ᐃᓕᖅᑯᓯᕆᔭᐅᔪᑦ ᓴᓇᓯᒪᔪᑦ ᐅᔾᔨᕆᔭᐅᒋᓐᓇᕆᐊᓖᑦ ᑲᔪᓯᔪᖅᑐᑦ—ᐅᖃᐅᓯᐅᒋᓐᓇᕐᓗᑎᒃ ᑕᐃᑉᓱᒪᓂᐅᓚᐅᖅᑐᑦ, ᒫᓐᓇᐅᔪᓪᓗ ᓯᕗᓂᐅᓂᐊᖅᑐᕐᓗ. ᑕᒪᒻᓇᓗ ᐆᒃᑑᓯᐅᒃᑲᓐᓂᕐᓂᖅ, ᐃᓚᐅᑎᑦᑎᓪᓗᓂ ᐃᓐᓇᑐᖃᓂᒃ ᐱᕚᓪᓕᖅᑎᑎᔪᒪᓂᕐᓗ ᑭᖑᕚᕆᔭᐅᔪᑦ ᑲᑐᑎᖃᑎᒋᓗᒋᑦ, ᑖᒃᑯᐊ ᐊᒡᒍᐊᖅ ᑲᑐᑎᖃᑎᒌᑦᑐᑦ ᓴᖅᑭᑦᑎᓇᓱᐊᖅᐳᑦ ᐃᓚᖏᓐᓂᒃ ᐃᖅᑲᐅᓂᕐᒥᒃ ᓴᓇᔭᐅᓯᒪᔪᑐᖃᓃᑦᑐᓂᒃ.
ᐅᓇ ᐱᐅᓚᑦᑖᕐᒪᑦ ᒥᖅᓱᖅᖢᓂᓘᓐᓃᖅ ᓴᓇᐅᒐᓕᐅᖅᖢᓂᓘᓐᓃᑦ ᐊᒃᑐᐊᓂᖃᕐᓂᖓ ᐃᓕᖕᓄᑦ, ᖃᐅᔨᒪᔭᐅᔪᑐᖃᕐᒧᓪᓘᓐᓃᑦ ᐊᑕᐅᓯᕐᒧᑦ ᐃᓄᖕᒧᑦ ᐅᕝᕙᓘᓐᓃᑦ ᐃᓄᖕᓄᑦ ᑐᓴᐅᒪᔭᕐᒥᓂᒃ ᑐᓴᐅᒪᑎᑦᑎᓂᖅ. ᓯᕗᓕᑉᑕ ᐃᓂᖓ ᑕᒡᕙ ᓴᖅᑭᑉᐳᖅ, ᐃᓚᒋᔭᐅᓂᖅ ᓄᕕᔭᐅᓯᒪᔪᖅᑐᑦ ᑕᐃᒪᖓᓂᐅᓚᐅᖅᑐᒥ ᓯᕗᓕᕆᓚᐅᖅᑕᕐᓄᑦ, ᐅᑉᓗᒥᒧᓪᓗ ᑭᖑᕚᕆᔭᕐᓄᓪᓗ ᑕᒡᕘᓇ ᒥᖅᓱᕐᓂᒃᑯᓪᓘᓐᓃᑦ ᓴᓇᐅᒐᓕᐊᒃᑯᓪᓘᓐᓃᑦ. ᐃᖅᑲᐅᒪᓂᖅ ᑲᔪᓯᓂᐊᕐᓂᖓ ᐱᓪᓚᑦᑖᖑᖕᒪᑦ ᑖᕗᖓᒃᑲᓐᓂᖅ ᑲᔪᓯᖁᒍᑉᑎᒍᑦ ᓯᕗᓕᑉᑕ ᖃᐅᔨᒪᓂᑐᖃᖓ, ᑕᒪᔾᔭ ᐱᓕᕆᔾᔪᓯᓪᓚᑦᑖᒍᕗᖅ ᑖᒃᑯᓄᙵ ᐊᒡᒍᐊᖅ ᑲᑐᑎᖃᑎᒌᒃᑐᓄᑦ: ᑐᑭᓕᐅᖅᓯᒪᓂᖓ ᐊᒡᒍᐊᖅ, ᓲᕐᓗ “ᐃᓛᖅᑐᖅᓯᒪᔪᑦ.” ᑲᑐᑎᖃᑎᒌᑦᑐᓄ, ᓲᕐᓗ ᐃᓛᖅᑐᐃᓂᖅ ᖃᐅᔨᒪᔭᐅᔪᓂᒃ ᐃᓚᑰᓂᖃᒃᓂᖏᑦ ᑐᓴᐅᒪᔭᐅᙱᓕᖅᑐᓂᑦ ᕿᒪᐃᓯᒪᓕᓚᐅᕐᓂᖏᓐᓂᒃ ᐃᓄᐃᑦ ᓱᖏᖅᑕᐅᓂᒃᑯᑦ ᖃᐅᔨᒪᔭᑐᖃᕆᓚᐅᖅᑕᖏᓐᓂᒃ. ᐱᔫᒥᓯᒪᔾᔪᑎᒋᔭᕗᑦ ᐃᓱᒪᓕᐅᕐᓂᒃᑯᑦ ᑭᖑᒧᑦ ᑭᓯᐊᓂ ᑕᑯᒋᐊᖅᓯᒪᒍᑉᑕ ᓯᕗᒻᒧᐊᒍᓐᓇᕐᓂᕐᒪᑦ ᐊᒻᒪᓗ ᐃᖅᑲᐅᒪᓂᖅ ᓴᖅᑭᑎᓪᓗᒍ ᑲᑐᔾᔨᖃᑎᒌᖕᓂᒃᑯᑦ. ᑐᑭᒧᐊᒃᑎᑦᑎᓂᒃᑯᓪᓗ ᐊᒃᑐᐊᓂᖃᕐᓗᓂ ᓯᕗᓕᑉᑕ ᖃᐅᔨᒪᓂᑐᖃᖏᓐᓄᑦ.
ᐊᒍᐊᖅ ᑲᑐᑎᖃᑎᒌᑦ ᑕᑯᔭᖅᑐᐃᕌᓂᒃᓯᔪᑦ ᓱᖓᐅᔭᓕᖅᑐᖅᓯᒪᔪᒥᒃ ᑐᐃᓕᖕᒥᒃ ᓴᓇᔭᐅᓐᓂᑯ ᓂᕕᓴᓐᓈᕐᒧᑦ ᑕᐃᑲᓂ ᐊᒥᐊᓕᒐᑦ ᐃᑦᓴᕐᓂᑕᖃᕐᕕᖓᓂᒃ, ᓂᐅ ᔫᒃ ᓯᑎᒥᒃ, 2023ᐊᑐᐃᓐᓇᐅᑎᑦᑎᔪᑦ ᐊᒡᒍᐊᖅ ᑲᑐᑎᖃᑎᒌᑦ
ᑖᒃᑯᐊ ᑲᑐᑎᖃᑎᒌᒃᑐᑦ ᐊᒡᒍᐊᒃᑯᓐᓄᑦ ᑲᑎᖃᑎᒌᓚᐅᖅᑐᑦ ᐊᕐᕌᒍᖓᓂᒃ 2022, ᑖᒻᓇ ᐱᒋᐊᖅᑎᑦᑎᓚᐅᖅᑎᓪᓗᒍ, ᓘᕆ ᑕᒍᕐᓈᖅ ᕌᓐᑐᓪ. ᓘᕆ ᕿᓂᓕᓚᐅᖅᐳᖅ ᓴᓇᐅᒐᓕᐅᖅᑎᓂᒡᓗ ᒥᖅᓱᖅᑎᓂᒡᓗ ᐃᓚᐅᔪᓐᓇᖅᑐᓂᒃ ᐃᑦᑕᕐᓂᑕᖃᕐᕕᖕᒧᑦ ᑲᑎᖅᓱᒐᖃᕐᕕᖕᒧᑦ ᑕᑯᔭᖅᑐᖅᑕᐅᓗᑎᒃ ᐃᓄᐃ ᐱᖁᑎᖏᑦ, ᐊᓐᓅᕌᖏᓪᓗ ᐆᒃᑑᑎᓪᓗ ᑕᑯᒋᐊᕐᓗᒋᑦ ᑐᑭᓯᒋᐊᕈᑎᒋᓗᒋᓪᓗ ᓯᕗᓕᑉᑕ ᖃᐅᔨᒪᔭᑐᖃᖏᑦ ᐊᒻᒪᓗ ᐱᔪᒦᓵᕈᑎᒋᓗᒋ ᓄᑖᓂᒃ ᐆᒃᑑᓯᐅᓂᕐᒧᑦ. ᐅᑭᐊᒃᓵᖓᓂᑦ 2022–ᖑᑎᓪᓗᒍ, ᑲᑎᖃᑎᒌᓚᐅᖅᓯᒪᕗᒍ ᐋᑐᕚᒥᑦ, ᑕᐃᑲᙵ ᐊᒡᒍᐊᖅ ᑲᔪᓯᒋᐊᓕᓚᐅᖅᐳᖅ, ᐅᒃᑯᐊ ᐃᓚᐅᑉᓗᑎᒃ ᕕᓂᐸᑦ ᓄᙵᖅ, ᒪᓕᓴ ᐊᑕᒍᑦᓯᐊᖅ, ᒥᓴ ᒍᐊᑕᓐ, ᓘᕆ ᐅᕙᖓᓗ. ᐄᕗᕆ ᑮᓇᐃᓇᖅ ᐃᓚᒋᔭᐅᔪᖅᑕᐅᖅ ᑭᓯᐊᓂ ᐃᓚᐅᓚᐅᖏᑦᑐᖅ. ᕉᔅ ᑏᓇ ᐊᓕᕙᒃᑐᖅ ᐊᑦᓴᒐᓗ ᐳᕋᓐᑕ ᐳᑐᓕᒃ ᐃᓚᐅᖃᑕᐅᓕᓚᐅᖅᑑᑦ 2023 ᐱᒋᐊᓕᓵᖅᑎᓪᓗᒍ.
ᐋᑐᕚᒥᑦ, ᐅᖃᐅᓯᕆᕙᓪᓕᐊᓕᓚᐅᖅᐸᕗᑦ ᑲᑐᑎᖃᑎᒌᒍᒪᓂᖅ. ᐃᓕᖅᑯᓯᑐᖃᕐᓗ ᓴᖅᑭᑎᒃᑲᓐᓂᕐᓂᖅ ᐱᓪᓚᑖᖑᓂᖓ ᐃᒃᐱᒋᑉᓗᑎᒍ, ᐃᓅᖃᑎᖃᒃᑲᓐᓂᕐᓗ ᓄᓇᓕᐅᖃᑎᑉᑎᓐᓂᒃ. ᐃᒃᐱᖕᓇᖅᑐᒥᒡᓗ ᑐᕌᒐᖃᖁᑉᓗᒋᑦ ᐃᓅᓯᑦᑎᐊᕙᐅᓂᖅᓴᒥᒃ ᐃᓅᓯᕆᓯᒪᓕᖅᑕᕗᑦ ᓱᖏᖅᑕᐅᓯᒪᓕᓚᐅᖅᑎᓪᓗᒍ —ᑕᕘᓇ, ᓵᓚᖃᕋᓱᓗᐊᖅᑐᑦ ᐊᑭᕋᖅᑐᐃᓂᒃᑯᑦ—ᐃᓚᐅᑎᑦᑎᓂᖅᓴᐅᓂᒃᑯᓪᓗ ᑐᙵᓵᕆᓂᒃᑯᓪᓗ ᐱᔪᓐᓇᕐᓂᖅᐳᓪᓗ ᐱᕈᖅᐸᓪᓕᐊᖁᑉᓗᒍ. ᐃᓕᖅᑯᓯᐅᔪᖅ ᓴᖅᑭᑎᒋᐊᕐᓂᖅ, ᐅᔾᔨᕐᓇᖅᓯᖁᒐᑉᑎᒍ ᐱᓪᓚᑖᒍᓂᖓᓂᒃ ᑕᑯᔭᐅᔪᓐᓇᕐᓗᓂ, ᐊᒃᑐᖅᑕᔪᓐᓇᕐᓂᖓᒍᓪᓗ ᑕᐅᑐᖑᐊᖅᑕᐅᔪᓐᓇᓂᖓᒍᓪᓗ ᐃᓕᖅᑯᓯᖅ ᓴᙱᑦᑎᒋᐊᕈᓐᓇᕐᓂᖓ ᑲᔪᓯᑎᒋᐊᕈᓐᓇᕐᓂᖓᓗ ᐆᒻᒪᖅᑎᒃᑲᓂᕐᓗᒍ ᐃᓅᓂᕐᐳᑦ. ᑲᑐᔾᔨᖃᑎᒌᖕᓂᒃᑯᑦ, ᓄᓇᖃᑎᒌᖕᓂᒃᑯᓪᓗ ᑭᖑᕚᕆᔭᐅᓂᒃᑯᓪᓗ ᐃᓚᒌᖕᓂᖅ ᐱᒡᒍᒃᑎᖁᑉᓗᒍ ᖃᐅᔨᒪᓂᕐᒥᒡᓗ ᕿᒪᐃᕝᕕᖃᕈᒪᓂᕐᓗ. ᐊᒻᒪᓗ ᑭᖑᓂᐊᒍᑦ, ᐊᑑᑎᖃᖁᑉᓗᒍ ᑲᑐᑎᖃᑎᒌᖕᓂᖅᐳᑦ ᓇᓗᓇᐃᓯᖁᑉᓗᒍ ᐅᔾᔨᕐᓇᖅᓯᓂᒃᑯᑦ ᐃᖢᐃᓗᑕᐅᔪᑦ ᐋᖅᑭᒋᐊᕐᓗᒋᑦ ᐃᓄᐃᑦ ᓄᓇᓕᖁᑎᖏᓐᓂᒃ. ᑖᒃᑯᐊ ᑐᕌᒐᕆᔭᕗᑦ ᖃᓄᐃᓕᐅᕈᒪᓂᑉᑎᓐᓂᒃ ᑲᑐᑎᖃᑎᒌᒍᓐᓇᕐᓂᒃᑯᑦ ᑲᔪᓯᔾᔪᑎᒋᔪᒪᕙᕗᑦ ᓂᕆᐅᓐᓂᖃᖅᖢᑕ ᖃᐅᔨᒪᓂᕆᔭᐅᔪᑦ ᑲᔪᓰᓐᓇᖁᑉᓗᒋᑦ. ᐱᔭᕆᐅᖅᓴᕈᑎᒋᔭᕗᑦ—ᑐᙵᕕᖃᖅᖢᒍ ᓯᕗᓕᑉᑕ ᖃᐅᔨᒪᓂᖓᓂᖏᓐᓂᒃ ᒫᓐᓇᐅᓕᖅᑐᖅᓗ ᓴᓇᔭᐅᕙᓕᖅᑐᑦ—ᓇᓗᓇᐃᖅᓯᕗᖅ ᐃᖃᐅᒪᔪᓐᓇᓂᖅ ᐃᒃᐱᒋᔭᐅᔭᕆᐊᓕᒃ ᐊᓯᐊᒎᕈᓐᓇᖅᓯᑎᑦᑎᔪᓐᓇᕐᓂᖓᓂᒃ ᐃᒃᐱᖕᓇᖅᑐᒃᑯᑦ.
ᐳᕋᓐᑕ ᐳᑐᓕᒃ ᐆᒃᑑᓯᐅᖅᑐᑦ ᐃᔾᔪᐊᖅᓯᑉᓗᓂ 120-ᓂᒃ ᐅᑭᐅᓂᒃ ᐊᓂᒍᖅᓯᒪᔪᓂᒃ ᑐᐃᓕᓕᐅᖅᑕᐅᔪᕕᓂᕐᒥᒃ ᑭᕙᓪᓕᕐᒥᐅᑕᕐᒥᒃ ᐊᑐᐃᓐᓇᐅᑎᑦᑎᔪᑦ ᐊᒡᒍᐊᖅ ᑲᑐᑎᖃᑎᒌᑦ
ᐊᑯᓐᓂᖓᓂᒃ 2022–ᑑᑉᓗ 2025-ᑉᓗ, ᐊᒡᒍᐊᖅ ᑕᑯᔭᖅᑐᐃᓚᐅᖅᐳᑦ ᐃᑦᓴᕐᓂᑕᖃᕐᕕᖕᓂᒃ ᑲᑎᖅᓱᐊᓕᖕᓂᑦ. ᓯᕗᓕᖅᐹᕆᑉᓗᒍ ᕕᓂᐲᒡᒦᑦᑐᖅ ᑕᐃᔭᐅᔪᖅ ᕕᓂᐲᒡ ᓴᓇᐅᒐᖃᕐᕕᒃ (ᖃᐅᒪᔪᖅ), ᐊᒻᒪᓗ ᒫᓂᑐᐸ ᐃᑦᓴᓂᑕᖃᕐᕕᒃ, ᑭᒍᓂᐊᒍᑦ ᑕᑯᔭᖅᑐᓚᐅᖅᑕᕗᑦ ᐊᕙᑕᖅ ᐱᐅᓯᑐᖃᓕᕆᕝᕕᒡᓗ ᒪᑯᕐᑦ ᓯᑑᕙ ᐃᑦᓴᕐᓂᑕᖃᕐᕕᒡᓗ ᒪᓐᑦᕆᔭᐅᓪ ᑯᐸᐃᒥᑦ, ᑖᒻᓇᓗ ᐊᒥᐊᓕᒐᐃ ᐃᑦᓴᓂᑕᖃᕐᕕᖓ ᓂᐅ ᔮᒃ ᓄᓇᓕᒡᔪᐊᖓᓂᒃ, ᐊᒻᒪᓗ ᐃᑦᓴᕐᓂᑕᖃᕐᕕᖓ ᐃᓕᖅᑯᓯᑐᖃᓂ ᓯᕗᓕᖃᕐᑐᓂᒃ ᑕᐃᑲᓂ ᓯᓚᑦᑐᖅᓴᕕᖓᓂᒃ ᐋᔅᓗ, ᓄᐊᕖᒥᑦ. ᐃᓛᓐᓂᑦ, ᑕᑯᔭᖅᑐᐃᓂᖅᐳᑦ ᑲᑎᖅᓱᒐᓂᑦ ᑐᐊᕕᖅᓲᖅᑕᐅᔪᖅᑎᑑᕐᓇᓚᐅᖅᑐᑦ--ᐊᒥᓱᓂᑦ ᑕᑯᑎᑖᖅᑕᐅᕙᒃᖢᑕ ᐱᕕᑭᑦᑑᑉᓗᓂᓗ—ᐅᕝᕙᓘᓐᓂᑦ ᑕᑯᑎᑕᐅᑐᐃᓐᓇᖅᖢᑕ, ᐊᑕᐅᓯᑐᐃᓐᓇᕐᒥᒃ ᐱᖁᑎᒥᒃ ᕿᒥᕐᕈᑎᐊᕈᒪᒧᑦ ᐋᑭᐅᒪᓂᖓᓂᒃ. ᐃᓛᓐᓂᑦ ᑕᑯᔭᖅᑐᐃᓂᖃᖅᐸᓚᐅᖅᑐᒍᑦ ᑕᒪᐃᓐᓂᒃᑯ, ᑐᕌᒐᕆᔭᖅᐳᓪᓘᓐᓃ ᐱᕕᖃᕐᓂᖅᐳᓘᓐᓃᑦ ᐃᑦᓴᓂᑕᖃᕐᕕᒡᓘᓐᓃᑦ ᐱᕕᖃᖅᑎᑎᓂᖓᒍ.
ᑲᑐᑎᖃᑎᒌᖕᓂᕐᓗ ᐃᓱᒪᓕᐅᖃᑎᒌᖕᓂᕐᓗ ᖃᐅᔨᒪᓂᕐᒥᒃ ᐱᔾᔪᑎᒋᓗᐊᖅᖢᒋᑦ ᐱᓕᕆᖃᑎᒌᒍᒪᓂᖃᓚᐅᑎᐳᒍᑦ. ᖃᐅᔨᒪᓚᐅᕋᒪ ᐊᔪᕈᓐᓇᐃᓯᒪᓂᕋᓗ ᑐᑭᓯᐅᒪᓂᕋᓗ ᐃᑦᓴᕐᓂᑕᖃᕐᕕᖕᓂ ᑲᑎᖅᓱᒐᐃᑦ ᐊᑑᑎᖃᑦᓯᐊᕈᓐᓇᕐᒪᑕ ᐱᓕᕆᐊᕆᔭᑉᑎᓐᓄᑦ, ᓴᓇᑐᓂᕋ ᐱᒡᒍᐃᒃᑲᓗᐊᖅᑎᓪᓗᒍ, ᖃᐅᔨᒪᑉᓗᖓᓗ ᐃᓚᒋᔭᐅᔪᑦ, ᓴᓇᑐᔫᓂᖏᓐᓂᒡᓗ ᒥᖅᓱᕈᓐᓇᑦᑎᐊᕐᓂᖏᓐᓂᒡᓗ, ᐊᔪᕈᓐᓃᑦᑎᐊᖅᓯᒪᓂᖏᓪᓗ ᑐᓴᐅᒪᓂᖏᓐᓂᒡᓗ ᐃᓚᓯᔪᓐᓇᕐᒪᑕ ᐃᓚᑰᓕᖅᑐᓂᒃ. ᑐᑭᓯᐅᒪᑦᑎᐊᕐᓂᕋᓕ ᐃᓕᓐᓂᐊᕐᓂᕐᒥᒃ ᓯᓚᑦᑐᕐᓴᕐᕕᖕᒥᑦ, ᖃᐅᔨᓇᓱᐊᕐᓂᕐᒥᒡᓗ ᓇᐅᑰᕆᐊᖃᕐᓂᕐᒥᒡᓗ ᐋᓪᓚᓂᑦ ᓴᓇᕝᕕᓂᒃ ᓲᕐᓗ ᐃᑦᓴᓂᑕᖃᕐᕕᖕᓂᒃ, ᐊᓯᒃᑲᓕ ᑐᑭᓯᐅᒪᓂᖅᓴᐅᖕᒪᑕ ᐃᓕᖅᑯᓯᑐᖃᓂᒃ ᖃᐅᔨᒪᔭᐅᔪᓂᒃ ᐊᔪᕈᓐᓃᖅᓯᒪᓂᕐᓗ ᒥᖅᓱᕐᓂᕐᒥᒃ ᐆᒃᑑᓯᐅᕐᓂᕐᒥᒡᓗ. ᕉᔅ ᑏᓇ ᑕᒪᐃᓐᓂᓕ ᐊᑑᑎᓕᖕᓂᑦ ᒥᖅᓱᕈᓐᓇᖅᖢᓂ ᑕᐃᑉᓱᒪᓂᑐᖃᕐᓂᒡᓗ ᒥᖅᓱᕈᓯᕐᓂᒃ ᑐᑭᓯᐅᒪᓂᖃᖅᖢᓂ; ᐳᕋᐃᓐᑕ ᑐᑭᓯᐅᒪᑉᓗᓂ ᐊᔾᔨᒌᖏᑦᑐᓂᒃ ᐊᓐᓄᕆᔾᔨᐅᕐᓂᕐᒥᒃ ᐅᑭᐅᑕᖅᑐᕐᒥᙶᖅᑐᓂᒃ; ᐄᕗᕆ ᒪᒃᑯᖕᓂᖓ ᐱᔫᒥᓵᕆᔪᓐᓇᕐᓂᖓᓗ ᐃᓕᑦᑎᒃᑲᓂᕈᒪᓂᖓᓗ ᖁᕕᐊᓇᕐᒪᑦ, ᐊᓯᖏᓐᓂᒡᓗ ᐊᔾᔨᒌᙱᖅᑐᓂᒃ ᒥᖅᓱᕈᓐᓇᖅᖢᓂ; ᕕᓂᐸᑦᓗ ᒪᓕᓴᓗ ᒥᖅᓱᕈᓐᓇᖅᑎᐊᕆᑉᓗᑎᒃ ᐆᒃᑑᓯᐅᕈᓐᓇᖅᖢᑎᒡᓗ ᐃᓚᐅᖃᑕᐅᓯᒪᑉᓗᑎᒃ ᒥᖅᓱᕐᓯᒪᔪᓂᒃ ᓴᖅᑎᑦᑎᓂᖅ; ᒥᓴᓕ ᒥᖅᓱᔪᖅᑎᐊᖅᖢᓂᓗ ᐆᑦᑐᐃᔪᓐᓇᑦᑎᐊᖅᓗᓂᑦᑕᐅᖅ ᑎᑎᕋᐅᔭᕈᓐᓇᑎᐊᖅᑐᖅ, ᓯᕗᓕᐅᕆᔪᓐᓇᖅᑎᐊᖅᖢᓂᓗ; ᑖᒻᓇᓗ, ᓘᕆᐅᑉ ᐱᒋᐊᖅᕈᑎᒋᓚᐅᖅᑕᕋᓗᐊᖓ ᑲᔪᓯᑎᑦᑎᒋᐊᕐᓂᖅ ᑲᑐᑎᖃᑎᒌᖕᓂᒃ, ᑭᓯᐊᓂ ᒥᖅᓱᔪᓂᕐᒥᓂᒡᓗ ᐆᖅᑑᓯᐅᕈᓐᓇᓂᖓᓗ ᖃᐅᔨᑎᑦᑎᓚᐅᑉᐳᖅ. ᐅᔾᔨᕈᓱᓕᓚᐅᖅᐳᒍᓪᓕ ᐊᑐᓂ ᐃᖅᑲᐅᒪᓂᖃᕐᓂᕗ ᑲᑎᒻᒪᑕ ᐅᐱᓐᓇᖅᑐᒥᒃ ᓴᖅᑭᑦᑐᖃᖅᖢᓂ ᐱᒡᒍᒃᑎᒋᐊᖅᖢᓂᓗ ᖃᐅᔨᒪᓂᖅᐳᑦ ᑲᑐᑎᖃᑎᒌᒻᓂᑉᑎᒍᑦ.
ᓴᐅᒥᒃᖠᖅ: ᐅᐊᓕᓂᖅ ᐅᑭᐅᖅᑕᖅᑐᒥᒃ ᓴᓇᐅᒐᖅᑎ ᓇᓗᓇᐃᖅᓯᒪᙱᑦᑐᖅ ᑕᐃᒎᓯᖃᙱᑦᑐᖅ (ᑲᓕᑯ) (2001) ᑲᓕᑯᒃᓴᖅ, ᐊᒪᕈᖅ ᓄᐃᓚᒃᓴᖅ ᓯᓂᒃᓴᕐᓗ; ᑕᓕᖅᐱᒃ: ᖃᒪᓂ’ᑐᐊᖅ (Baker Lake) ᓴᓇᐅᒐᖅᑎ ᓇᓗᓇᐃᖅᓯᒪᙱᑦᑐᖅ ᑕᐃᒎᓯᖃᙱᑦᑐᖅ (ᐊᑎᒋ) [ᐊᖑᑎ]) (c. 1950) ᑐᒃᑐ ᐊᒥᖓ, ᓄᕕᖅᓵᒃᓴᖅ ᖃᑉᓗᓈᖅᑕᖅ, ᓄᕕᖅᓵᒃᓴᖅ ᓇᒡᔪᒡᓗ ᐊᑐᐃᓐᓇᐅᑎᑦᑎᔪᖅ ᕚᒡ-ᖃᐅᒪᔪᖅ ᐊᔾᔨᓕᐅᕆᔨ ᐅᓇᔅᑦ ᒪᐃᔪᕐ © ᐊᔾᔨᓕᐅᕆᔫᑉ
ᑖᒻᓇ ᐊᑕᐅᓯᖅ ᐊᑐᖅᓯᒪᔭᕋ ᐅᕙᓐᓄᑦ ᐊᒃᑐᐃᓂᖃᓗᐊᖅᐳᖅ ᐃᑲᔪᕐᓂᖃᑦᑎᐊᖅᖢᓂᓗ ᐆᒃᑑᓯᐅᕈᓐᓇᓯᓂᕐᒥᒃ ᓄᑖᓂᒃ ᐅᕝᕙᓘᓐᓃᑦᓅᑖᖑᖅᑎᕆᓂᕐᒥᒃ ᐆᒃᑑᑎᑐᖃᕐᓂᒃ ᐳᕋᓐᑕᓗ ᐆᒃᑑᓯᐅᕋᒻᓄᒃ ᑐᐃᓕᑐᖃᕐᒥᒃ ᐃᔾᔪᐊᖅᖢᑎᒍ ᓴᓇᔭᐅᔪᕕᓂᕐᒥᒃ 1900-ᓂᒃ. ᕿᒥᕈᓯᒪᐃᓐᓇᓚᐅᕋᒃᑭᑦ ᑐᐃᓖ, ᐊᔾᔨᒋᔭᐅᙱᓐᓂᖏᓐᓂ ᑐᐃᖅᑯᖅᑐᓂᖏᑦ ᓇᓴᖅᑯᖅᑐᓂᖏᓪᓗ ᓄᐃᔮᑭᖦᖢᑎᒃ. ᑐᐃᖅᑯᖅᑐᓂᖏ ᐱᔪᑎᖓ ᐃᓂᖃᕆᐊᖃᕐᒪᑦ ᑖᒻᓇ ᐊᕐᓇᖅ ᑐᓄᐊᓃᑦᑐᒥᒃ ᐊᒫᖅᑕᒥᓂᒃ ᑎᒍᓯᒋᐊᕈᓂ ᓄᑕᕋᓛᕐᒥᒃ ᓵᖓᓄᐊᕐᓗᒍ ᐊᒪᐅᑎᒦᒋᓐᓇᕐᓗᓂ ᐊᒫᒪᒃᑎᑦᑎᔪᓇᕐᒪᑦ. ᐳᕋᓐᑕ ᐃᓕᑦᑎᓯᒪᑦᑎᐊᕐᒪᑦ ᐆᑦᑑᓯᐅᕐᓂᕐᒥᒃ ᐋᖅᑭᒋᐊᖅᓯᓂᕐᓗ ᒥᖅᓱᒐᒃᓴᒥᒃ. ᑕᑯᔭᖅᑐᐃᓯᒪᑎᓪᓗᑕ ᐅᑭᐅᓕᖕᒥᒃ 120-ᓂ ᑐᐃᓕᖕᒥᒃ ᑭᕙᓪᓕᕐᒥᒃ ᓴᓇᔭᐅᓐᓂᑯᒥᒃ, ᑕᐃᑲᓃᑦᑐᒥᒃ AMNH, ᐆᒃᑑᓯᐅᕈᓐᓇᖅᓯᓚᐅᐳᒍᑦ. ᐳᕋᓐᑕ ᑲᔪᖅᑐᒥᒃ ᐊᓕᓚᔪᕐᒧᑦ ᐃᔾᔪᐊᖅᓯᓚᐅᖅᐳᖅ, ᖃᐅᔨᒪᓂᓂ ᐊᑐᖅᖢᓂᐅᒃ ᐱᔭᕆᐊᑐᔫᒐᓗᐊᖅ ᐃᔾᔪᐊᕋᒥᐅᒃ ᑕᒪᒃᑯᐊ ᑲᑎᖅᓱᖅᓯᒪᓂᖏ ᐆᒃᑐᕋᐅᒻᒧᑦ ᖃᐅᔨᒋᐊᒃᑲᓐᓂᖅᐸᒃᖢᓂᒋᑦ ᒪᓕᑦᑎᐊᕋᓗᐊᖅᒪᖔᑕ. ᑕᐃᒪᐃᓕᐅᕈᒪᐃᓐᓇᖅᑲᑦᑕᓚᐅᖅᓯᒪᒐᒪ ᑲᑎᖅᓱᐊᓂᒃ, ᑭᓯᐊᓂ ᐃᓗᐃᑦᑐᒥᒃ ᒥᖅᓱᐊᓂᒃᓯᒪᔪᒥᒃ ᐆᖅᑑᓯᐅᕌᓂᓚᐅᖅᓯᒪᙱᓚᖓ ᑕᒡᕗᖓᕋᑉᑕ ᑭᓯᐊᓂ ᐃᓗᐃᒃᑲᒥᒃ ᐆᒃᑑᓯᐅᖃᑕᐅᓚᐅᖅᐳᖓ ᑕᐃᑲᓂ AMNH.
ᐳᕋᓐᑕ ᐳᑐᓕᒃ ᐆᒃᑑᓯᐅᖅᑐᑦ ᐃᔾᔪᐊᖅᓯᑉᓗᓂ 120-ᓂᒃ ᐅᑭᐅᓂᒃ ᐊᓂᒍᖅᓯᒪᔪᓂᒃ ᑐᐃᓕᓕᐅᖅᑕᐅᔪᕕᓂᕐᒥᒃ ᑭᕙᓪᓕᕐᒥᐅᑕᕐᒥᒃ ᐊᑐᐃᓐᓇᐅᑎᑦᑎᔪᑦ ᐊᒡᒍᐊᖅ ᑲᑐᑎᖃᑎᒌᑦ
ᑕᒡᕙᙵᓕ, ᐃᓚᐅᑎᑦᑎᖃᓐᓂᕈᒪᓕᓚᐅᖅᐳᒍ ᐃᓐᓇᑐᖃᓂᒃ ᖃᐅᔨᒪᔭᓕᖕᓂᒃ. ᑕᒪᒃᑯᐊ ᑕᑯᓚᐅᖅᑳᖅᖢᑎᒍ ᐱᖁᑏ, ᐊᓐᓄᕌᓪᓗ ᐆᒃᑑᑏᓪᓗ ᐱᖃᑎᖃᕐᓗᑕ ᖃᐅᔨᒪᑦᑎᐊᖅᑐᓂᒃ ᐃᓄᖕᓂᒃ ᐃᑲᔪᕐᓂᖃᕋᔭᕐᓂᖓ ᑲᔪᓯᓂᖃᑦᑎᐊᖁᑉᓗᒍ ᖃᐅᔨᒪᓂᖅ. ᑕᒪᑉᑕ ᐃᓛᒃᑯᑦ ᖃᐅᔨᒪᓂᖄᕋᓗᐊᖅᖢᑕ ᐅᑯᓂᙵ ᐱᖁᑏ, ᐊᓐᓄᕌᓂᒡᓗ ᐆᒃᑑᑎᓂᒡᓗ, ᖃᐅᔨᒪᑉᓗᑕᓗᑦ ᐃᓄᐃᑦ ᐃᓕᓐᓂᐊᖅᑎᔾᔪᓯᖏᑦ ᐅᔾᔨᖅᑐᐃᓂᒃᑯᑦ ᐃᓕᑦᑎᑦᑎᐊᕐᓇᓂᕐᓴᐅᖕᒪᑦ ᐊᓯᖏᓐᓂᒃ ᐃᓚᐅᔪᖃᖅᑎᓪᓗᒍ ᐃᓚᐅᑎᑦᑎᓂᕐᓗ ᐱᓪᓚᖅᑖᖑᖕᒪᑦ, ᑕᒪᒃᑯᐊ ᐃᓄᐃᑦ ᖃᐅᔨᒪᓂᖓ ᑲᔪᓯᑦᑎᐊᕐᓂᖅᓴᐅᓇᔭᖅᑐᖅ ᐃᓄᑑᔾᔨᙱᖦᖢᓂ. ᑕᒡᕙᓕ, ᐃᓚᐅᖁᔨᓯᒪᕗᒍ ᐃᓐᓇᕐᓂᒃ ᑲᑐᑎᖃᑎᒌᓂᑉᑎᓄᑦ ᑲᔪᓯᑦᑎᐊᖁᔨᑉᓗᑕ ᓯᕗᓕᕆᔭᐅᔪᐃᑦ ᖃᐅᔨᒪᓂᖓ ᑲᔪᓯᑦᑎᐊᖁᑉᓗᒍ. ᐃᓚᐅᑎᓪᓗᒋᑦ ᕉᔅ ᑏᓇᓗ ᐳᕆᓐᑕᓗ, ᐃᓐᓇᕈᖅᐸᓪᓕᐊᔫᒃ, ᐅᕝᕙᓘᓐᓃᑦ ᐃᓅᑐᖃᐅᓂᕐᒥᒃ ᐃᓕᑦᑎᕙᓪᓕᐊᔫᒃ, ᑕᒪᐃᓐᓄᓗ ᑐᒃᑯᕐᓂᖃᑦᑎᐊᖅᖢᑎᒃ ᓇᒡᓕᒍᑦᑕᐅᑉᓗᑎᒃ. ᐅᕙᑉᑎᓐᓂᓗᒃᑖᑦ ᐃᑲᔪᖅᓯᒪᔪᑦ. ᐱᖃᓐᓇᕆᓕᖅᓗᒋᓪᓗ ᐃᑲᔪᖅᑎᒋᑉᓗᑎᒍ ᓯᕗᒧᐊᒃᐸᓪᓕᐊᖃᑎᒋᑉᓗᑎᒍᓪᓗ; ᐃᓚᒌᓕᖅᖢᑕ. ᐃᑲᔪᖅᓯᒪᑦᑎᐊᕐᒪᑕ ᐅᕙᑉᑎᓐᓂᒃ, ᑐᑭᒧᐊᑦᑎᑦᑎᕙᓪᓕᐊᑉᓗᑎᒡᓗ ᐆᒃᑑᓯᐅᕐᓂᒥᒃ ᐊᒻᒪᓗ ᐆᒃᑑᑎᑐᖃᓂᒃ ᐊᔾᔨᒌᙱᓐᓂᖏᓐᓂᒃ ᑐᑭᓯᐅᒪᑎᑦᑎᒃᑲᓐᓂᖅᖢᑎ ᐊᓯᖏᓐᓂᒡᓗ ᓴᖅᑭᑎᕆᔪᓐᓇᖅᓯᒃᑲᓂᖁᑉᓗᑕ ᒫᓐᓇ ᓴᓇᔭᐅᕙᓕᖅᑐᓂᒃ ᐱᔫᒥᒋᔭᖃᕐᓂᒃᑯᑦ ᐊᓐᓄᕌᓂᑦ ᑕᑯᔭᖅᑐᖅᓯᒪᓚᐅᖅᑕᑉᑎᓐᓂᒃ ᑲᖅᑎᖅᓱᐊᖑᓯᒪᔪᓂᑦ. ᕉᔅ ᑏᓇ ᐆᒃᑑᓯᐅᖃᑎᖃᓕᓚᐅᖅᐳᖅ ᐄᕗᕆᒥ ᐆᒃᑑᓯᐅᖅᑕᐅᓂᑯᓂᒃ ᐸᓐᓂᖅᑑᒥᒃ, ᐃᓚᐅᑎᑦᑎᑉᓗᑎᒃ ᓯᕗᓕᕆᓚᐅᖅᑕᒥᖕᓂᒃ ᐅᕝᕙᓘᓐᓃᑦ ᐃᑲᔪᖅᑐᐃᔪᒥᒃ, ᑐᑭᓯᐅᒪᓂᖅᓴᐅᓕᖅᖢᑕᓗ ᐊᔾᔨᒌᖏᓐᓂᖃᕐᓂᖏᓐᓂᒃ ᓄᓇᖃᑎᒌᖏᑦᑐᑦ.
ᓴᐅᒥᒃᖠᖅ: ᕉᔅ ᑏᓇ ᐊᓕᕙᒃᑐᒃ ᐸᐅᓐᓇᑯᓗᒃ 1869 (2024) ᑐᑦᑐ ᕿᓯᐅᔭᖅ, ᕿᓯᐅᔭᖅ, ᓱᖓᐅᔭᐃᑦ ᐸᐅᓐᓇᐃᓪᓗ ᓯᑎᔪᒦᑦᑐᑦ; ᕿᑎᐊᓂᑦ:ᕕᓂᕙᑦ ᓄᙵᖅ ᑯᑯᒃᐹᓕᒃ (2024) ᔭᐸᒃᓴᖅ, ᓯᓂᒃᓴᖅ, ᓴᖑᐃᐱᓗᐃᑦ ᓂᒡᔭᙳᐊᓪᓗ; ᑕᓕᖅᐱᒃ: ᒥᓴ ᑯᐊᑕᓐ ᐊᕐᓇ - 1/2295 A (2024) ᑕᖅᓯᖅᑐᖅᓯᒪᔪᖅ, ᓄᕕᖅᓴᖅᓴ ᓯᓂᒃᓴᕐᓗ ᐊᔾᔨᓕᐅᖅᑕᐅᔪᖅ ᕗᕙ ᑕᑯᔭᒐᖃᕐᕕᒃ ᐊᑐᐃᓐᓇᐅᑎᑦᑎᔪᖅ ᓗᐊᕋᓐᔅ ᐳᐃᕆ © ᐊᔾᔨᓕᐅᕆᔫᑉ
ᐊᔪᕿᖅᑐᐃᓂᖅ ᑐᙵᒋᔭᐅᖃᑕᐅᕗᖅ ᐊᒡᒍᐊᑉ ᑐᕌᒐᖏᓐᓂᒃ, ᑖᒃᑯᐊᓗ ᐃᑲᔪᖅᑎᒋᑉᓗᒋᑦ ᕉᔅ ᑏᓇᓗ ᐳᕋᓐᑕᓗ ᒥᒃᓯᖃᖅᑎᐊᓚᐅᖅᑐᖅ ᓱᖃᐃᒻᒪ ᑕᑯᑎᑦᑎᔪᒪᒐᑉᑕ ᖃᓄᐃᑦᑑᓇᔭᕐᒪᖔᖅ ᐊᔪᕿᖅᑐᐃᑦᑎᐊᕐᓂᖅ ᑭᖑᕚᕆᔭᐅᔪᓄᑦ. ᐳᕋᓐᑕᐅᑉ ᐃᑲᔪᓚᐅᖅᐹᖓ ᑐᐃᓕᓕᐅᕐᓂᕐᒥᒃ ᑲᑎᖃᑎᒌᒃᑲᑉᑕ 2022-ᖑᑎᓪᓗᒍ, ᐊᑲᔪᓚᐅᕆᑉᓗᓂᖓ ᐋᖅᑭᒋᐊᖃᕐᓂᖓᓂᑦ ᐊᒡᒍᐊᑉ ᒪᓕᓴ ᐆᒃᑑᑎᖓᓂᒃ—ᐱᒋᐊᕐᓂᑯᒋᓚᐅᑕᖓ ᐅᖃᐅᓯᕆᒃᑲᓐᓂᕐᓂᐊᖅᑕᕋᐅᒐᓗᐊᖅ ᐊᐅᑦᑎᐊᕈ—ᐃᑲᔪᕐᓂᖃᑦᑎᐊᓚᐅᕐᓂᖓᓂ ᐱᖓᓱᓂᒃ ᐆᒃᑑᑎᓂᒃ ᐊᑕᐅᓯᙳᐃᓂᖅ ᑲᑎᑎᕆᓂᒃᑯ. ᐳᕋᓐᑕᐅᑉ ᐃᑲᔪᓚᐅᖅᐹᖓ ᑲᑎᑎᕆᓂᕐᒥᒃ ᑕᕐᕋᙳᐊᓕᐅᖅᓯᒪᔪᒥᑦ ᐋᖅᑭᒋᐊᖅᓯᓂᕐᒥᒃ ᑐᐃᓕᖑᐊᕐᒥᒃ, ᑕᖅᑐᓇᙳᐊᖓ ᖁᒡᕙᕆᐊᖅᓯᒪᑉᓗᒍ, ᐊᐃᖏᓗ ᐊᒪᐅᑎᒥᙵᑐᒥᒃ ᐆᑦᑑᓯᐅᖅᖢᓂᐅᒃ ᓇᓴᖅᑯᖅᑐᑉᓗᒍᓗ ᓲᑉᓗ ᔭᐸᒋᔭᐅᕙᓕᖅᑐᑎᑐᑦ ᓇᓴᒃᓴᖃᖅᖢᒍ ᑭᓯᐊᓂ ᐊᒪᐅᑎᐅ ᓇᓴᖓᑎᑑᖅᖢᒍ. ᑖᒻᓇ ᐊᓐᓅᕌᓕᐅᖅᓯᒪᔪᖅ ᑕᐅᑐᖅᑰᓯᒪᔭᑐᖃᕋ ᓴᓇᔪᒪᔭᑐᖃᕆᑉᓗᒍᓗ ᑭᓯᐊᓂ ᓇᓗᒋᓚᐅᕋᒃᑯ ᖃᓄᖅ ᐆᒃᑑᓯᐅᕋᔭᕐᒪᖔᑉᑯ. ᑖᒻᓇ ᐆᒃᑑᑎᑦᑎᐊᕙᐅᓛᕆᔭᕋ ᓱᖃᐃᒻᒪ ᑕᐅᑐᖅᑰᓯᒪᓂᑐᖃᕆᒐᒃᑯ, ᐊᒻᒪᓗ ᐃᑲᔪᖅᑎᒋᓚᐅᕋᒃᑯ ᐴᕋᓐᑕ ᐅᐱᒋᒐᒃᑯ. ᑕᐃᒪᓐᓇᐃᓕᐅᖅᖢᓂ ᐃᖅᑲᐅᒪᓂᕐᒥᑦ ᓯᕗᒻᒧᐊᒃᑎᑦᑎᐊᕐᓇᕐᓂᖅᓴᐅᖕᒪᑦ ᑭᖑᒧᓪᓗ ᐃᖅᑲᐃᑦᑕᖅᖢᓂ. ᑕᐃᒪᓐᓇᐃᓕᐅᖅᖢᓂ ᑲᒃᑭᑎᓯᒪᔪᖅᑎᑐᑦ ᐃᖃᐅᒪᓇᕐᓂᖅᓴᐅᓐᓇᓂᐊᕐᒪᑦ ᑭᒍᕚᖑᔪᓪᓗ ᐆᒃᑐᕈᓐᓇᖅᓯᓂᐊᕐᒪᑕ ᓄᑖᖑᖅᑎᕆᓂᕐᒥᒃ, ᓲᕐᓗ ᑕᐅᑐᖅᑰᓚᐅᖅᑕᒻᓂᒃ ᓯᕗᓕᑉᑕ ᐱᒋᐊᖅᑎᓂᑯᖏᓐᓂᒃ.
ᑲᑎᖅᓱᐊᑦ ᑕᑯᔭᖅᑐᓚᐅᖅᑕᕗᑦ ᒥᒃᓯᖃᓗᒃᑖᓚᐅᖅᐳᑦ. 2023-ᖑᑎᓪᓗᑕᑯᔭᖅᑐᐃᓚᐅᖅᐳᒍ ᒪᑰᑦ ᓯᑰᕙᑦ ᐃᑦᓴᓂᑕᖃᕐᕕᖕᒧᑦ ᒪᓐᑦᕆᐊᒥᑦ, ᑕᑯᓚᐅᖅᐳᒍᓗ ᕿᓯᖕᒥᒃ ᐊᒪᐅᒻᒥᒃ ᕿᒻᒥᓱᖕᒥᒃ ᓄᐃᓪᓕᖅᑐᓯᒪᔪᖅ ᑯᐸᐃ ᒥᒃᓯᖓᓂᑦ ᑕᓯᐅᔭᕐᔪᐊᕐᒥᐅᑕᕐᒧᒃ, ᓄᓇᕕᖕᒥᑦ, ᓴᓇᔭᐅᓐᓂᑯ, ᐃᒻᒪᖄ 1890–97-ᒥᒃ. ᑖᒻᓇ ᐊᒪᐅᑦ ᒥᑭᔪᖅᓯᐅᑕᐅᑉᓗᓂ, ᐊᑯᑭᖦᖢᓂᓗ ᓇᓴᖅᑯᖅᑐᑉᓗᓂ. ᐊᐃᖏᑦ ᐅᔾᔨᕐᓇᑦᑎᐊᑐᒥ ᐳᑭᖃᖅᖢᑎᒃ ᓯᑕᒪᓂ ᕿᕐᓂᖅᑐᓂᒃ ᐊᒻᒪ ᐱᖓᓱᓂᒃ ᐳᑭᖃᕐᖢᓂ ᓯᓈᒍ. ᐆᒃᑑᑎᑐᖃᖅᑎᑐ ᐊᒥᖃᖅᖢᓂ, ᐆᒃᑑᖅᓯᒪᑉᓗᓂ ᐃᓛᖅᑐᖅᓯᒪᔪᖅᑐᑦ ᓲᕐᓗ ᐋᖅᑭᒋᐊᑕᐅᓯᒪᔪᖅᑐᑦ ᐋᖅᑭᓱᒐᑎᑐᑦ ᐱᔭᕆᐊᑐᓂᖓ ᐅᔾᔨᕐᓇᖅᖢᓂ ᑕᑯᒃᓴᐅᑉᓗᓂᓗ ᐃᓱᒪᑐᓂᖏ ᐋᖅᑭᐅᒪᑎᑦᑎᑦᑎᐊᕈᓐᓇᕐᓂᖏᓪᓗ ᐃᓄᐃᒃ ᒥᖅᓲᖅᓯᖏᑦ. ᐊᓐᓄᕆᔾᔨᐅᕐᓂᖅ ᐊᒥᕐᓂᒃ ᐅᔾᔨᖅᑐᐃᓐᓇᕆᖃᕐᒪᑕ ᑕᒪᒃᑯᐊᑦ ᐊᒦᑦ ᐊᑐᑦᑎᐊᕋᓱᒋᐊᖃᕐᒪᑕ, ᐃᓛᖅᑐᕆᐊᖃᖅᖢᒋᓪᓗ ᐋᖅᑭᐅᒪᑦᑎᐊᕐᓗᒋ ᒥᖅᑯᖏ ᒪᓕᒃᑎᑦᑎᐊᕐᓗᒋ ᐋᓐᓄᕌᓕᐅᕐᓂᐊᖅᖢᓂ.
ᓄᓇᕕᓐᒥᐅᑦ ᓴᓇᐅᒐᖅᑎ ᓇᓗᓇᐃᖅᓯᒪᙱᑦᑐᖅ ᑕᐃᒎᓯᖃᙱᑦᑐᖅ (ᐊᒪᐅᑦ) (c. 1890–97) ᕿᓯᒃ, ᕿᒻᒥᓱᒃ ᐃᕙᓗᒃᓴᓪᓗ 143 × 70 × 42 cm ᓴᖅᑭᑎᑕᐅᒃᑲᓐᓂᖅᑐᖅ ᐊᖏᖅᑕᐅᓯᒪᓂᒃᑯᑦ ᑭᙵᐃᑦ ᑎᑎᖅᑐᒐᐃᑦ © ᑎᑎᖅᑐᒐᖅᑎᒧᑦ
ᑕᒪᑉᑕ ᑕᑯᓚᐅᖅᓯᒪᙱᓚᒍᓪᓘᓐᓂᑦ ᐊᓐᓄᕌᓕᐅᖅᑕᐅᓯᒪᔪᑐᖃᕐᒥᒃ, ᐃᖅᑲᐃᔾᔪᑎᒋᑉᓗᒍᓗ ᐃᒃᐱᒍᓱᓚᐅᖅᑐᓂᒃ ᐃᓐᓇᑐᖃᓂᒃ ᑕᑯᔭᖅᑐᐃᓚᐅᖅᑐᓂ ᐃᑦᓴᓂᑕᓂᒃ ᑲᑎᖅᓱᐊᒍᔪᕕᓂᕐᓂᒃ ᐊᐅᓚᔪᓕᐊᖑᓯᒪᔪᖅ ᑕᐃᔭᐅᔪᖅ ᐃᓄᐃᑦ ᐱᖁᑎᖏᑦ (ᐱᒋᔭᐅᔪᑦ ᐃᓄᖕᓄᑦ) (2009) ᐱᕐᓇᑎ ᑏᓐᒧᓪᓗ ᓵᑲᓚᐃ ᑯᓄᖕᒧᓪᓗ. ᐃᓐᓇᑐᖃᓂᒡᓗ ᐅᖃᖅᑐᖃᓚᐅᖅᖢᓂᓗ ᐃᑦᓴᕐᓂᑕᖃᕐᕖᑦ ᐱᓐᓚᑦᑖᖑᓂᖏᓐᓂᒃ ᐊᓂᖅᑕᓘᓐᓃᑦ ᐸᐸᑦᑎᓯᒪᖕᒪᑕ ᐃᓕᖅᑯᓯᑉᑎᓐᓂᒃ ᐱᖁᑎᓂᒃ ᐅᕙᒍ ᐸᐹᓂᒍᓐᓇᙱᑕᑉᑎᓐᓂᒃ. ᑕᑯᔭᖅᑐᐃᓂᕆᓚᐅᖅᑕᕗᑦ ᒪᑰᑦ ᓯᑑᕙᑦ-ᒧᑦ ᐃᒃᐱᖕᓇᕐᓂᖃᑦᑎᐊᓚᐅᖅᐳᖅ ᐅᕙᑉᑎᓐᓄᑦ. ᒥᒃᓯᖃᑦᑎᐊᓚᐅᖅᖢᓂᓗ ᓱᖃᐃᒻᒪ ᐃᓕᑦᑎᒃᑲᓐᓂᕈᑎᒋᓚᐅᕋᑉᑎᒍ ᓴᓇᔾᔪᓯᓪᓗᐊᑕᕐᒥᒃ, ᐃᓚᖏᓐᓂᒃ ᐱᑦᑕᖃᓚᐅᕐᒪᑦ ᐃᖃᐅᒪᔪᓐᓇᖅᑕᑉᑎᓐᓂᒃ, ᑕᑭᔪᒥᒃ ᐃᓚᓯᒪᓂᖓ ᖄᖓᒍ ᓇᓴᐅᑉ ᑯᑯᒃᐹᖑᔾᔪᑎᖓᓂᒃ, ᐃᓚᔭᐅᖃᑦᑕᖅᑑᒐᓗᐊᖅ ᓯᕙᓂᕈᑎᐅᔮᖅᑐᖅ. ᕉᔅ ᑏᓇ ᐃᓕᑕᖅᓯᑲᐅᑎᒋᑉᓗᓂ ᐱᓪᓚᑦᑖᖑᓂᖓᓂᒃ ᐅᑎᖅᑎᑦᑎᓂᖅ ᖃᐅᔨᒪᔭᐅᔪᕕᓂᕐᒥᒃ ᓴᖅᑭᑎᒃᑲᓂᕈᒪᑉᓗᒍᓗ ᐊᓐᓄᕆᔾᔨᐅᕐᓂᒃᑯ ᐊᖏᕐᕋᕈᓂ.
ᕉᔅ ᑏᓇ ᐊᓕᕙᒃᑑᑉ ᓴᓇᓯᒪᔭᖓ ᐊᒪᐅᑦ ᐸᖕᓂᖅᑑᕐᒥᐅᑎᑐᑦ (2022). ᐊᑐᐃᓐᓇᐅᑎᑦᑎᔪᑦ ᐊᒡᒍᐊᖅ ᑲᑐᑎᖃᑎᒌᑦ
ᑲᑐᑎᖃᑎᒌᖕᓂᒃᑯᑦ, ᐋᖅᑭᒋᐊᖅᐸᓪᓕᐊᔪᓐᓇᖅᐸᕗ ᐃᓚᑯᙳᖅᓯᒪᔪᑦᖃᐅᔨᒪᓂᖅᐳᑦ ᓱᖏᖅᑕᐅᓯᒪᓕᓚᐅᖅᑳᖅᑎᓪᓗᒍ, ᐱᓗᐊᖅᑐᒥᒃ, ᓴᖅᑭᑎᖃᑕᐅᓗᒋᑦ ᐊᑎᖅᐳᑦ—ᐊᓱᐃᓛᒡᓗ, ᐃᒃᐱᖕᓇᖅᑐᒥ ᐃᑲᔪᕐᓂᖃᖅᑐᒥᑦ ᐃᖅᑲᐅᒪᔾᔪᑎᓂᒃ—ᓴᖅᑭᑎᑦᑎᔪᓐᓇᖅᐳᒍᑦ: ᐃᓛᖅᑐᐃᔪᖅᑐᑦ ᓴᖅᑭᑎᕆᒃᑲᓂᕐᓗᑕ ᓴᓇᑐᔪᓐᓇᕐᓂᒃᑯ. ᐃᓚ ᑕᒡᕙᐅᕗᒍ ᑐᑭᓯᐅᒪᓂᖃᖅᖢᑕ ᐃᓅᓂᑉᑎᓐᓂᒃ ᖃᐅᔨᒪᓂᖃᖅᖢᑕᓗ, ᑕᒡᕙᓗ, ᐃᓚᓗᒍ ᑲᑐᑎᖃᑎᒌᓂᕐᒥᒃ, ᑐᑭᑖᖅᖢᓂᓗ ᐃᑲᔪᖅᑎᒌᓪᓚᑦᑖᕆᐊᖃᕐᓂᕐᒥᑦ. ᐊᕗᓐᓂᕕᒃ 2024-ᖑᑎᓪᓗᒍ ᑲᑎᓚᐅᖅᓯᒪᕗᒍ ᐃᖃᓗᐃᑦ, ᓄᓇᕘᒥᑦ, ᑕᐅᑐᖂᖅᖢᑕ ᐊᒡᒍᐊᖅ ᖃᓄᐃᓕᐅᒃᑲᓐᓂᕈᓐᓇᕐᒪᖔᑦ, ᐊᒻᒪᓗ ᓱᓇᓂᑦ ᒥᖅᓱᕈᓐᓇᒪᖔᑉᑕ ᐊᑕᐅᑦᑎᒃᑯᑦ. ᑲᑎᓯᒪᑎᓪᓗᑕ, ᐅᖃᐅᓯᖃᓕᓚᐅᖅᐳᒍᑦ ᖃᓄᐃᑦᑐᓂᑦ ᐊᓐᓄᕆᔾᔨᐅᕈᓐᓇᕐᒪᖔᑉᑕ ᐃᑲᔪᖅᑎᒌᒡᓗᑕ. ᓴᓇᔪᒪᑉᓗᑕᓗ. ᓴᖅᑭᑦᑎᔪᒪᑉᓗᑕ ᐅᕙᑉᑎᓐᓂᙶᖅᑐᓂᑦ ᓯᕗᓕᑉᑎᓐᓂᙶᖅᑐᓂᒡᓗ ᑲᑐᑎᖃᑎᒌᒍᓐᓇᕐᓂᕐᓗ ᐱᓕᕆᐊᑉᑎᓐᓂᒃ. ᐅᖃᐅᓯᕆᔭᑐᖃᕆᓚᐅᖅᖢᑎᒍ, ᐅᔾᔨᕈᓱᓕᓚᐅᖅᐳᒍ ᐊᔾᔨᒌᕈᔪᖕᓂᑦ ᐊᑐᖅᓯᒪᓂᖃᕋᑉᑕ ᑲᑎᖅᓱᐊᑎᒍᑦ, ᑎᒍᔭᕗᓪᓕ ᑕᑯᔭᖅᑐᐃᓯᒪᓚᐅᖅᑎᓪᓗᑕ ᑮᓇᐅᓂᑉᑎᓐᓄᑦ ᐊᑐᓂ ᐊᒃᑐᐊᓂᖃᓚᐅᖅᐳᑦ. ᐃᓱᒪᓕᐅᖅᓕᖅᖢᑕᓗ ᐆᒃᑑᓯᐅᕈᒪᓂᕐᒥᒃ ᐱᒋᐊᕈᑎᒋᓗᒍ ᐊᔾᔨᒌᒡᓗᒍ ᐆᒃᑑᑦ—ᓲᕐᓗ ᑎᒥᒃᓴᖓ, ᑕᒡᕙᐃᓐᓇᕐᓗ—ᐆᒃᑑᓯᐅᕈᒪᓕᖅᖢᑕ ᐅᕙᑉᑎᓐᓂ ᐊᑐᓂ ᐊᓐᓄᕆᔾᔨᐅᕈᓐᓇᕐᓂᖅᐳᑦ ᒪᓕᒡᓗᒍ ᐊᓐᓄᕆᔾᔨᐅᕈᑕᐅᔪᕕᓃᓪᓗ ᐃᓱᒪᒋᓗᒋ ᑕᑯᓯᒪᔭᕗᓗ ᐃᑦᓴᓂᑕᖃᕐᕕᖕᓂᒃ ᐃᖅᑲᐅᒪᓗᒋᑦ.
ᕕᓂᕙᑦ ᓄᙵᖅ ᕉᔅ ᑏᓇ ᐊᓕᕙᒃᑐᕐᓗ ᑕᑯᔭᖅᑐᐃᕌᓂᒃᓯᒪᑉᓗᑎᒃ ᐊᒪᐅᒻᒥᒃ ᐸᓐᓂᖅᑑᕐᒥᐅᑎᑐᑦ ᓴᓇᓯᒪᔪᒥᒃ (c. 1890–97) ᑕᐃᑲᓂ ᒪᑯᐊᑦ ᓯᑑᕙᑦ ᐃᑦᓴᕐᓂᑕᖃᕐᕕᒃ ᒪᓐᑦᕆᐊᓪ 2022 ᐊᑐᐃᓐᓇᐅᑎᑦᑎᔪᑦ ᐊᒡᒍᐊᖅ ᑲᑐᑎᖃᑎᒌᑦ
ᐃᓱᒪᒋᔭᖃᖅᖢᑕ ᐊᒃᑐᐊᓂᖃᕐᓗᒋᑦ ᐊᓐᓄᕆᔾᔨᐅᖃᑎᒌᖕᓂᐊᖅᑎᓪᓗᑕ, ᐅᕙᑉᑎᓐᓂᖔᓂᖃᕐᓗᒋᑦ ᖃᐅᔨᓯᒪᔭᑉᑎᓐᓂᒃ ᑲᑎᖅᓱᐊᓂᒃ ᐅᓂᑳᓯᒪᓂᖃᕐᓂᖏᓐᓂ. ᑕᐃᒎᓯᖃᖅᑎᖦᖢᒍᓗ ᒪᓕᓴ ᐆᒃᑑᑦ , ᓲᖃᐃᒻᒪ ᑖᑉᓱᒪ ᒪᓕᓴᐅᕐ ᐆᒃᑑᓯᐊᕆᖕᒪᒍ. ᕕᓂᐸᑦ ᖃᐅᓪᓗᖅᑐᒥᒃ ᐊᓐᓄᕌᓕᐅᓕᓚᐅᖅᐳᖅ ᖃᐅᔨᒪᔭᐅᔾᔪᑎᖓᓂᒡᓗ ᓯᓂᖃᖅᖢᒍ ᐊᒪᐅᑦ ᑕᑯᓚᐅᖅᑕᕗᑦ ᒪᓕᒃᖢᒍ ᑕᐃᑲᓂ AMNH-ᒥᑦ. ᓇᓗᓇᐃᔭᐃᑉᓗᓂ ᓄᓇᖓᓐᓂ, ᓄᓇᕕᖕᒥ, ᓇᓴᖏᑦ ᐊᖕᒪᓗᖅᑑᖃᑦᑕᕐᒪᑕ, ᑭᓯᐊᓂᓕ ᓄᓇᕘᒥᑦ ᑯᑯᒃᐹᖃᕐᒪᑕ. ᑭᓯᐊᓂᑦᑕᐅᖅ, ᑕᐃᖕᓇ ᐊᒪᐅᑦ ᑕᐃᑲᓂ AMNH-ᒦᑦᑐᖅ ᑯᑯᒃᐹᑭᒻᒪ, ᑖᒻᓇᓕ ᕉᔅ ᑏᓇᐅᑉ ᓴᓇᔾᔪᓯᐅᓂᕋᖅᖢᓂᐅᒃ ᐃᓚᒋᔭᖏᓐᓄᑦ ᓄᓇᖅᑲᑎᖏᓐᓄᓗ, ᐅᔾᔨᕐᓇᕐᓂᖓᓂᒃ ᑕᐃᒫᒃ ᓴᓇᖅᑳᖅᑐᕕᐅᓂᖏᓐᓂᒃ ᐃᓚᖃᕋᒥ ᕿᑭᖅᑖᓗᖕᒥᐅᓂᒃ. ᑕᐃᒪᐃᑦᑐᓂᒃ ᒥᑭᔫᒐᓗᐊᓂᒃ ᐋᖅᑭᐅᒪᓂᖏᓐᓂᒃ ᐊᓅᕌᑉᑎᓐᓂᒃ—ᐃᓕᑕᖅᓯᔪᓇᕐᓂᕆᕚ ᐊᒃᑐᐊᓂᖃᕐᓂᖏᓐᓂ ᓇᑭᖔᕐᓂᖏᓐᓂᒃ ᓄᓇᕐᔪᐊ ᓯᕕᑐᒐᓗᐊᖅᑎᓪᓗᒍ--- ᑕᑯᓐᓇᖅᓯᑉᓗᓂᓗ ᐃᖃᐅᒪᓂᖅᑖᕐᓂ ᐃᖅᑲᐅᒪᔾᔪᑎᒃᓴᖅᑖᕐᓂᕐᓗ, ᐱᓗᐊᖅᑐᒥᒃ ᐅᕙᒍᑦ ᑲᑐᑎᖃᑎᒌᑎᒍ ᓄᓇᖃᑎᒌᖏᒃᑲᓗᐊᖅᖢᑕ ᐊᕕᒃᑑᖅᓯᒪᔪᓂᖔᕌᓗᐊᖅᑎᓪᓗᑕᓗ.
ᑯᕆᔅᑕ ᐅᓗᔪᒃ ᓴᕚᔅᑭ, ᕕᓂᕙᑦ ᓄᙵᖅ, ᕉᔅ ᑏᓇ ᐊᓕᕙᒃᑐᒃ, ᐊᒻᒪᓗ ᐄᕗᕆ ᑮᓇᐃᓐᓇᖅ ᐅᖃᐅᓯᖃᖅᑎᓪᓗᒋᒃ ᐊᓐᓄᕆᔾᔨᐅᕐᓂᕐᒥᒃ ᐆᒃᑑᑎᒥᙶᖅᑐᒥᒃ ᑕᐃᔭᐅᔪᖅ ᒪᓕᓴ ᐆᒃᑑᑦ ᑕᐃᑲᓂ ᓄᓇᖃᖅᑐᑦ ᐊᒥᐊᓕᒐᑦ ᓄᓇᖃᖅᑳᖅᑐᓄᓪᓗ ᑲᑎᒪᔩᑦ ᑲᑎᒪᓂᐅᓚᐅᖅᑐᒥᒃ ᐴᑕ, ᓄᐊᕖ, 2024 ᐊᑐᐃᓐᓇᐅᑎᑦᑎᔪᖅ ᑕᖅᑲᓕᒃ ᐹᑐᕆᑦ
ᐊᒡᒍᐊᑉ ᐊᑐᖅᓯᒪᔭᖓ ᐱᒡᒍᔪᒥᒃ ᐅᓂᒃᑳᓯᒪᕗᖅ ᓴᙱᓂᖃᕐᓂᖓᓂᓗ ᑲᑐᑎᖃᑎᒌᓂᒃᑯᑦ, ᐃᓕᖅᑯᓯᕐᒥᒡᓗ ᓴᖅᑭᑦᑎᑲᓐᓂᕐᓂᖓᓂᒃ ᐃᖃᐅᒪᓂᖃᕈᓐᓇᕐᓂᕐᒥᒡᓗ. ᐊᑕᐅᑦᑎᒃᑯ ᑐᑭᓯᐅᒪᓂᖃᑦᑎᐊᑲᓐᓂᓕᖅᖢᑕ ᐃᓅᓂᑉᑎᓐᓂᒃ ᐅᔾᔨᓇᖅᓯᑎᑦᑎᑉᓗᑕᓗ ᐳᐃᒍᖅᑕᐅᓯᒪᓕᖅᑐᓂᑦ ᐃᓕᖅᑯᓯᑉᑎᓐᓂᒃ ᓱᖏᖅᑕᐅᓯᒪᓕᓇᐅᒃᓂᒃᑯᑦ. ᑕᑯᔭᖅᑐᐃᓯᒪᓂᖅᐳᑦ ᑲᑎᖅᓱᐊᓂᑦ ᐃᓂᑖᖅᑎᑦᑎᓯᒪᕗᕐᓗ ᐅᑎᖅᑎᑦᑎᓇᓱᐊᕐᓂᕐᒥᒃ ᖃᐅᔨᒪᔭᐅᔪᑐᖃᐅᔪᕕᓂᕐᓂᒃ, ᐋᖅᑭᒋᐊᓯᓂᕐᓗ ᐱᖁᑎᒌᔭᐅᔪᕕᓃᙶᖅᑐᓂᒃ, ᓴᖅᑎᑦᑎᒋᐊᕈᑎᒋᑉᓗᒋᑦ ᐱᔫᒥᓵᕈᑎᒋᓗᒋᓗ. ᐸᐸᑦᑎᓇᓱᐊᕐᓂᕐᒧᑐᐊᖑᙱᒻᒪᑦ, ᐃᓚᒋᔭᐅᓂᕐᒨᓂᖃᕐᒥᖕᒪᑦᑕᐅᖅ ᐃᖅᑲᐃᑦᑕᕐᓂᕐᒥᒃ, ᐃᖅᑲᐅᒪᓂᖅᑖᖅᑎᑦᑎᔪᑎᒥᒡᓗ ᕿᒪᐃᓂᒥᒡᓗ, ᐋᖅᑭᒃᓱᐃᓃᓪᓗ ᓯᕗᒧᐊᒃᑎᑕᐅᓗᑎᒃ ᓴᓇᖅᑎᐊᓯᒪᓇᓱᐅᕐᓂᒃᑯᑦ. ᐃᖃᐅᒪᐃᓐᓇᕈᓐᓇᖅᓯᓂᖅ ᓄᖅᑲᑐᐃᓐᓇᕆᐊᖃᙱᒻᒪ ᑲᔪᓯᑎᒋᐊᖃᕐᒪᑦ ᑐᓴᐅᒪᓂᒃᑯᓪᓗ ᓴᖅᑭᑎᕆᓂᒃᑯᓪᓗ.
ᑯᕆᔅᑕ ᐅᓗᔪᒃ ᓴᕚᑦᔅᑭ ᐸᐸᑦᑎᓇᓱᐊᖅᑎᐅᕗᖅ, ᖃᐅᔨᓇᓱᒃᑲᓐᓂᖅᑎᐅᕗᖅ, ᐃᑦᓴᓂᑕᓕᕆᔨᐅᕗᖅ, ᓱᖓᐅᔭᓕᕆᔪᓐᓇᖅᑐᖅ, ᒥᖅᓱᖅᑎᐅᕗᖅ ᓄᓇᒥᙶᖅᑐᓂᒡᓗ ᐃᓕᓐᓂᐊᖅᑎᑦᑎᔨᐅᕗᖅ ᐃᒡᓗᓕᒑᕐᔪᒥᐅᑕᖅ, ᓄᓇᕗᑦ, ᑲᖏᖅᖠᓂᕐᒥᐅᑕᐅᓕᖅᑐᖅ. ᖁᑎᖕᓂᖅᐹᒥᑦ ᐊᓕᓚᔫᑎᑖᖅᓯᒪᔪᖅ ᐃᓕᖅᑯᓯᕐᓂᒃ ᕿᒥᕈᓂᖅ ᑕᐃᑲᖓᑦ ᑲᐃᓪᑕᓐ ᓯᓚᑦᑐᓴᕐᕕᖕᒥᑦ.
ᐃᓄᒃᑎᑑᓕᖅᑐᐃᔪᖅ ᒫᒋ ᐳᑐᓕᒃ
This piece originally appeared in the winter 2025 issue of the Inuit Art Quarterly.