐱᐊᕋᐅᓕᕐᓂᕋᒪᓂᑦ. ᐊᓪᓚᖑᐊᓲᖑᒻᒥᔪᖓ. 2007-ᖑᑎᓪᓗᒍ ᐳᕐᑐᓂᕐᓴᒥ ᐃᓕᓂᐊᕕᒻᒦᓚᐅᕐᓯᒪᒻᒥᔪᖓ ᐊᓪᓚᖑᐊᕈᓯᕐᓂᒃ ᐃᓕᓐᓂᐊᓱᖓ, ᐱᔭᕇᕐᓯᒪᖕᖏᑕᕋᓗᐊᕋ. ᒪᕐᕈᓂᒃ ᐊᕿᕐᕌᒎᓐᓂᒃ ᐃᓕᓐᓂᐊᓱᒍ ᓄᕐᖃᕆᐊᖃᓚᐅᕐᓯᒪᔪᖓ ᐃᓅᓯᕋᓂ ᐅᖁᒣᓪᓗᓗᐊᒧᑦ. ᒥᖑᐊᖕᖑᐊᓂᕐᒥᒃ ᐊᓪᓚᖑᐊᕐᓂᒥᓪᓗ ᐅᑦᑐᕋᕐᓯᒪᒻᒥᔪᖓ.
ᐃᓄᐃᑦ: ᑖᒃᑯᐊ ᐊᑦᔨᒌᖕᖏᑐᑦ ᐱᒍᓐᓇᑕᑎᑦ ᐱᑐᑦᓯᒪᐅᑎᖃᕐᑐᕆᕕᒋᑦ?
ᐲᑐᕆᔅ: ᓴᓇᔭᕕᓂᒃᑲᓂᒃ ᐊᑐᕆᐊᒥᒃ ᐊᓕᐊᒋᔭᖃᕐᑐᖓ ᐃᓄᐃᑦ ᓯᕗᕌᓐᓂ ᓂᑦᔭᓗᑦᑖᓕᕋᒪ, ᐅᑦᑐᑎᒋᓗᒋᑦ ᐅᓪᓗᒥᕐᓯᐅᑎᐅᒐᓗᐊᕐᓱᑎᒃ ᐱᕐᖁᓯᑦᑎᓅᓕᖓᔪᑦ ᐊᓐᓄᕌᑦ, ᐱᓗᐊᕐᑐᒥᒃ ᐊᒥᓱᐃᑦ ᓯᕗᕌᓐᓃᓕᕋᒪ. ᑭᐊᑎᓕᐅᕐᓯᒪᒻᒥᔪᖓ ᕿᓪᓛᒋᐊᕐᓱᓂ ᑕᐅᑦᑐᓕᒻᒥ ᑯᓪᑎᒥᒃ ᕿᕐᓂᑕᒥᓪᓗ ᐃᓕᑦᑎᐅᑎᖁᕐᒥᒃ ᐊᑐᕐᓱᖓ, ᐅᓪᓗᒥᐅᓕᕐᑐᒨᓕᖓᓪᓚᕆᒐᓗᐊᕐᓱᓂ ᐸᒻᒪᑑᒐᒥ. ᐊᓪᓚᖑᐊᕐᓯᒪᒻᒥᔪᖓ ᓂᑦᔭᕈᑎᓕᐊᕐᒪ ᐴᖏᑦᑕ ᑕᕐᓴᓴᖏᓐᓂᒃ. ᐅᑦᑑᑎᒋᓗᒍ ᑎᕆᒐᓐᓂᐊᖅ ᓂᑦᔭᕈᑎᐅᑉ ᐴᖓ, ᓄᑲᕆᓯᒪᔭᕐᒪ ᔮᓇᔅ ᑎᐊᖑᓯᒪᔫᑉ (1972–1989) ᐊᓪᓚᖑᐊᕐᓯᒪᔭᖓᓂᒃ ᐊᑐᓚᐅᔪᖓ, ᐊᕐᓇᖑᐊᖅ ᓰᕐᖁᕕᐊᓪᓗᖓᔪᖅ ᐱᖕᖑᐊᕈᓯᑐᖃᕐᒥᒃ ᐱᖕᖑᐊᑐᖅ ᓇᐅᒃᑭᐊᖑᐊᕐᓱᓂ ᑎᕆᒐᓐᓂᐊᑉ ᓂᐊᖁᕕᓂᖓᓂᒃ ᓇᐅᒃᑭᒐᓱᐊᕐᓱᒍ ᑎᒃᑭᐊᒧᑦ ᓴᐅᓂᕐᒧᑦ ᓄᕗᓕᒻᒧᑦ. ᑕᐅᑦᑐᖃᕋᓂ, ᕿᕐᓂᑕᒧᑦ ᖃᑯᕐᑕᒧᓪᓗ ᐊᓪᓚᖑᐊᓯᒪᔪᖅ, ᓴᓇᒋᐊᓪᓛᓯᒪᔭᕋ ᓄᐃᑕᓪᓚᕆᑦᑐᓕᐊᕆᑦᓱᒍ ᑐᖑᔪᑕᕐᒥᒃ ᖁᕐᓱᑕᒥᓪᓗ ᓴᕐᕿᔮᕈᑎᖃᕐᑎᓱᒍ.
ᓂᑦᔭᕈᑎᐅᑉ ᐴᖓᓂ ᐊᓪᓚᖑᐊᕐᓯᒪᔪᑦ ᐲᑐᕆᔅ ᑎᐊ ᓂᑦᔭᓗᑦᑖᕈᑎᓕᐊᕆᓯᒪᔭᖓ ᑎᕆᒐᓐᓂᐊᖅ (2015)
ᐃᓄᐃᑦ: ᐊᒥᓱᑦ ᐃᓄᐃᑦ ᒥᕐᓱᒋᐅᕐᓯᒪᒻᒪᑕ ᐊᓈᓇᑦᓯᐊᒥᓂᑦ ᐊᓈᓇᒥᓂᓪᓗ ᐃᓕᑦᓯᓱᑎᒃ, ᑭᓇᓕᑭᐊᖅ ᐃᑲᔪᕐᓯᒪᓪᓚᕆᑦᑐᖅ ᐃᓕᓐᓂᒃ ᒥᕐᓱᕆᐅᕐᓴᑎᓪᓗᑎᑦ?
ᐲᑐᕆᔅ: ᐊᓈᓇᒐᓂᒃ ᐊᔭᑯᓗᒐᓂᓪᓗ ᑕᑯᓐᓇᓯᒪᔪᖓ. ᑲᔅᑏᓇ ᑲᓓᔅᑦ, ᐱᖃᑎᒐ ᐃᓕᓐᓂᐊᑎᑦᓯᓯᒪᒻᒥᔪᖅ ᐅᕙᓐᓂ ᐃᓅᓱᑦᑐᕕᖕᖓᐅᑎᓪᓗᖓ. ᑏᓯ ᑕᕐᕿᐊᐱᒃ-ᐊᕐᓇᑐᖅ (1966–2024), ᐯᕐᓯᔨᒋᓯᒪᔭᕋ ᐃᓅᓕᕐᑎᓗᖓ, ᐃᓕᓐᓂᐊᑎᑦᓯᓯᒪᔪᖅ ᐅᕙᓐᓂ ᐊᒪᐅᓯᐅᕐᓂᒥᒃ. ᐅᕙᓐᓄᑦ ᑖᓐᓇ ᐱᒻᒪᕆᐊᓗᒃ ᐃᓕᓐᓂᐊᑎᓯᒪᒻᒫᖓ ᑖᑦᓱᒥᖓ. ᐃᓕᓐᐊᕕᒋᑦᓱᒋᑦ ᐊᑦᔨᒌᖕᖏᑐᐃᑦ ᒥᕐᓱᕈᓯᖏᑦ ᐊᑦᔨᒌᖕᖏᑐᐃᑦ ᐊᕐᓀᑦ ᑕᑯᓐᓇᑐᐃᓐᓇᓱᖓᓗ ᐊᕐᓇᓂᒃ ᐃᓕᓐᓂᐊᑎᑦᓯᔨᒋᓯᒪᔭᒃᑲᓂᒃ. ᐊᒻᒪᓗᑦᑕᐅᖅ, ᐃᓕᑦᓯᒍᑎᖃᕐᐸᓱᖓ ᑕᒻᒪᕈᑎᒃᑲᓂᒃ ᐅᑦᑐᕋᕆᐊᓪᓚᓱᒋᑦ ᑕᒻᒪᑕᒃᑲ….ᒥᑭᓪᓕᑎᖏᓐᓇᓕᒫᕆᐊᖃᕐᓇᑐᖅ. ᐱᓯᑎᐊᓘᔪᕆᒋᐊᖃᕐᓇᖏᑦᑐᖅ ᒥᕐᓱᑐᖃᓕᕋᒥ.
ᐲᑐᕆᔅ ᑎᐊ, ᒥᕐᓱᓯᒪᔭᒥᓂᒃ ᐊᑐᕐᑐᖅ ᐊᕐᓴᓂᖅ ᑎᐊᓗ ᓂᑦᔭᓗᑦᑖᑑᒃ ᐊᕐᐱ ᔮᒻ ᑐᓴᕐᓂᔭᕐᑎᓯᑎᓪᓗᒍ ᑯᑦᔪᐊᒃ, ᑯᐯᒻᒥ, 2024 ᐊᑦᔨᓕᐅᕆᔪᖅ ᓵᓕ ᓯᕐᐸᓗᒃ
ᐃᓄᐃᑦ: ᐅᖃᐅᑎᒍᓐᓇᕿᖕᖔ ᑕᕐᕋᒥᐅᒃᑯᓂ ᐱᓇᓱᐊᕐᓱᑎᑦ ᓄᐃᓚᐅᕐᓯᒪᔭᕐᐱᑦ ᒥᑦ ᒥᑦᓵᓄᑦ, ᐃᓄᖕᖑᐊᕈᓗᓐᓂᒃ ᐊᒡᒐᒧᑦ ᓂᒪᑦᑎᑕᐅᖑᐊᓲᓂᒃ? ᐱᒐᓱᐊᕆᐊᖃᒻᒪᕆᑦᑑᓯᒪᕚ ᓄᑖᖑᑦᓱᓂ, ᐅᕝᕙᓘ ᐃᓚᒋᔭᐅᑐᐃᓐᓇᓯᒪᔪᖅ ᐱᔪᓐᓇᓯᓯᒪᒍᑎᑎᓐᓄᑦ?
ᐲᑐᕆᔅ: ᐊᓲ, ᐃᓄᖕᖑᐊᕈᓗᐃᑦ. ᑕᑯᓚᐅᓯᒪᓯᒪᖕᖏᑐᖓ ᐃᓄᖕᖑᐊᕈᓗᓐᓂᒃ ᐊᒡᒐᒧᑦ ᓂᒪᑦᑎᒐᕐᓂᒃ ᐱᓇᓱᐊᕐᓯᒪᓂᓕᒫᕋᓂ, ᑭᓯᐊᓂ ᐅᑦᑐᕋᓱᐊᕐᓯᒪᔪᖓ ᓄᐃᑎᕆᓂᕐᒥᒃ ᑕᓚᕖᓴᒃᑰᑐᑦᓴᓂᒃ ᐃᓕᓐᓂᐊᑎᑦᓯᒍᑎᐅᒐᔭᕐᓗᑎᒃ ᐃᓄᐃᑦ ᐃᓅᓱᑦᑐᖏᓐᓂᒃ—ᑐᑭᓯᓇᕐᑑᓗᓂ ᐃᔪᕐᓇᑑᓗᓂᓗ ᐃᓕᑦᓯᓕᐅᒥᑎᑦᓯᒍᓐᓇᓂᖃᕐᓗᓂ. ᐃᓄᑐᐃᓐᓇᖑᐊᕈᓗᐃᑦ ᐊᒡᒐᒧᑦ ᓂᒪᑦᑎᒉᑦ ᐱᑕᖃᕐᓯᒪᖕᖏᒪᑕ, ᓴᓇᒋᐊᖃᕐᓯᒪᔭᒃᑲ. ᖃᕆᑕᐅᔭᒃᑯᑦ ᑕᑯᓐᓇᑕᐅᓗᑎᒃ ᐃᓕᓐᓂᐊᑎᑦᓯᒍᑎᐅᓲᓂᒃ ᕿᒥᕐᕈᓱᖓ ᓇᕚᓚᐅᔪᖓ ᐃᓕᓐᓂᐊᕈᑎᓂᒃ. ᓂᐅᕕᕐᓱᖓ ᑭᖕᖑᒪᓇᕐᑐᓕᒫᓂᒃ ᐃᓄᖕᖑᐊᕈᓗᓕᐅᕈᑎᑦᓴᓂᒃ ᐊᓱᐃᓛ ᐱᖓᓱᓂᒃ ᓴᓇᓕᓚᐅᔪᖓ—ᓯᐊᓯ, ᓄᐊ ᒪᓯᓪᓗ. ᓄᐃᓚᐅᔭᒃᑲ ᑭᓇᑯᖑᐊᖑᓂᖏᑦ ᐊᓪᓚᓯᒪᔪᓕᐊᕆᑦᓱᒋᑦ ᑐᑭᒧᐊᑦᑎᓱᒋᓪᓗ ᑕᓚᕖᓴᒃᑯᑦ ᓄᐃᑕᓚᖓᔪᓕᒫᑦ ᑌᔭᐅᔪᑦ ᐅᕕᒃᑲᐅᕗᒍᑦ—ᐃᓄᖕᖑᐊᕈᓗᐃᑦ ᐊᒡᒐᒧᑦ ᓂᒪᑦᑎᒉᑦ ᑕᑯᑦᓴᐅᓂᖓ (Uvikkauvugut – Puppet Show) (2019–2023)ᐱᓇᓱᐊᖃᑎᖃᕐᓱᖓ—ᑖᒃᑯᓂᖓ ᐃᑲᔪᕐᑎᖃᖕᖏᓗᖓ ᐱᒍᓐᓇᕋᔭᕐᓯᒪᖕᖏᑐᖓ. ᐃᓄᖕᖑᐊᓂᓪᓗ ᐊᒡᒐᒧᑦ ᓂᒪᑦᑎᓯᔨᐅᓕᓂᕐᒥᒃ, Anne Lalancette-ᒥᒃ ᓇᕝᕚᓱᖓ, ᐃᓕᓐᓂᐊᑎᑦᓯᑎᑦᓱᒍ ᐱᓇᓱᐊᖃᑎᒃᑲᓂᒃ. ᑕᑯᑦᓴᐅᒋᐊᖕᖓᑎᓪᓗᒋᑦ ᐃᓄᑐᐃᓐᓇᓂᒃ ᐃᓄᖕᖑᐊᕈᓗᓐᓂᒃ ᓂᒪᑦᑎᓯᔨᐅᖁᔨᓯᒪᔪᖓ ᐃᓕᓐᓂᐊᑎᑕᐅᓂᐊᓕᕐᒪᑕ Anne-ᒧᑦ.
ᐱᔭᕆᐊᑐᔫᓚᖓᔪᕆᑦᓯᓯᒪᖕᖏᑐᖓ ᐃᓄᖕᖑᐊᓂᒃ ᐊᒡᒐᒧᑦ ᓂᒪᑦᑎᒐᕐᓂᒃ ᑕᑯᑦᓴᐅᔪᑦᓴᓕᐅᕆᐊᖅ, ᑭᓯᐊᓂ ᐊᒥᓱᑦ ᕿᓄᐃᓵᕈᓐᓇᓂᖓᓄᑦ ᐱᓇᓱᐊᒻᒪᕆᓐᓂᖓᓄᓪᓗ, ᑕᑯᓐᓇᕋᑦᓴᓯᐊᖕᖑᓚᐅᔪᖅ. ᐃᓅᓱᑦᑐᐃᑦ ᐊᓕᐊᒋᒻᒪᕆᓚᐅᔭᖓ. ᑕᑯᓐᓇᕋᑦᓴᓕᐊᖑᒪᔪᖅ ᓄᐃᑎᕆᓂᖃᓚᐅᔪᖅ ᐊᑦᔨᒌᖕᖏᑐᓂᒃ, ᐅᑦᑑᑎᒋᓗᒍ ᐃᓅᓱᑦᑑᓱᓂ ᐱᐊᕋᑦᓴᖃᕐᓂᖅ, ᖃᕆᑕᐅᔭᒃᑯᑦ ᓄᐃᑕᑎᑕᐅᔪᐃᑦ ᐱᑦᓯᐊᑑᒋᐊᖃᕐᓂᖓᓂᒃ, ᓵᓚᒃᑲᑖᖃᕐᓂᖅ ᐊᓯᓕᒫᖏᓪᓗ ᐊᑦᔨᒌᖕᖏᑐᐃᑦ ᐃᓅᓯᕐᒨᓕᖓᔪᑦ ᑕᑯᕙᑦᑕᓕᒫᕗᑦ ᐅᑭᐅᕐᑕᑐᒥ, ᖃᓄᕐᓗ ᒪᑭᑕᑦᓯᐊᕈᓐᓇᓂᖅ ᓵᖕᖓᓯᒍᓐᓇᓂᕐᓗ ᑕᒪᒃᑯᓂᖓ ᖃᓄᐃᖕᖏᓯᐊᕐᓂᖅ ᐊᑐᕐᓗᒍ.
ᐅᕕᒃᑲᐅᕗᒍᑦ - ᐊᒡᒐᒧᑦ ᐊᐅᓚᑎᑕᐅᔪᑦ ᐃᓄᖕᖑᐊᕈᓗᐃᑦ (2019–2023) ᑐᓂᓯᒪᔭᖓ ᐲᑐᕆᔅ ᑎᐊ
ᐃᓄᐃᑦ: ᑕᒪᓐᓇ ᐱᐅᔪᐊᓗᒃ. ᐃᓄᑦᑎᑑᓕᒫᕐᓱᓂᓗ?
ᐲᑐᕆᔅ: ᐋ, ᐊᑐᐃᓐᓇᐅᓱᑎᓪᓗ ᖃᕆᑕᐅᔭᒃᑯᑦ ᑕᑯᓐᓇᑕᐅᒍᓐᓇᑐᑦ YouTube-ᑯᑦ. ᐊᑦᔨᒌᖕᖏᑐᓂᒃ ᙯᕐᖁᔨᓯᒪᖃᑦᑕᓚᐅᔪᖓ ᐅᖄᒋᐊᕐᑐᓯᒪᑎᑦᓱᒋᑦ, ᐃᓄᐃᑦ ᐃᑦᔭᕋᑦᓴᓯᐊᑦ ᐅᖄᒍᑎᖃᖁᑦᓱᒋᑦ ᐊᑐᓂ ᓄᐃᑕᑎᑕᑦᑎᓂᒃ, ᐅᑦᑑᑎᒋᓗᒍ, ᑎᓯᕇ ᑲᒻᐳᐸᑦᔅ, ᐃᓄᐃᑦ ᐱᖕᖑᐊᕈᓯᑐᖃᖏᓐᓂᒃ ᐊᔪᕆᔭᖃᖕᖏᑐᖅ. ᐅᕙᓐᓄᑦ ᐅᖃᓕᓚᐅᔪᖅ, ᓄᓇᓕᒻᒥᓄᒎᖅ ᐅᑎᕐᓯᒪᓕᕐᓱᓂ ᐱᐊᕋᕐᓄᑦ ᐅᖃᐅᑎᔭᐅᖃᑦᑕᑐᕕᓂᐅᓕᕐᑐᖅ ᐊᓕᐊᒋᔭᐅᑦᓱᓂ ᐅᖄᖃᑎᖃᕐᑐᕕᓂᐅᓂᖓ ᓄᐊᒥᒃ ᐃᓄᖕᖑᐊᕈᓗᒻᒥᒃ. ᔩᓴᓐ ᐋᓇᖃᑕᒃ ᐅᖄᒍᑎᖃᓚᐅᔪᒻᒥᔪᖅ ᓯᓐᓇᓂᐅᑉ ᒥᑦᓵᓄᑦ ᐃᓅᖃᑎᒌᑦᓯᐊᖏᓐᓂᐊᓘᒍᓐᓇᑐᒥᓪᓗ ᓯᕗᕐᖐᓯᒪᒍᑎᐅᒍᓐᓇᑐᓂᒃ.
ᐅᕕᒃᑲᐅᕗᒍᑦ - ᐊᒡᒐᒧᑦ ᐊᐅᓚᑎᑕᐅᔪᑦ ᐃᓄᖕᖑᐊᕈᓗᐃᑦ (2019–2023) ᑐᓂᓯᒪᔭᖓ ᐲᑐᕆᔅ ᑎᐊ
ᐃᓄᐃᑦ: ᓱᕐᕃᒍᓇᐅᓐᓂᖁᖅ ᐃᓄᐃᑦ ᐃᓚᖏᓐᓂᒃ. ᓱᓇ ᐱᔭᖃᕈᓐᓇᓯᐊᕐᓂᐸᐅᔮᕐᓯᒪᕙ ᐱᓇᓱᐊᕐᓯᒪᔭᑎᓐᓂ?
ᐲᑐᕆᔅ: ᐊᒥᓱᐹᓗᓐᓂᒃ ᐱᓇᓱᐊᕐᓯᒪᒐᒪ—ᐊᑕᐅᓯᑐᐃᓐᓇ ᐱᔭᖃᕈᓐᓇᓯᐊᕐᓂᐸᐅᔪᕆᒍᒃᑯ ᓄᕐᖃᑐᐃᓐᓇᕋᔭᕐᓯᒪᒐᒪ. ᐊᑐᓂ ᐱᓇᓱᐊᕐᑕᑲ ᐱᔭᖃᕈᓐᓇᓯᒍᑎᒋᓯᒪᒐᒃᑭᑦ. ᓱᓇᓱᐊᖏᓐᓇᓕᒫᕋᒪ ᑌᒪᖕᖓᓗ ᐱᓇᓱᐊᕋᑦᓴᖃᕈᒪᑦᓱᖓ. ᒪᓐᓇᐅᔪᖅ, ᓂᑦᔭᓗᑖᒐᓕᐅᕐᑐᒍᑦ ᑕᓚᕖᓴᒃᑯᑦ ᑕᑯᑦᓴᐅᔪᓃᑦᑐᓴᓂᒃ ᑕᕐᕋᓕᔮᓂᑦᑐᓴᓂᓪᓗ, ᑕᒪᓐᓇ ᐊᓕᐊᓇᕐᑐᕋᑕ. ᑕᒪᓐᓇᓗ ᐃᒻᒥᒎᕐᒥᓱᓂ ᓂᑦᔭᓗᑦᑖᕋᓕᐊᕆᓲᒃᑲᓂᑦ ᓇᒻᒥᓂᖅ. ᐱᓇᓱᐊᕐᑕᑲ ᐊᓯᑦᔨᕙᓪᓕᐊᖏᓐᓇᓕᒫᕐᑐᑦ ᐱᕈᕐᐸᓕᐊᑦᓱᑎᒃ. ᓯᕗᓂᕐᒦᑐᓂᒃ ᐱᔭᖃᕈᒪᓂᖃᕋᒪ ᐊᔪᐃᓐᓇᐅᑎᖃᕐᓱᖓᓗ—ᐊᓐᓄᕌᓂᒃ ᓄᐃᑎᕆᔨᐅᒍᒪᔪᖓ ᓇᒻᒥᓂᖅ ᐋᓐᓄᕌᓕᐊᕕᓂᒃᑲ ᐃᓕᑕᕆᔭᐅᒍᑎᖃᕐᑎᓗᒋᑦ. ᓂᑦᔭᓗᑦᑖᕈᑎᓕᐅᖏᓐᓇᓚᖓᔪᖓ …. ᓇᒻᒥᓂᕐᓱᑎᐅᒐᒪ, ᐱᕈᕈᒪᕗᖓ ᓇᒻᒥᓂᖃᕈᓐᓇᓯᓗᖓ ᑭᓇᐅᔭᓕᐅᕋᓱᐊᕈᑎᐅᔪᒥᒃ.
ᑕᕐᕋᒥᐅᑦ ᓂᐱᖓᒃᑯᓂ ᐱᓇᓱᐊᕐᑐᖅ, 2019 ᐊᑦᔨᓕᐅᕆᔪᖅ ᐲᑐᕆᔅ ᑎᐊ
ᐃᓄᐃᑦ: ᓴᕐᕿᑎᕆᓂᖅ ᐱᓇᓱᐊᕐᓂᑯᑦ ᐃᓗᓐᓈᒍᑦ ᐱᔭᖃᕐᓂᓚᕆᑦᑕᓕᒃ.
ᐲᑐᕆᔅ: ᐋ. ᑕᑯᑦᓴᐅᑎᑦᓯᒍᒪᑐᐃᓐᓇᑐᖓ ᐅᐱᒍᓱᓐᓂᓚᕆᐊᓗᒐᓂᒃ ᐃᑲᔪᕐᓯᒪᔭᐅᑦᓯᐊᓲᖑᓂᕋᓂᒃ ᓇᑭᓕᒫᖅ, ᐃᓄᓐᓂᑦ ᓇᓂᑐᐃᓐᓇᓕᒫᒥᐅᓂᑦ ᐃᑲᔪᕐᒪᑕ ᐅᕙᓐᓂᒃ ᓂᑦᔭᓗᑦᑕᑎᐅᓂᕋᒍᑦ ᐊᓯᖏᑎᒍᓪᓗ ᐱᒍᓐᓇᓲᒃᑲᑎᒍᑦ, ᑕᒪᒃᑯᐊ ᐱᒍᓐᓇᓂᐅᔭᕋᔭᕐᓯᒪᖕᖏᓇᒃᑭᑦ ᑕᒪᒃᑯᐊ ᐱᑕᖃᖕᖏᐸᑕ.
ᐲᑐᕆᔅ ᑎᐊ ᓂᑦᔭᓗᑦᑖᑎᐅᔪᖅ-ᐃᖕᖏᕈᓯᓕᐅᕐᑎᐅᓱᓂ ᑕᑯᑦᓴᐅᔪᑦᓴᓂᓪᓗ ᓴᕐᕿᑎᕆᔨᐅᑦᓱᓂ ᖁᐊᕐᑕᒥᐅᔭᖅ, ᓄᓇᕕᒻᒥ, ᑯᐯᒻᒥ. ᓂᑦᔭᓗᑦᑖᒐᓕᐊᖏᑦ ᑲᑎᑦᑎᓯᔪᑦ ᐱᕐᖁᓯᑐᖃᕐᓂᒃ ᐃᓄᐃᑦ ᑲᑕᑦᔭᕈᓯᖏᓐᓂᒃ ᐅᓪᓗᒥᐅᓕᕐᑐᓗ ᑐᓴᕐᓂᔮᕈᓯᐅᔪᓂᒃ. ᑎᐊ ᑐᖕᖓᕕᖃᓪᓚᕆᑦᑐᖅ ᑲᔪᓯᑎᑦᓯᒍᒪᓂᕐᒥᒃ ᐃᓕᕐᕈᓯᕐᒥ ᐱᕐᖁᓯᕆᔭᖏᓐᓂᒃ ᓂᑦᔭᓗᑦᑖᕈᓯᕐᒥᓄᓪᓗ ᐃᓚᐅᑎᑦᓯᓱᓂ ᓄᑖᕕᖕᖓᓂᒃ ᓂᑦᔭᓗᑦᑖᕈᓯᐅᒍᓐᓇᑐᓂᒃ.
ᐃᓄᑦᑎᑑᓕᕐᑎᑕᐅᔪᖅ MKL Consulting Inc.-ᒧᑦ
This piece originally appeared in the spring 2025 issue of the Inuit Art Quarterly
.